«Ź jakoj pary fasady stali važniejšymi za čałaviečaje žyćcio?» Čamu jeŭrapiejskaja fobija da kandycyjanieraŭ absurdnaja

Jeŭropa — cudoŭnaje miesca dla žyćcia, i mnohija rečy jeŭrapiejcy robiać našmat lepš, čym amierykancy. Ale adna z rečaŭ, dzie ja adnaznačna na baku amierykancaŭ (i absalutnaj bolšaści inšych krain) — staŭleńnie da indyvidualnych kandycyjanieraŭ (aktualnaja tema hetyja dni).

Hetaja fobija da kandycyjanieraŭ u Zachodniaj Jeŭropie nie maje nijakaha apraŭdańnia — ni ekanamičnaha, ni ekałahičnaha, ni maralnaha, ni miedycynskaha, ni kulturnaha. Prosta absurdnaja i šyzoidnaja fobija, jakaja štohod pryvodzić da dziasiatkaŭ tysiač zališnich śmierciaŭ i dyskamfortu dla socień miljonaŭ čałaviek, asabliva dla najbolš uraźlivych hrup: starych, invalidaŭ i dziaciej.

Adzin z hałoŭnych arhumientaŭ suprać u tym, što indyvidualnyja kandycyjaniery psujuć fasady damoŭ. Što ž, cikava, ź jakoj pary fasady stali važniejšymi za kaštoŭnaść čałaviečaha žyćcia?

Nakolki niezdarovy pryjarytet, ad jakoha patychaje najhoršymi praktykami aŭtarytarnych krain i saŭka, a nie humanistyčnymi i čałaviekacentryčnymi tradycyjami zachodniaj cyvilizacyi.

Da taho ž, zaraz isnujuć samyja roznyja madyfikacyi kandycyjanieraŭ, technałohii nie stajać na miescy. Jość multy-split-sistemy, kali ad adnaho źniešniaha błoka možna padklučyć niekalki kandycyjanieraŭ, jość dekaratyŭnyja karobki, jakija dapamahajuć zamaskiravać usie estetyčnyja niedachopy, jość kandycyjanier-monabłok, ad jakoha dastatkova prosta vyvieści šłanh u akno.

Tak, mahčyma, dazvalać indyvidualnyja hruvastkija split-sistemy, z karobkaj zvonku kala kožnaj kvatery, u rajonach Suśvietnaj spadčyny JUNIESKA i nie varta. Ale absalutnaja bolšaść jeŭrapiejcaŭ i nie žyvuć u architekturnych pomnikach histaryčnaha centra. Nie kožny fasad varty achovy. A tyja fasady, vartyja achovy, dla ich možna vykarystoŭvać manabłoki i multy-sistemy.

Nastupnaja hrupa arhumientaŭ ekałahičnaja i ekałahična-maralisckaja. Maŭlaŭ, kandycyjaniery patrabujuć vialikaj kolkaści elektraenierhii, viaduć da pavieličeńnia vykidaŭ CO2, što tolki paharšaje situacyju sa źmienaj klimatu. Źniešnija błoki tolki razahrajuć jašče bolš vulicy. Nu i samaje hałoŭnaje — kandycyjaniery, z punktu hledžańnia ekaaktyvistaŭ tolki maskirujuć hałoŭnuju prablemu hłabalnaha paciapleńnia.

Maŭlaŭ, navošta hetyja kaśmietyčnyja zachady, kali hałoŭnaja prablema nie vyrašanaja. Čałaviek pavinien pakutavać, bo kali hetyja pakuty niedastatkovyja, jon stanie niedastatkova matyvavanym bajcom u ekzistencyjnaj baraćbie sa źmienaj klimatu.

Što ž, tut arhumienty jašče bolš absurdnyja, čym z fasadami. Kandycyjaniery hod za hodam usio bolš enierhaefiektyŭniejšyja. Značnaja častka elektraenierhii ŭ mnohich krainach Jeŭropy (naprykład, Francyi), užo vyrablajecca nie z vykapniovaha paliva, a z «zialonaj» ekałahična čystaj enierhietyki.

Tak, kandycyjaniery nahrajuć vulicy, tamu što jany nie «stvarajuć» choład, a «vysmoktvajuć» ciapło znutry nadvor, ale pa takim samim pryncypie pracujuć i zvyčajnyja chaładzilniki i ladoŭni, prosta kropla ŭ kroplu. To što, ad ich taksama admovimsia?

Nu i apošni maraliscki arhumient («kandycyjaniery heta kaśmietyčnyja zachady, a treba vyrašać hłabalnuju prablemu źmieny klimatu») — heta arhumient z vobłaści psichijatryi, a nie zdarovaha hłuzdu.

Kali čałaviek (albo hramadstva) maje ŭsie mahčymaści zrabić svajo žyćcio lepšym, tut i zaraz, adnosna tanna, z tym, što ŭ miežach jahonaha kantrolu, ale zamiest hetaha jon čakaje niejkaha hłabalnaha vyrašeńnia (jakoje ŭ značnaj miery pa-za miežami tvajho kantrolu, i na vyrašeńnie hetaj prablemy mohuć syści dziesiacihodździ, a toje i stahodździ) — takoha čałavieka nielha ličyć psichična zdarovym.

Źmiena klimatu — absalutna realnaja i surjeznaja prablema, jakaja patrabuje rašeńnia. Ale heta nie aznačaje, što nie treba zmahacca ź niehatyŭnymi nastupstvami hetaha paciapleńnia tut i zaraz, bo heta prosta iłžyvaja dychatamija. Dapamažy spačatku sabie tut i zaraz, uratuj najbolš uraźlivych i słabych, tut i zaraz, a potym dumaj pra ambitnyja pražekty (zasialeńnie Marsu, baraćba z paciapleńniem, i hetaj dalej).

Nielha hłabalnyja, doŭhaterminovyja prablemy, na jakija tvoj upłyŭ vielmi nizki, pryjarytezavać papiarod krytyčnych patreb, jakija ŭ miežach tvajho kantrolu, i jakija lohka vyrašajucca. Tryvožny patałahičny ałarmizm i abyjakavaść da pakut ludziej nie dapamahaje vyrašyć hetyja hłabalnyja i doŭhaterminovyja prablemy.

• 31
• 6
• 1
• 7
• 2
• 0
• 0
• 2