1 žniŭnia filmy Mikity Łaŭreckaha papoŭnili miedyjateku anłajn-kinateatra Vodblisk. Admysłova dla pakazu na płatformie režysior adabraŭ filmy «To Ruth», «Biełaruski psichapat», «Zabojstva na Alibiehava», jakija ŭ niečym pieraklikajucca pamiž saboj, — atrymałasia cikavaja tru-krajm tryłohija.
Mikita Łaŭrecki śpiecyjalizujecca na zdymkach kino amal bieź biudžetu, dziakujučy čamu režysior vypuskaje novyja pracy pa niekalki razoŭ na hod i moža ličycca adnym z samych «pładavitych» biełaruskich režysioraŭ. Pry hetym jon — zaŭsiodnik kinafiestyvalaŭ, čym dakazvaje, što kino bieź biudžetu taksama moža być u centry ŭvahi i być acenienym prafiesijanałami kiniematohrafa. Pačynajučy z 2020 hoda jaho dysidenckija filmy, jakija ścirajuć miažu pamiž ihravym i dakumientalnym kino, pakazvali na «Artdakfeście», Filmadrid, DAFilms i Doclisboa. Filmy režysiora vyłučajucca aryhinalnymi siužetami i niezvyčajnaj realizacyjaj. Sam Mikita Łaŭrecki siabie nazyvaje zasnavalnikam novaha ruchu «Biełaruskaje skončanaje kino».
Charakterna, što ŭsie try filmy, pra jakija pojdzie havorka, stvoranyja ŭ roznyja hady pačynajučy z 2012 hoda, to bok cikavaść režysiora da žanru tru-krajm źjaviłasia jašče da chvali jaho papularnaści.
Film «To Ruth»
Ihravy film «To Ruth» byŭ stvorany ŭ 2012 hodzie, u samym pačatku tvorčaha šlachu Mikity. Heta karotkamietražnaja historyja bieznadziejnaha kibierkachańnia stvoranaja pa matyvach realnaha ananimnaha błoha stałkiera, jaki pieraśledavaŭ ulubionuju youtube-błohierku. Hałoŭnuju rolu vykonvaje sam režysior, jak i ŭ bolšaści svaich filmaŭ. Saŭndtrek, jaki trymaje ŭ napružańni na praciahu ŭsioj stužki, sabrany z kampazicyj, jakimi z režysioram padzialilisia ananimnyja muzyki.
Stužka «Biełaruski psichapat»
Stužka «Biełaruski psichapat» 2015 hoda raskazvaje pra Dzimu, jaki z nahody svajho dnia naradžeńnia vyrašaje zładzić viečarynku, hałoŭnaja meta jakoj — pazbavicca cnatlivaści. Hety film — volny pieranos na biełaruskuju hlebu manifiesta amierykanskaha masavaha strałka Elijata Rodžera. Režysior niby zadaŭsia pytańniem: što budzie, kali na adnoj dačy pakinuć inceła-psichapata i troch małaznajomych dziaŭčyn? U adkazie na jaho hladač ubačyć nietypovaje i svojeasablivaje, ale aryhinalna zroblenaje kino, jakoje prymušaje dahladzieć, kab daviedacca, što budzie ŭ kancy.
Tyktok-sieryjał «Zabojstva na Alibiehava»
Samaje hučnaje minskaje złačynstva apošnich hadoŭ stanovicca asnovaj dla postyraničnaha tyktok-sieryjała «Zabojstva na Alibiehava». Ihravy film zmantavany z sabranych razam tyktokaŭ pra žyćcio poliamornaha trya: Evieliny, Mikity i Lošy. U zrazumiełym i zvykłym farmacie tyktoku hledaču raskažuć historyju, jak poliamornyja stasunki zakančvajucca padvojnym zabojstvam.
Filmy «To Ruth», «Biełaruski psichapat», «Zabojstva na Alibiehava» možna pahladzieć, nabyvajučy asobna, dostup da adnaho filma kaštuje 5$.
Film budzie dastupny 30 dzion z momantu pieršaha prahladu, hladzieć jaho možna lubuju kolkaść razoŭ.
Hledačy, jakija znachodziacca na terytoryi Biełarusi, mohuć hladzieć biaspłatna ŭvieś repiertuar miedyjateki VODBLISK u 2023 hodzie.
Kamientary