U centry Minska zrobiać biaspłatnyja parkoŭki dla naviedvańnia sacyjalnych abjektaŭ. Jak sistema budzie pracavać
Takich łakacyj niekalki, i pa kožnaj vypracavali peŭnyja asablivaści, pra heta pišuć «Minsk-Naviny».
Siarod ich — Dziciačaja mastackaja škoła mastactvaŭ na skryžavańni vuł. Vaładarskaha i vuł. Karła Marksa. Pakolki dzieci dabirajucca na zaniatki samastojna i nijakich prapanoŭ ab źmienie ŭmoŭ parkoŭki tam nie pastupała, vyrašana pakinuć usio tak, jak jość. Dla naviedvalnikaŭ Dziciačaj muzyčnaj škoły, jakaja znachodzicca pa adrasie vuł. Enhielsa, 1, taksama pieramien nie płanujecca: u zakrytaj zonie płatnaj parkoŭki praduhledžana 15-chvilinnaje znachodžańnie biaspłatna.
Nastupnaja łakacyja — niepadalok ad stadyjona «Dynama». Tam znachodziacca niekalki ŭstanoŭ achovy zdaroŭja, siarod jakich 3-ja haradskaja kliničnaja balnica imia Kłumava, 2-ja haradskaja kliničnaja balnica, Haradski kardyjałahičny centr. Dla zručnaści pacyjentaŭ i miedpiersanału prapanujecca vyklučyć z zony płatnaj parkoŭki ŭčastak nasuprać stadyjona «Dynama». Ciapier tam viaducca ramontnyja raboty, jakija pavinny zaviaršycca ŭ lipieni. Paśla hetaha miarkujuć źniać darožnyja znaki i infarmacyjnyja stendy ab płatnaj parkoŭcy.
Niepasredna kala balnic parkoŭka zastaniecca płatnaj, i ŭ ludziej budzie vybar: skarystacca jaje pasłuhami za hrošy ci pakinuć mašynu krychu dalej, ale biaspłatna.
Jašče adzin abjekt — dziciačy sad №143 na vuł. Karala. Dla raźmieščanaj tut zony płatnaj parkoŭki prapanujecca zrušyć režym pracy. Spahaniać płatu buduć z 10:00 da 16:00. Heta dazvolić baćkam, jakija pryvoziać dziaciej u sadok na asabistym transparcie, pakidać mašynu biaspłatna, pakul jany advodziać małych u hrupu i ŭviečary zabirajuć ich dadomu. Takoje ž rašeńnie prapanavali dla parkoŭki la dziciačaha sadka №5 na bulvary Mulavina.
Nakont parkoŭki la 1-j haradskoj dziciačaj palikliniki, što na Załatoj Horcy, pastupała niamała zvarotaŭ ad baćkoŭ maleńkich pacyjentaŭ i piersanału. U jakaści rašeńnia prapanavana prybrać zonu płatnaj parkoŭki niepasredna kala ŭstanovy achovy zdaroŭja. Biaspłatnymi stanuć 12 mašyna-miescaŭ. Astatnija zastanucca płatnymi. Tamu jość aściarohi, što hetyja miescy buduć zaniatyja — i nie fakt, što naviedvalnikami palikliniki.
Dla 1-j haradskoj kliničnaj balnicy, što ŭ rajonie Akademii navuk, i raźmieščanaha pobač Haradskoha ankacentra jak varyjant prapanujuć zrabić biaspłatnaj parkoŭku, prylehłuju da ŭstanovy achovy zdaroŭja na pr. Niezaležnaści. Ale ŭ hetym vypadku najaŭnaść svabodnych mašyna-miescaŭ dla pacyjentaŭ harantavać nielha.
Namieśnik staršyni Minharvykankama Aleh Korzun prapanavaŭ inšy varyjant: haradžanam, jakija prachodziać kurs lačeńnia ambułatorna, u rehistratury mahli b vydavać adpaviednuju daviedku, a dla inśpiektaraŭ, jakija kantralujuć zonu parkoŭki, jana stała b padstavaj nie spahaniać płatu. Anałahičny padychod jon daručyŭ prymianić i da parkoŭki na vuł. Kisialova, dzie pobač znachodziacca haradski endakrynałahičny dyspansier i stamatałahičnaja paliklinika №3.
«Vyskačyć na vulicu ŭ karotkich spadničkach — heta vy mahli. I ŭsich hvałtavali tam». Łukašenka ŭspomniŭ kinošnikam 2020-y i zaklikaŭ spynicca16
Kamientary