Homielskaha błohiera Miełstroja, mahčyma, zatrymali na Kipry na zapyt Kazachstana
Biełaruski strymier Andrej Burym, viadomy pad psieŭdanimam Mellstroy, zajaviŭ, što jaho znajšła palicyja na Kipry pa zapycie Kazachstana, i paśla taho źnik, piša kazachstanskaje vydańnie Qumash.
U svaim telehram-kanale Burym apublikavaŭ karotkaje videa, u jakim skazaŭ:
«Mianie znajšła palicyja pa zapycie Kazachstana. Ja zaraz…».
Nieŭzabavie videa źnikła z kanała. Paśla hetaha ni sam strymier, ni jaho pradstaŭniki situacyju nie kamientavali.
Čytačy Qumash taksama paviedamili ŭ redakcyjny čat-bot, što Mellstroy, mahčyma, užo vyvoziać u Kazachstan. Jany źviarnuli ŭvahu na rejs PGT1913 z aeraporta Erdžan praz Stambuł u Astanu, jaki, pavodle ich śćviardžeńnia, vykarystoŭvajecca dla departacyi z Kipra ŭ trecija krainy. Adnak aficyjnaha paćvierdžańnia hetaj infarmacyi niama.
Žurnalisty źviarnulisia pa kamientar u Ministerstva ŭnutranych spraŭ Kazachstana, Ahienctva pa finansavym manitorynhu i Hienieralnuju prakuraturu. Na momant publikacyi adkazaŭ ad hetych viedamstvaŭ nie było.
Raniej sam Mellstroy kazaŭ, što znachodzicca na Kipry i nie moža pakinuć krainu praź mižnarodny vyšuk, abvieščany pa zapycie Kazachstana. U sacyjalnych sietkach taksama źjavilisia zdahadki, što strymier moh sam arhanizavać hetuju historyju dziela pryciahnieńnia ŭvahi, adnak nijakich paćvierdžańniaŭ hetamu niama.
Kazachstan abviaściŭ Andreja Buryma ŭ mižnarodny vyšuk u listapadzie 2025 hoda. Departamient Ahienctva pa finansavym manitorynhu (AFM) pa Astanie paviedamiŭ pra heta, a sud zavočna sankcyjanavaŭ jaho aryšt.
Pavodle AFM, Buryma padazrajuć u arhanizacyi maštabnaj rekłamnaj kampanii pa prasoŭvańni anłajn-kazino Mellstroy.game, aryjentavanaha, u tym liku, na karystalnikaŭ z Kazachstana. Dla papularyzacyi prajekta strymier pravodziŭ rozyhryšy i čelendžy. Udzielnikam prapanoŭvali zdymać videa dla TikTok, YouTube Shorts i inšych sacyjalnych sietak, u jakich treba było raźmiaščać nazvu Mellstroy.game, łahatypy kazino i spasyłki na sajt.
Takija zadańni atrymali raspaŭsiudžańnie i ŭ Kazachstanie. Dziela abiacanych pryzoŭ udzielniki išli na pravakacyjnyja, źniavažlivyja i časam niebiaśpiečnyja ŭčynki.
Adzin z takich vypadkaŭ adbyŭsia 21 kastryčnika ŭ Astanie. U adnym z bujnych handlovych centraŭ mužčyna vybieh z prybiralni tolki ŭ trusach, trymajučy płakat z nadpisam «Padary mnie kvateru». Jon biehaŭ pa handlovaj zale i kryčaŭ hetuju ž frazu.
Palicyja zatrymała mužčynu. Jon rastłumačyŭ, što vykonvaŭ zadańnie biełaruskaha strymiera, jaki nibyta razyhryvaŭ kvateru siarod udzielnikaŭ padobnych čelendžaŭ. Sud pryznačyŭ žycharu Astany 15 sutak administracyjnaha aryštu.
Biełaruski treš-błohier Miełstroj uraziŭ padpisčykaŭ novym źniešnim vyhladam FOTAFAKT
«Dziesiacihadovaje dzicia AMAP pakładzie ŭ padłohu?» Treš-błohier Mellstroy adreahavaŭ na pryznańnie siabie ekstremistam
Minčuka pasadzili na 10 sutak za toje, što paŭdzielničaŭ u konkursie treš-błohiera Mellstroy
Biełaruski treš-strymier Mellstroy arandavaŭ raskošny dom u Kipry za $500 tysiač na hod
Školniki ŭ Rasii vybiehli na placoŭku padčas matča dziela hrošaj ad Mellstroy. Hamialčuk nie zapłaciŭ, a baćkoŭ aštrafavali
Zvyčajny hamialčuk raptam staŭ miljanieram: chto taki Mellstroy i adkul u jaho hrošy
Dzie pracujuć i jak vyhladajuć žonki top-čynoŭnikaŭ?16
Dzie pracujuć i jak vyhladajuć žonki top-čynoŭnikaŭ?
«Kali b ja byŭ śledčym KDB, ja b padkreśliŭ toje samaje». Fiaduta — pra schavanyja sensy «Kałasoŭ pad siarpom tvaim», uvahu siłavikoŭ da svajho rukapisu i zahadku z treciaj častkaj ramana Karatkieviča1111
Kamientary