Biełaruskija śpiecsłužby kupili na imia Ramana Pratasieviča dva aŭtamabili ŭ Polščy. Našto?
Na dumku žurnalistaŭ, tak biełaruskija śpiecsłužby rychtavali albo padstavu Pratasieviča, albo jaho vykradańnie ŭ Biełaruś.
Biełaruskija śpiecsłužby ŭ listapadzie 2020 hoda praz padstaŭnych asob kupili sierabrysty Opel Astra u Varšavie na imia Ramana Pratasieviča. Nieŭzabavie na imia Pratasieviča kuplajecca jašče adno aŭto — Peugeot Expert, jakoje pierahaniaje ŭ Litvu aficer biełaruskich śpiecsłužbaŭ. Sam Raman ni pra što nie zdahadvaŭsia i nie viedaŭ ab isnavańni hetych aŭtamabilaŭ. Ab hetym siońnia paviedamiła «Hazieta Vyborča» ŭ svaim rasśledavańni, zaŭvažyŭ reform.news.
Aŭtary rasśledavańnia Marcin Rybak i Piotr Žytnicki spasyłajucca na svaje krynicy. Pa ich danych, afiora tak i zastałasia b tajamnicaj, kali b pamyłku nie ździejśniŭ biełaruski dypłamat u Litvie. Paśla taho, jak Pratasievič byŭ aryštavany ŭ Biełarusi, supracoŭnik pasolstva Biełarusi pasprabavaŭ pradać adzin z aŭtamabilaŭ. Pakupnikami vystupili pradstaŭniki litoŭskaj kontrraźviedki.
Litoŭcy staranna abšukvajuć aŭto i źbirajuć adbitki palcaŭ i ślady DNK. Jany taksama paviedamlajuć palakam, što ŭ ich jość mašyna, nabytaja ŭ śniežni 2020 hoda ŭ pierakupščyka pad Varšavaj, i što ŭ kantrakcie paznačany Pratasievič, vykradzieny praz šeść miesiacaŭ.
Polskaje ABW vyśviatlaje, što pakupnikom vystupiŭ ukrainiec Rasim G. Paśla aryštu jon idzie na supracoŭnictva i raskazvaje, što kuplaŭ jašče adno aŭto na imia Pratasieviča. Kupić dva aŭtamabili jaho paprasiŭ daŭni pryjaciel, ukrainski biźniesmien Mikołaj H., jaki zaraz žyvie ŭ Vienhryi.
Toj prasiŭ dapamahčy svajmu siabru, byłomu dypłamatu ź Biełarusi, nabyć dva aŭtamabili dla biełaruskich budaŭnikoŭ u Polščy. Rasim G. raspaviadaje, što Mikołaj H. i biełaruski siabar vučylisia razam u vajskovaj akademii ŭ Adesie.
Abodva razy aŭtamabili zabirali mužčyny, jany dobra razmaŭlali pa-rusku. I abodva razy pryjaciel ź Vienhryi nie tolki viartaŭ košt aŭtamabila, ale i dapłočvaŭ bonus.
Peugeot Expert pierahaniajuć u Litvu. Za rulom byŭ aficer biełaruskich śpiecsłužbaŭ. Aŭto pieravysiła chutkaść i patrapiła na kamieru kantrolu chutkaści. U toj ža čas Pratasievič taksama pierajazdžaje ŭ Litvu, ale rehularna byvaje ŭ Varšavie.
Śledstva ličyć, što mienavita tamu biełaruskija śpiecsłužby vykarystoŭvali dva aŭtamabili ŭ dźviuch krainach.
Aŭtary rasśledavańnia vykazvajuć mierkavańnie, navošta biełaruskim śpiecsłužbam mahli spatrebicca zarehistravanyja na Pratasieviča aŭtamabili. Pa ich viersii, tak možna było padstavić žurnalista, naprykład, śpisać na jaho DTZ.
Reform.news prapanuje inšuju viersiju — aŭtamabili možna było b vykarystoŭvać dla vykradańnia i vyvazu Pratasieviča z terytoryi Polščy ci Litvy.
Ciapier čytajuć
Ina Kulej: Milinkievič pieramoh śmierć, ale šlach da poŭnaha adužańnia niablizki6
Kamientary