Zamiest Kitaja: Apple padpisała vialiki kantrakt na vytvorčaść čypaŭ u ZŠA. Piekin pakryŭdziŭsia
Kampanija Apple zaklučyła šmatmiljardny kantrakt z amierykanskim vytvorcam mikračypaŭ Broadcom z metaj vykarystoŭvać u svaich pryładach bolš detalaŭ, vyrablenych u ZŠA.
U ramkach doŭhaterminovaj damovy dźvie kampanii buduć sumiesna raspracoŭvać i vyrablać u Amierycy kampanienty dla pryład 5G. Hetaja ŭhoda stała častkaj abvieščanaha jašče ŭ 2021 hodzie płana Apple pa inviestavańni 430 miljardaŭ dalaraŭ u ekanomiku ZŠA, piša Bi-bi-si.
Rašeńnie ab pierachodzie na mikračypy ajčynnaj vytvorčaści było pryniata na fonie handlovaj vajny pamiž Piekinam i Vašynhtonam u halinie vysokich technałohij.
U chodzie hetaha zaciažnoha kanfliktu ZŠA ŭžo nakłali šerah abmiežavalnych mier na kitajskuju industryju pa vytvorčaści mikračypaŭ i ŭkłali miljardy dalaraŭ u raźvićcio ŭłasnaha siektara paŭpravadnikoŭ.
Kitaj taksama nie zastajecca ŭ daŭhu. U pačatku tydnia Piekin zajaviŭ, što pradukcyja amierykanskaha hihanta Micron Technology stavić pad pahrozu nacyjanalnuju biaśpieku krainy.
U apošnija miesiacy zakanadaŭcy siarod jak respublikancaŭ, tak i demakrataŭ akazvajuć usio bolšy cisk na amierykanskija technałahičnyja hihanty, jakija, ź ich punktu hledžańnia, patrapili ŭ zanadta vialikuju zaležnaść ad kitajskich vytvorcaŭ i detalaŭ.
Apple na hetym fonie imkniecca pastupova mianiać svoj łancužok pastaŭščykoŭ. Usio bolš jaje pryład vyrablajucca za miežami Kitaja — u pryvatnaści, u Indyi i Vjetnamie.
A ŭ minułym hodzie kampanija abviaściła, što stanie zakuplać paŭpravadniki ŭ tajvańskaha hihanta TSMC, što vyrablajucca na fabrycy ŭ Aryzonie.
U 2022 hodzie Apple taksama abviaściła pra płany pa vytvorčaści smartfona iPhone 14 u Indyi ŭ ramkach novaj stratehii pa vyvadzie vytvorčaści z Kitaja.
U krasaviku adkrylisia pieršyja roźničnyja kramy smartfonaŭ Apple ŭ Deli i Mumbai.
Ciapier čytajuć
Cichanoŭski: Ja ž nie viedaŭ, što ludzi bajacca pakazvać tvary i bajacca za svaich svajakoŭ! Ja nabivaju huzy sam28
Kamientary