Trahiedyja adbyłasia ŭ niadzielu, 23 červienia. MZS pra śmierć Sidarenki paviedamiła tolki 26 červienia. Pryčym heta było zroblena biez detalaŭ, ścisła, paśla taho jak infarmacyja prajšła ŭ niezaležnych ŚMI.
Jak stała viadoma «Našaj Nivie», były pasoł u Hiermanii Dzianis Sidarenka skončyŭ žyćcio samahubstvam — skoknuŭ ź minskaha šmatpaviarchovika.
Sidarenka byŭ ambasadaram Biełarusi ŭ Niamieččynie nadzvyčaj doŭha — z 2016 da 2024 hoda. Jaho vyzvalili ad hetaj pasady ŭkazam Alaksandra Łukašenki 11 sakavika hetaha hoda.
Jak raskazali «Našaj Nivie» krynicy, pa viartańni sa svajoj pasolskaj kamandziroŭki z Hiermanii Sidarenka staŭ abjektam uvahi Kamiteta dziaržaŭnaj biaśpieki.
«Nie vyłaziŭ z palihrafaŭ i dopytaŭ», — raskazali «Našaj Nivie» infarmavanyja surazmoŭcy.
Novaj pasady ŭ Ministerstvie zamiežnych spraŭ Sidarenka nie atrymaŭ. Chacia rabota pasłom u Hiermanii — najbolšaj dziaržavie Jeŭrasajuza, — heta pasolskaja pasada vyšejšaj lihi.
«Vidać, nie vytrymaŭ taho, što adbyvajecca», — dadaŭ inšy infarmavany surazmoŭca.
U Sidarenki zastalisia dźvie dački.
U Minsku havorać, što ŭsie karjernyja dypłamaty, jakija viartajucca ź ES, ciapier stanoviacca abjektami pilnaha apieratyŭnaha vyvučeńnia śpiecsłužbami.
Raniej u listapadzie 2022 pamior 64-hadovy ministr zamiežnych spraŭ Biełarusi Uładzimir Makiej. Niekalki krynic taksama nazvali pryčynaj jahonaj śmierci samahubstva. Paźniej, jak možna mierkavać, samahubstvam skončyŭ žyćcio i 46-hadovy ministr transpartu Alaksiej Aŭramienka.
Ciapier čytajuć
Biełaruska pracuje ŭ Dubai rusałkaj, kab addać doŭh 20 tysiač dalaraŭ1
Kamientary