U Kitai znajšli pareštki raniej nieviadomaha dynazaŭra z čatyrma kryłami
U Kitai paleantołahi apisali novy vid latučaha dynazaŭra — Norellraptor barsboldi. Jaho škilet z dobra zachavanym apiareńniem znajšli ŭ adkładach rańniaha krejdavaha pieryjadu ŭ farmacyi Dźjoŭfatan u pravincyi Laanin na paŭnočnym uschodzie Kitaja. Uzrost hetych adkładaŭ aceńvajecca na 145—100 miljonaŭ hadoŭ. Vyniki daśledavańnia apublikavanyja ŭ časopisie Nature.
Norellraptor barsboldi naležaŭ da mikraraptaraŭ — hrupy nievialikich drapiežnych dynazaŭraŭ z čatyrma apieranymi kaniečnaściami. Jany byli blizkimi svajakami ptušak, ale nie ličacca ich prodkami. Daŭžynia znojdzienaj asobiny składała kala 57 santymietraŭ. Pa budovie kostak daśledčyki miarkujuć, što na momant hibieli dynazaŭru było nie mienš za try hady.
U istoty byli vostryja zahnutyja zuby i kipciury. Vierahodna, jana palavała na drobnych žyvioł — jaščarak, ziemnavodnych i rańnich sysunoŭ. Čatyry apieranyja kaniečnaści, vierahodna, dazvalali dynazaŭru płaniravać paśla skačka z vyšyni.
Daśledčyki pad kiraŭnictvam Andrea Kau z Paleantałahičnaha muzieja OPHIS u Italii praanalizavali 194 anatamičnyja źmieny, jakija nazapašvalisia ŭ pracesie evalucyi mikraraptaraŭ. Kala 30% hetych prykmiet paźniej źjavilisia i ŭ evalucyjnaj linii ptušak, adnak u abiedźviuch hrupach jany ŭźnikali ŭ roznaj paśladoŭnaści.
Na dumku aŭtaraŭ daśledavańnia, heta śviedčyć pra toje, što zdolnaści da palotu ŭ mikraraptaraŭ i ptušak farmavalisia niezaležna adna ad adnoj pad upłyvam roznych faktaraŭ naturalnaha adboru.
Paleantołah Skot Chartman z Univiersiteta Viskonsina ŭ Medysanie, jaki nie ŭdzielničaŭ u daśledavańni, miarkuje, što mikraraptary mahli spałučać płaniravańnie z uzmachami kryłaŭ. Mahčyma, jany skakali z uzvyššaŭ abo skał, a nie załazili na drevy.
Aŭtary daśledavańnia adznačajuć, što bolš dakładna zrazumieć, nakolki raspaŭsiudžanaj była takaja schiema raźvićcia palotu siarod padobnych da ptušak dynazaŭraŭ, dapamohuć novyja vykapni i źviestki pra rost ich kostak.
Tyranazaŭru «pamierali tempieraturu» praz 66 miljonaŭ hadoŭ. Voś što vyśvietliłasia
Novaje daśledavańnie amierykanskich hieafizikaŭ pieravaročvaje našy ŭjaŭleńni pra toje, jak mienavita zahinuli dynazaŭry
Asteroid, jaki źniščyŭ dynazaŭraŭ, moh vyklikać pažary pa ŭsioj płaniecie
U Ńju-Jorku pradali samaha darahoha dynazaŭra ŭ śviecie
Čamu ŭ tyranazaŭra byli takija karotkija łapy?
Ciapier čytajuć
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha45
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ88
Kamientary