Krynica ŭ Pientahonie: Nas zahadzia nie papiaredžvali ab atacy dronaŭ na Kreml, ukraincy zapeŭnivajuć, što heta nie jany
Karespandentka Fox News pa nacyjanalnaj biaśpiecy Dženifier Hryfin pahavaryła sa svaimi krynicami ŭ Pientahonie i cytuje ich słovy ŭ tvitary nastupnym čynam: «Nas zahadzia nie apaviaščali pra ŭdar dronaŭ pa Kramli. Ukraincy zapeŭnivajuć nas, što heta byli nie jany».
Aficyjnuju pazicyju Vašynhtona ŭ sieradu vykazaŭ namieśnik pres-sakratara Dziarždepartamienta Viedant Pateł. Jon padkreśliŭ, što Dziarždepartamient pakul nie moža paćvierdzić sapraŭdnaść videa vybuchaŭ nad Kramlom, a da lubych zajavaŭ samoha Kramla tam staviacca z krajnim skiepsisam, piša Bi-bi-si.
Na pytańni žurnalistaŭ na bryfinhu ab tym, ci zmoža Dziarždepartamient vykazacca ab sapraŭdnaści videa bolš dakładna ŭ budučyni, Pateł adkazaŭ, što praca ŭ hetym kirunku budzie praciahnutaja.
Jon padkreśliŭ, što ZŠA praciahnuć padtrymlivać Ukrainu i što ŭkrainskija harady nie adzin raz padviarhalisia razburalnym napadam rasijskich dronaŭ. Pry hetym Pateł zaŭvažyŭ, što ZŠA nikoli nie padšturchoŭvali Ukrainu da napadaŭ na rasijskaj terytoryi i prytrymlivalisia hetaj pazicyi paśladoŭna.
U Kijevie aficyjna admaŭlajuć svajo dačynieńnie da napadu dronaŭ na Kreml. Tam amal zaŭsiody zajmajuć takuju pazicyju, kali adbyvajecca niejkaja dyviersija na terytoryi Rasii, ale ŭ Vašynhtonie nie zaŭsiody schilnyja vieryć padobnym admaŭleńniam.
Najbolš jaskravy prykład tyčycca zabojstva prapahandystki Darji Duhinaj u žniŭni minułaha hoda. Amierykanskija śpiecsłužby ličać, što da hetaha była datyčnaja jak minimum niejkaja častka ŭkrainskaj dziaržavy. Kijeŭ heta ŭparta admaŭlaje.
Scenaryj ukrainskaha ŭdaru pa Kramli abmiarkoŭvaŭsia ŭ adnym z dakumientaŭ Pientahona, niesankcyjanavana raskrytych na pačatku krasavika. Sapraŭdnaść hetych dakumientaŭ aficyjna nie paćvierdžanaja, ale bolšaść ź ich nie ŭtrymlivaje prykmiet falsifikacyi.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam7
Kamientary