U Francyi źnik 41‑hadovy biełarus Siarhiej Siarmiažka. Šukajuć užo dva tydni
Siarhiej Siarmiažka źnik viečaram 7 žniŭnia ŭ Hrymo, što ŭ rajonie Sien-Trape. Asacyjacyja pošuku źnikłych ludziej (ARPD) abviaściła zbor infarmacyi i zaklikała ŭsich, chto moža niešta viedać pra miescaznachodžańnie mužčyny, źviarnucca da vałancioraŭ abo ŭ žandarmieryju, paviedamlaje miascovaje vydańnie Nice-Matin.
Pavodle sabranaj infarmacyi, napiaredadni Siarhiej razam ź siabrami načavaŭ u kiempinhu. U čaćvier jon jeździŭ u aeraport Marsel-Pravans, kab zabrać znajomuju hramadzianku Rasii, jakaja prylacieła z poŭnačy Francyi. Paśla telefonnaj razmovy z mužčynam ukrainskaha pachodžańnia jon, jak paviedamlajecca, u apošni momant źmianiŭ svaje płany.
7 žniŭnia kampanija adpraviłasia na špacyr u Port-Hrymo. Paźniej usie nakiravalisia ŭ dom siabroŭ. Heta było apošniaje miesca, dzie Siarhieja bačyła jahonaja spadarožnica. Prykładna pamiž 20:00 i 22:00 jon adyšoŭ ad kampanii adzin. Pry sabie ŭ jaho nie było ni telefona, ni dakumientaŭ, i nichto nie viedaje, u jakim kirunku jon pajšoŭ. Z taho času suviazi z mužčynam niama.
Siarhieju Siarmiažku 41 hod. Jon rostam kala 1,75 m, narmalnaha ciełaskładu, maje błakitnyja vočy i śvietłyja vałasy da plačej. Siarod asablivych prykmiet — tatuiroŭka sabaki na pravaj častcy žyvata i hierb Biełarusi (jaki mienavita, nie paznačajecca) na levaj nazie. Na momant źniknieńnia jon byŭ apranuty ŭ śvietła-šeryja šorty, biełuju futbołku i sinija krasoŭki.
Ciapier čytajuć
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary
[Zredahavana]