Ałžyr adpravić svaje vojski ŭ susiedni Nihier. Tam ciapier kiruje prarasijskaja chunta

Pavodle zajavy ałžyrskaha parłamienta, prapanovu padtrymała amal usia bolšaść deputataŭ abiedźviuch pałat. Kanstytucyja Ałžyra patrabuje, kab adpraŭku vojskaŭ za miažu ŭchvalili nie mienš jak dźvie traciny deputataŭ kožnaj pałaty.

Ułady pakul nie paviedamili, kolki vajskoŭcaŭ płanujecca nakiravać u Nihier i kali pačniecca apieracyja. Pavodle aficyjnych zajaŭ, misija budzie mieć abmiežavany charaktar i budzie nakiravanaja na abaronu ałžyrskich inviestycyj, najpierš enierhietyčnych abjektaŭ dziaržaŭnaj naftahazavaj kampanii Sonatrach.

Adnosiny pamiž Ałžyram i Nihieram zastavalisia napružanymi na praciahu niekalkich miesiacaŭ paśla taho, jak u minułym hodzie Ałžyr źbiŭ bieśpiłotnik, jaki zalacieŭ z boku Mali. Incydent vyklikaŭ dypłamatyčny skandał. Nihier razam z sajuźnikami — Mali i Burkina-Faso, jakimi taksama kirujuć vajskoŭcy, — adklikaŭ svajho ambasadara z Ałžyra.

Paśla hetaha susiednija krainy pačali adnaŭlać adnosiny i damaŭlacca pra pahłybleńnie supracoŭnictva ŭ baraćbie z džychadysckim hvałtam, transhraničnaj złačynnaściu i kantrabandaj. Pamiž Ałžyram i Nihieram prachodzić pustynnaja miaža praciahłaściu kala 960 kiłamietraŭ.

Supracoŭnictva ŭ śfiery biaśpieki aktyvizavałasia ŭ žniŭni paśla taho, jak u Nihiery ŭdałosia praduchilić sprobu vajskovaha pieravarotu. U pačatku kastryčnika prezident Ałžyra Abdelmadžyd Tebun abvinavaciŭ nienazvanyja dziaržavy ŭ zmovie suprać susiedniaj krainy i zajaviŭ pra hatoŭnaść «abaraniać Nihier luboj canoj».

Ministr abarony Nihiera dvojčy naviedvaŭ Ałžyr. Padčas hetych vizitaŭ byŭ padpisany pratakoł ab vajskovym supracoŭnictvie, padrabiaznaści jakoha całkam nie raskryvajucca. Ałžyr užo akazvaŭ susiedniaj krainie vajskovuju dapamohu, u tym liku pieradaŭ viertaloty i čatyry źniščalniki Su-30.

Važnuju rolu ŭ zbližeńni dźviuch dziaržaŭ adyhryvajuć ekanamičnyja intaresy Ałžyra, asabliva ŭ naftahazavaj halinie.

Dziaržaŭnaja kampanija Sonatrach praz svaju daččynuju strukturu SIPEX inviestuje značnyja srodki ŭ Nihier. SIPEX zajmajecca prajektami na naftavym radoviščy Kafra, jakoje znachodzicca prykładna za 85 kiłamietraŭ ad ałžyrskaj miažy. Pavodle acenak, na jakija spasyłajecca tureckaje ahienctva Anadolu, zapasy hetaha rajona pieravyšajuć 2,5 miljarda baralaŭ nafty. Heta robić jaho adnym z najvažniejšych zamiežnych aktyvaŭ Sonatrach. 13 žniŭnia kampanija pačała bureńnie novaj śvidraviny ŭ hetym rajonie.

Akramia taho, Nihier maje stratehičnaje značeńnie dla prajekta transsacharskaha hazapravoda praciahłaściu bolš za 4000 kiłamietraŭ. Jon pavinien zabiaśpiečyć pastaŭki hazu ŭ Jeŭropu praz terytoryju Ałžyra.

U červieni Ałžyr pačaŭ raboty na ŭčastku hazapravoda, jaki prachodzić pa jaho terytoryi. Taksama kraina ŭviała ŭ ekspłuatacyju elektrastancyju mahutnaściu 40 miehavat, pryznačanuju dla zabieśpiačeńnia elektraenierhijaj stalicy Nihiera Nijamieja i navakolnych rajonaŭ.

Naziralniki ličać, što rašeńnie ab mahčymym raźmiaščeńni vojskaŭ śviedčyć nie tolki pra imknieńnie abaranić naftavuju infrastrukturu, ale i pra źmienu padychodu Ałžyra da rehijanalnaj palityki. Na praciahu dziesiacihodździaŭ kraina addavała pieravahu dypłamatyi i dyjałohu i vielmi aściarožna staviłasia da vajennaha ŭmiašańnia za miežami svaich terytoryj.

Analityk kansultacyjnaj hrupy North Africa Risk Consulting Džef Porter adznačyŭ, što ciapierašni krok adlustroŭvaje źmienu kursu ałžyrskaj palityki. Pavodle jaho acenki, tradycyjnyja instrumienty ŭpłyvu krainy — dyjałoh i mižnarodnaje prava — na fonie suśvietnych źmien stračvajuć efiektyŭnaść, što padšturchoŭvaje Ałžyr da niepasrednaj vajskovaj prysutnaści ŭ rehijonie.

U Nihiery ź lipienia 2023 hoda ŭłada znachodzicca ŭ rukach vajskovaj chunty na čale z hienierałam Abdurachmanam Čyjani. Jon zrynuŭ abranaha prezidenta Machamieda Bazuma, jaki dahetul zastajecca pad vartaj. U krainie zachoŭvajecca niestabilnaść i praciahvajucca ŭzbrojenyja napady. Vialiki ŭpłyŭ u krainie maje rasijski «Afrykanski korpus», pry dapamozie jakoha miascovym uładam u žniŭni ŭdałosia zadušyć sprobu vajskovaha pieravarotu.

• 0
• 0
• 0
• 0
• 0
• 0
• 0
• 0