U Polščy pačnuć vydavać ipateku pad 2% hadavych, choć nasamreč pad 4. Skarystacca zmohuć i biełarusy

Ipateka pad 2% hadavych?

Na biahučy momant rynkavyja staŭki pa ipatečnych kredytach u złotych u Polščy składajuć kala 7,5—8,5 % hadavych. Prahrama «Pieršaja kvatera» (Pierwsze mieszkanie) praduhledžvaje kredyt pad 2% hadavych. Roźnicu ŭ staŭkach budzie kampiensavać dziaržava.

Ale 2% vielmi ŭmoŭnyja, bo dziaržaŭnyja nadbaŭki da kredytaŭ nie buduć uklučać bankaŭskuju maržu abo kamisiju. Jaje pavinien budzie pakryć pazyčalnik, a heta jašče kala 2%. U vyniku atrymlivajecca, što pa fakcie heta budzie kredyt pad 4% hadavych, što na 3,5—4,5 pracenta mienš, čym staŭki pa zvyčajnych ipatekach.

Polskija ŭłady płanujuć, što prahrama budzie dziejničać ad 1.07.2023 da kanca 2027 hoda.

Chto zmoža skarystacca ipatekaj

Jak vynikaje z samoj nazvy prahramy, skarystacca joj zmohuć tolki tyja, chto nabyvaje svajo pieršaje žytło. Pryčym heta nie abaviazkova musić być kvatera, možna kupić i dom. Maksimalnaja suma kredytu dla adzinokich ludziej składaje 500 tysiač złotych (kala 110 tysiač jeŭra), dla siamiejnych — 600 tysiač (kala 131 tysiačy jeŭra). Maksimalnaja suma pieršapačatkovaha ŭniosku nie musić pieravyšać 200 tysiač złotych. Z hetaha vynikaje, što žytło, nabytaje pa hetaj prahramie, nie moža kaštavać bolš za 700 tysiač złotych (kala 153 tysiač jeŭra) dla adzinokich i nie bolš za 800 tysiač złotych (kala 175 tysiač jeŭra) dla siamiejnych.

Z ulikam polskich cen na nieruchomaść atrymlivajecca, što, kali vy skarystajeciesia takoj mahčymaściu, vam nie ŭdasca nabyć vialikuju kvateru ŭ Varšavie dy inšych vialikich haradach, dzie ceny taksama vysokija. Naprykład, u Hdańsku ci Krakavie.

Pavialičyć

Aproč abmiežavańniaŭ pa sumie kredytavańnia i košcie žytła, prahrama praduhledžvaje i šerah inšych abmiežavańniaŭ. Pa-pieršaje, kredytaatrymalnik musić być nie starejšy za 45 hod. Pa-druhoje, ilhotny pieryjad budzie doŭžycca tolki pieršyja 10 hod. Paśla pracentnyja staŭki pa ipatecy vyjduć na zvyčajny ŭzrovień.

Atrymalnik ilhotnaj ipateki budzie abaviazany žyć u nabytym žytle na praciahu 24 miesiacaŭ z momantu nabyćcia kvatery abo zdačy doma dla vykarystańnia ŭ vypadku budaŭnictva.

Kali ŭłaśnik vyrašyć zdavać žytło ŭ arendu, to jon stracić ilhoty i budzie vymušany pierajści na standartnyja pracenty i kampiensavać hrošy, vydatkavanyja dziaržavaj na źmianšeńnie pracentaŭ. Toje samaje datyčyć prodažu. Kali čałaviek nabudzie žytło z dapamohaj prahramy i vyrašyć jaho pradać, to jamu taksama daviadziecca kampiensavać roźnicu ŭ śpiecyjalnych i zvyčajnych pracentnych staŭkach. Hetyja praviły buduć dziejničać ciaham 10 hadoŭ, pakul atrymalnik vypłačvaje ipateku pa źmienšanym pracencie.

Pavialičyć

Ci zmohuć takoj mahčymaściu skarystacca biełarusy?

Finansavy i kredytny kansultant Hleb Račkoŭski ŭ efiry radyjo «Ŭnet» vykazaŭ zdahadku, što skarystacca takoj mahčymaściu zmohuć u tym liku i hramadzianie Biełarusi, jakija žyvuć u Polščy. Ekśpiert adznačyŭ, što ŭ Polščy nie isnuje nijakich abmiežavańniaŭ dla atrymańnia kredytu na padstavie hramadzianstva. Adzinaje, što ŭ zaležnaści ad statusa pražyvańnia hramadzianina Biełarusi roźnicca kolkaść bankaŭ, hatovych vydać ipatečny kredyt. Pa słovach śpiecyjalista, adzin z polskich bankaŭ hatovy kredytavać navat na padstavie vizy. Čatyry banki dajuć kredyty na padstavie časovaha dazvołu na žycharstva. Uładalniki pastajannaha DNŽ majuć mahčymaść atrymlivać kredyty va ŭsich bankach.

Čytajcie taksama: 

Minskim arandadaŭcam i nie śniłasia. Kolki biełarusy płaciać za zdymnyja kvatery ŭ Polščy i Litvie 

Za paŭtara hoda biełarusaŭ, jakija pracujuć u Polščy, stała bolej amal u dva razy

93% zajavak na vizy Poland.Business Harbour — ad biełarusaŭ

• 53
• 0
• 8
• 7
• 6
• 7
• 15
• 0