Dzianis ź Niaśviža dziesiać hadoŭ adpracavaŭ na likiora-harełačnym zavodzie. A znajšoŭ siabie i najlepš staŭ zarablać jak błohier Ałkabard
Dzianis Šapiołkin dehustuje ŭ kadry napoi ad pładova-jahadnaha «Čaradziejstva» da kalvadosu i cikava raskazvaje pra adčuvańni. Jon sabraŭ 300 tysiač padpisantaŭ na jutubie, rekłamadaŭcy stajać u čarzie.
Niadaŭna Dzianis zarehistravaŭsia i ŭ Treds, dzie jaho kantent taksama znachodzić popyt. Praŭda, Ałkabard zaŭsiody papiaredžvaje, što ałkahol škodzić zdaroŭju, i nie rekamienduje paŭtarać jaho prafiesijnyja truki biez padrychtoŭki.
Ab prafiesijnym padychodzie nie žart: Dzianis Šapiołkin raniej pracavaŭ na zavodzie pa vytvorčaści ałkaholu. Błoh ža jon zavioŭ 10 hadoŭ tamu. «Ja nikoli nie dumaŭ, što heta stanie majoj prafiesijaj», — pryznajecca Dzianis.
Mužčyna naradziŭsia ŭ Minsku ŭ 1976-m, ale ciapier žyvie ŭ Niaśvižy. Pačynaŭ raskazvać pra ałkahol jašče ŭ ŽŽ i tolki paśla pierajšoŭ na jutub, ad jakoha atrymaŭ srebnuju knopku.
Siońnia, jak śćviardžaje sam błohier, jaho viedajuć usie likiora-harełačnyja zavody Ukrainy, Biełarusi i Rasii.
«Mnie prapanoŭvali dosyć vysokija pasady na likiora-harełačnych zavodach, ale ja admoviŭsia», — raskazvaŭ jon na svaim jutubie.
Zamiest pasady na zavodach jon abraŭ błoh, na jakim i zarablaje.
Častka ałkaholu, jaki jon pje na videa — heta zamovy ad brendaŭ. Ale Ałkabard śćviardžaje, što zaŭsiody zdymaje vyklučna svaju ščyruju reakcyju na napoi.
«Kali mnie nie spadabałasia, ja tak i skažu».
Na kanale ŭ jutubiera možna znajści dehustacyju ałkaholnych napojaŭ z usiaho śvietu — tut i arak sa Šry-Łanki, i hranatavaja harełka z Baku, i čača z kalvadosam. Viadoma, nikudy bieź biełaruskich balzamaŭ, ajčynnaj harełki i pładova-jahadnaha vina. Pryčym Dzianis padkazvaje, jak pravilna pić roznyja vidy ałkaholu.
Jość tut miesca i adukacyjnym videa — naprykład, hutarkam z narkołaham i raskazam pra ałkahalizm i kadziroŭku.
U błohiera mocna piŭ dzied, a sam Dzianis starajecca z harełkaj nie pierabirać.
Niadaŭna padpisanty prezientavali błohieru pšaničnuju harełku, vypuščanuju ŭ pačatku 90-ch. Na žal, kankretnaja data vypusku na butelcy ścierłasia.
Dzianis pryznaŭsia, što bajaŭsia pić taki ekspanat, i nie daremna: hałoŭnaje ŭražańnie ad jaho — dzikaje pachmielle.
«U mianie ŭ žyćci byli vielmi drennyja harełki. Było niešta drennaje ŭkrainskaje adnojčy, žytomirskaje. Z rasijskich paskudstvaŭ niešta było, ale takoha łajnišča ŭ mianie jašče ni razu nie było. I takoha badunu ŭ mianie nie było hadoŭ 10, navat paśla samahonki. Maja rekamiendacyja fanatam «pry SSSR harełka była lepšaj / trava zielaniejšaj» adpravicca tudy i atrymlivać asałodu. Usio zroblenaje pry Sajuzie było haŭnom», — padzialiŭsia mierkavańniem Ałkabard.
«Harełka ŭ Sajuzie była dziarmovaj. Jana pachnie biazvychadnaściu i šeraściu».
Mužčyna žanaty, maje ŭžo darosłych dziaciej. Jaho žonka Iryna taksama časam stanovicca hierainiaj rolikaŭ.
Kamientary
Ostałoś zabuchať i zahovoriť śvietłoje potrieblatielskoje buduŝieje i buchatielnoje.