Biełarus zapłaciŭ šmat hrošaj za polskuju pracoŭnuju vizu, atrymaŭ admovu i narakaje na firmu. Ale jość niuans 

Svaju sumnuju historyju ŭ tyktoku raspavioŭ błohier, jaki padpisany jak bazyuchka.

Pačynałasia ŭsio banalna: chłopcu była patrebna viza, i siabry paraili jamu firmu, jakaja zajmałasia dapamohaj u hetym pytańni. Jon zapłaciŭ hrošy, firma zrabiła svaju častku pracy, i błohier addaŭ dakumienty ŭ vizavy centr.

Pabačyŭšy svoj pašpart z admovaj, błohier napisaŭ pra heta firmie. Pradstaŭnica firmy ŭdakładniła, ci pastavili ŭ pašpart štamp, i, atrymaŭšy stanoŭčy adkaz, adpraviła chłopcu dva smajły, jakija płačuć.

Watch on TikTok

Chłopiec kaža, što za ŭsio zapłaciŭ 1000 rubloŭ — ź ich 600 było kankretna za pasłuhi vizavaj firmy.

— Jak vy dumajecie, ci dapamahaje mnie firma niejak ciapier? Nie. Ja siadžu i čytaju forumy ŭ internecie. Što ja daviedaŭsia? Pa-pieršaje, maja vizavaja historyja pa***na. Daj Boh, vykinuć pašpart i zrabić novy dapamoža jaje adnavić. Pa-druhoje, možna padać apielacyju, jakaja kaštuje jeŭra 60, ale nie fakt, što rašeńnie źmienicca. Možna taksama nie padavać apielacyju, a znoŭ padacca na polskuju nacyjanalnuju pracoŭnuju vizu. Jakaja vierahodnaść admovy? Maksimalnaja. Bo ja nie razumieju, što kankretna im nie spadabałasia. A kali budu padavacca na inšyja vizy ŭ inšyja krainy, u mianie budzie bolš pahłyblenaja pravierka. Jak by nie vielmi strašna, ale taksama buduć hladzieć na maju admovu pa polskaj vizie.

Błohier udakładniŭ, što admovili jamu praź niesapraŭdnaje zaprašeńnie na pracu, jakoje dapamahła zrabić firma.

Chłopiec kaža, što nie płanuje dalej svarycca ź vizavaj firmaj, tamu što farmalna jana svaje abaviazacielstvy vykanała: dapamahła z zapaŭnieńniem ankiety i atrymańniem zaprašeńnia na pracu.

Čym ža jon niezadavoleny? Jon ličyć, što firma zahadzia viedała, što pa polskich nacyjanalnych pracoŭnych vizach ciapier vialiki pracent admoŭ. Ale kali błohier źviarnuŭsia pa dapamohu, śpiecyjalisty firmy jamu pra hetu situacyju nie paviedamili i navat sami prapanavali padavać dakumienty mienavita na polskuju pracoŭnuju vizu. Abiacali, što ŭ hetym vypadku ŭsio budzie supier.

«Naša Niva» paprasiła prakamientavać hety kiejs manitorynhavuju hrupu visastat.me.

— Małady čałaviek dapuściŭ vialikuju pamyłku, kali vyrašyŭ zrabić svaju historyju publičnaj, — kamientuje manitorynhavaja hrupa. — Faktyčna jon pryznaŭsia ŭ tym, što kupiŭ zaprašeńnie na pracu. Jakija paśla hetaha ŭ jaho mohuć być pytańni, nie vielmi zrazumieła.

Zusim inšaja reč, kali čałavieku admaŭlajuć u vizie pad realnyja dakumienty realnaj pajezdki. I takija vypadki zdarajucca rehularna. Pad adny i tyja ž dakumienty ŭ składzie hrupy ludziej na dziełavyja vizy vyniki byvajuć zusim roznyja: adnamu admova, inšamu viza na 5 hadoŭ.

— U kamientaryjach jamu masava rekamiendujuć źmianić pašpart…

— …kab pasprabavać schavać ad konsulstva fakt admovy. Abmiarkoŭvać hetuju stratehiju nie vielmi etyčna, tamu što heta pošuk schiemy padmanuć konsuła. Viadomy prykłady, kali ludzi sapraŭdy mianiali pašpart paśla admovy ŭ vizie i padavalisia znoŭ. Vynik prykładna 50 na 50. Treba razumieć, što vašy asabistyja danyja ŭ lubym vypadku papadajuć u bazu. Dapamahaje nie stolki zamiena pašparta, kolki paŭtornaje rašeńnie konsuła.

— Ci jość sens u apielacyi?

— Pytańnie treba stavić tak: ci možna padać apielacyju? Tak, možna. Ale kali vy spytajecie pra statystyku paśla hetaj pracedury, to ŭ bolšaści vypadkaŭ apielacyja nie prynosić čakany vynik, ale pasprabavać možna.

• 7
• 0
• 13
• 31
• 4
• 6
• 13
• 0