Stvaralniki «Pracesaŭ» zdymajuć novaje humarystyčnaje šou — pra žonak mabilizavanych
Kamanda «ČynČynČeneł» rychtuje novy prajekt — šou «Davaj jaho dačakajemsia». «Naša Niva» daviedałasia padrabiaznaści. A taksama pra toje, ci budzie praciah sieryjała «Pracesy».
Režysior Andrej Kašpierski raskazaŭ, što novaje šou — śpin-of (adhalinavańnie) inšaha sieryjała kamandy pad nazvaj «ČynČyny ŭ mundzirach». Pieršyja sieryi hetaj historyi vyjšli ŭ siaredzinie śniežnia, i heta čorna-bieły antyvajenny sieryjał u stylistycy savieckaha vajennaha kino. Jon pakazvaje maskulinny pohlad na vajnu.
A voś «Davaj jaho dačakajemsia» — žanočy pohlad na vajnu, kaža Andrej: «Jon zrobleny aŭtarkami i artystkami «ČynČynČeneł», žanočaj častkaj našaj kamandy. Heta buduć try dadatkovyja vypuski, nakiravanyja ŭ pieršuju čarhu na žanočuju aŭdytoryju».
Andrej raskazvaje, što hierojami prajekta stanie siamja mabilizavanaha rasijskaha sałdata, jakoj jaje ŭjaŭlaje prapahanda.
«Prajekt zrobleny ŭ stylistycy trochi staramodnaha televizijnaha šou. Heta aŭtarskaja prahrama našaha novaha piersanaža, jaki raniej nie źjaŭlaŭsia ŭ suśviecie «ČynČynČeneła», jaho kličuć Anhielina Źviezdapad. Usio šou pastanovačnaje, u im prysutničajuć elemienty telepieradačy, videainstrukcyi i kramy na kanapie».
Kamanda płanuje vypuścić prajekt jak maha chutčej — u kancy studzienia abo ŭ pačatku lutaha.
Šoŭraniery «ČynČynČeneł», Andrej Kašpierski i Michaś Zuj, niadaŭna pakazali bujny prajekt — «Pracesy», pieršy sieryjał u historyi «Biełsata». Jak im reakcyja publiki na premjeru? Kašpierski adznačaje, što jaho ŭściešyła i kolkaść prahladaŭ na jutubie, za što jon asobna dziakuje proma-adździełu kanała, i vodhuki ad hledačoŭ na afłajn-pakazach:
«Naprykład, my zrabili vialiki pakaz u kinateatry Kinoteka, heta ŭ centry Varšavy. Mianie ŭzradavała žyvaja reakcyja ludziej — było vielmi šmat śmiechu, pieražyvańniaŭ, uciahnutaści. Hety pakaz prademanstravaŭ, što my mahli b stavicca da «Pracesaŭ» jak da kino i ładzić novyja pakazy dla žyvych hledačoŭ u afłajn-kinateatrach. A jašče vielmi chacieŭ by atrymać jak maha bolš vodhukaŭ ad kinakrytykaŭ, kab pra nas pisali recenzii i ahlady».
U internecie źjaŭlalisia zaŭvahi nakont niepraŭdapadobnych suadnosin pamiž kolkaściu łajkaŭ i kolkaściu prahladaŭ u «Pracesaŭ». Naprykład, pieršaja sieryja prajekta — «Pieratrymka» — na siońnia maje 543 tysiačy prahladaŭ na jutubie i tolki kala 2700 łajkaŭ.
«Dumaju, reč u tym, što promaadździeł «Biełsata» kuplaje rekłamu ŭ jutubie, i heta całkam narmalna. Biez rekłamy prahladaŭ było b mienš, ale tak my pryciahvajem novuju aŭdytoryju, — kaža Kašpierski. — Heta realnyja prahlady ad realnych ludziej, im moža padabacca ci nie padabacca prajekt, ale tak pracuje padobnaja rekłama. Mnie zdajecca, što biez rekłamy ni adzin taki tvor, sieryjał ci kino, nie byŭ by papularny.
Mnie troški kryŭdna i strašna, što šmat chto nie moža adkryta vykazvacca ŭ kamientarach, padmacoŭvać svaje prahlady łajkami ci dyzłajkami, tamu što bajacca adkaznaści za heta. Atrymlivaŭ u pryvat vielmi šmat paviedamleńniaŭ ad ludziej, jakija pahladzieli sieryjał i chacieli padzialicca emocyjami, ale nie mahli imi padzialicca ŭ jutubie, tamu što žyvuć u Biełarusi, niechta potym vydalaŭ pierapisku sa mnoj. Niekatoryja maje siabry i znajomyja, jakija žyvuć u Biełarusi, bajacca kamientavać sieryjał, a niekatoryja i ŭvohule bajacca jaho hladzieć, tamu składana padličyć dakładnuju statystyku. Zdajecca, u inšych pieradač jość lepšyja suadnosiny, ale tam niama takoj vastryni, jak u «Pracesach» — mahčyma, i praz heta ludzi bajacca stavić łajki».
Ci čakać praciah sieryjała? I Kašpierski, i Zuj majuć šmat idej dla «Pracesaŭ», hatovyja pisać novyja scenary i zdymać dalej. Ale, pryznajecca režysior, pytańnie ŭ tym, ci hatovy «Biełsat» praciahvać.
Heta stanie zrazumieła paźniej — ciapier u płanach kamandy prosta adpačyć paśla premjer.
«Naša Niva» — bastyjon biełaruščyny
PADTRYMAĆČytajcie taksama:
Režysior Kašpierski — pra novy sieryjał, «Biełaruśfilm» jak chorar i žonak kitajskich ministraŭ
«ČynČyny ŭ mundzirach». Zapuścili antyvajenny satyryčny sieryjał
Ciapier čytajuć
Novaja abłava: zatrymali dziasiatki svajakoŭ palitviaźniaŭ i tych, chto im dapamahaŭ — što viadoma19
Kamientary