«Biaru ŭ arendu mašynu i jedu da statui Svabody zapisvać zvarot da biełaruskaha naroda», — pieradaje z Vašynhtona pa videasuviazi Vadzim Prakopjeŭ, jakomu «Naša Niva» pazvaniła pacikavicca, ci sapraŭdy jon źjechaŭ žyć u Amieryku. Pamiž razvahami pra toje, jak ciažka budzie vytrymać estetyku i trapić kadram u nierv (kali zdymać zblizu, za śpinaj budzie tolki pastamient; a žyćcieśćviardžalny rakurs na Libiertas adkryvajecca tolki z vostrava, jaki ihnarujecca hramadskim vodnym transpartam — brać u arendu jašče i łodku?!), Prakopjeŭ raskazvaje nam pra vietry, jakija vydźmuli jaho z varšaŭskaha łofta, pranieśli nad Atłantykaj i pryziamlili ŭ askietyčnaj vašynhtonskaj studyi, u jakoj z natchnialnaha — tolki vid na Kapitolij.
Unutry pustych biełych ścienaŭ, čyju hieamietryju parušajuć tolki pryciahnutyja z rasprodažaŭ tankanohi stoł i dvuchspalny łožak, apranieny ŭ strohi čorny harnitur Prakopjeŭ hladzicca pamaładziełym — usio ž šturmavać ZŠA zvyčajna jedzie narod, jaki pabačyŭ mieniej, juny, žoŭtaroty.
A Prakopjeŭ svaje tickets to D.C. biez zvarotnaha kvitka kupiŭ u 52 hady — heta amal stolki ž, darečy, kolki hod turmy (50) jamu vypisała biełaruskaje pravasudździe, ad jakoha Prakopjeva ciapier adździalaje 7 tysiač kiłamietraŭ.
«U mianie jość try zadačy: biznes, vałanciorstva ŭ Kaardynacyjnaj radzie — kažu «vałanciorstva», kab narod nie padumaŭ, što heta deputacki raśpił hrantaŭ, — i vučoba», — tłumačyć Prakopjeŭ mety svajho znachodžańnia ŭ Amierycy.
Pra biznes Prakopjeŭ prosić šmat nie pisać. Ale luby čałaviek, jaki maje razumieńnie pra papiaredniuju dziejnaść Vadzima, zmoža ŭjavić, pamyliŭšysia tolki ŭ stylistyčnych detalach, vyhlad bliskučaj vyvieski pasiarod vašynhtonskaha avieniu, jakaja pulsuje ŭ fantazijach byłoha minskaha restaratara.
Z hetym usio jasna, ale navošta jamu vybary ŭ Kaardynacyjnuju radu?
«Jak minimum debaty tam stanuć viesialejšymi», — kaža Vadzim, jaki maje ŭsie šansy ŭzmacnić kvołaje parłamienckaje pradstaŭnictva KR u ZŠA.
Pra vučobu Prakopjeŭ havoryć z honaram. Šturmavać inšyja kantynienty i vyšyni paznańnia, raźmianiaŭšy pałovu sotni, adnolkava składana i pačesna.
Vadzim staŭ dystancyjnym słuchačom palityčnaha kursu ŭ Hillsdale College — cikavicca tradycyjami amierykanskaha dziaržaŭnaha kiravańnia i dypłamatyi. Kursy raźličany na paŭhoda i, jak kaža student, absalutna biaspłatnyja.
Viartacca ŭ Jeŭropu Prakopjeŭ bližejšyja paŭhoda nie źbirajecca.
-
Łatuška pra mahčymaść vajny ŭ Biełarusi: Heta ž varjactva, nie ŭjaŭlaju, jak kramloŭskaja prapahanda budzie tłumačyć heta
-
«Da kanca hoda, spadziajusia, zmožam realizavać adnu-dźvie rečy». Babaryka — pra svoj novy prajekt i biełaruskuju movu
-
Čamu na kanfierencyi «Novaja Biełaruś» nie było Siarhieja Cichanoŭskaha?
Ciapier čytajuć
Cichanoŭskaja: Pieramieny ŭ Biełarusi — heta pytańnie času. Voś asnoŭnyja tezisy jaje vystupu na kanfierencyi «Novaja Biełaruś»29
Cichanoŭskaja: Pieramieny ŭ Biełarusi — heta pytańnie času. Voś asnoŭnyja tezisy jaje vystupu na kanfierencyi «Novaja Biełaruś»
DDoS-ataka idzie na sajty adrazu niekalkich biełaruskich ŚMI. Mahčyma, jana źviazanaja z šostaj hadavinaj narodnaha ŭzdymu 2020‑ha i kanfierencyjaj «Novaja Biełaruś», što adkryłasia siońnia66
Kamientary