Zatrymali byłoha vykładčyka BDUIR. Za kamientary, jakija jon daŭno vydaliŭ — HUBAZiK pakazaŭ, jak ich zachoŭvaje
Imavierna, ciapier zatrymany mužčyna za kratami.
Zatrymanamu Vitalu Drazdovu 30 hadoŭ. Jon minčuk, vučyŭsia ŭ 129-j škole ŭ Sierabrancy, a paśla pastupiŭ u Licej №2, jaki znachodziŭsia tamsama. Ad 2009 da 2014-ha Vital vučyŭsia ŭ BDUIR na fakultecie kampjutarnaha prajektavańnia, a paśla pastupiŭ u mahistraturu na śpiecyjalnaść «Psichałohija pracy, inžyniernaja psichałohija, erhanomika». Paśla zastaŭsia pracavać asistentam na kafiedry inžyniernaj psichałohii i erhanomiki.
Znajomyja mužčyny raspaviadajuć, što jon vielmi tvorčy čałaviek. «Jon artystyčny, na niejkim sportkary starym haniaŭ va ŭnivier. Pieŭ, zdymaŭ akciorskija videa, kaspłeiŭ, čytaŭ rep i prydumlaŭ šmat žartaŭ. Vielmi kruty čałaviek, niefarmatny.
U čatach jon byŭ zorkaj, bo maje vielmi dobraje pačućcio humaru. Paśla 2020-ha jaho z univiersiteta zvolnili, čym jon zajmaŭsia dalej, ja nie viedaju», — kaža naš surazmoŭca.
Ciapier Vitala zatrymali. Hubazikaŭcy śćviardžajuć, što jon raniej napisaŭ 15 000 kamientaroŭ, ale daŭno ich vydaliŭ. Pakazali jany i toje, jak siłaviki ich «vyciahvajuć» — na skrynšocie pakazanaja častka starych paviedamleńniaŭ zatrymanaha mužčyny z čata «[Nia]mirny BDUIR», pratesnaha čata aktyvu ŭniviersiteta.
Vyhladaje tak, što ŭ ich nie było na momant 2020 hoda aŭtamatyzavanaj sistemy dla analizu čataŭ (jakuju jany pakazali raniej) i jany prosta impartavali ich całkam — hetaja funkcyja ŭ telehramie isnuje ŭžo daŭno. Paśla jany majuć mahčymaść zachoŭvać ich prosta ŭ vyhladzie fajłaŭ na kampjutarach i «dastavać» pry patrebie. U takim vypadku niknejmy buduć staryja, bo jany nie abnaŭlajucca. Technična heta vielmi niedaskanałaje rašeńnie, ale jano pracuje.
Taksama Vitala zmušajuć kazać, što jon «administratar čata BDUIR». Praŭda, našy surazmoŭcy heta asprečvajuć. «Ja nie viedaju, jakoha čata BDUIR jon administratar, ale da viadzieńnia «[Nia]mirnaha» jon dačynieńnia nie maje. Adminam jon tam nikoli nie byŭ — nie pamiataju, moža, tam u jaho dziela žartu była niejkaja asobnaja paznaka. Moža, jany sprabujuć vydać niejki čat nakštałt «Abituryjenty kafiedry» abo ŭnutrany čat supracoŭnikaŭ za niešta značnaje? Ja nie viedaju».
Ciapier mužčyna, jak vyhladaje, za kratami — kala tydnia jaho nie było ani ŭ jakich sacsietkach.
«Naša Niva» — bastyjon biełaruščyny
PADTRYMAĆChłopiec z Homiela vydaliŭ akaŭnt amal try hady tamu. Ale jaho vyličyli i zatrymali — voś jak heta adbyłosia
Biełarusy stvaryli bot, jaki dapamoža adšukać paviedamleńni ŭ čatach. Voś jak jon pracuje i čamu heta važna dla biaśpieki
Za kamientary zatrymali ajcišnika, jaki vydaliŭ telehram-akaŭnt paŭtara hoda tamu. Voś jak jaho znajšli
Ciapier čytajuć
Litoviec Vitalijus Mockus zaniaŭ pasadu Stryžaka ŭ «Bajsole». Chto heta taki?14
Kamientary