Maci zabitaj u Izraili Janiny: Jaje muž Ali telefanavaŭ mnie ŭ Homiel, abražaŭ dačku i adčajna jaje raŭnavaŭ
Paśla naradžeńnia syna siamiejnaje žyćcio Janiny Rusinavaj, pavodle jaje maci, pieratvaryłasia ŭ piekła. Muž praviaraŭ telefon biełaruski, padazravaŭ jaje ŭ zdradzie i abražaŭ. Sama Janina kazała, što choča syści.
Maci Janiny, hamialčanka Hanna Rusinava, raskazała izrailskamu vydańniu «Viesti», što pra śmierć dački daviedałasia tolki praź piać dzion.
29 vieraśnia joj patelefanavali ź izrailskaha konsulstva: «Vy što, nie ŭ kursie? Vašaj dački ŭžo piać dzion niama ŭ žyvych».
Suviaź ź Janinaj źnikła ŭ apošniaj dekadzie vieraśnia. Pavodle maci, adnosiny dački z mužam, izrailcianinam Ali Masvadam, kančatkova sapsavalisia paśla naradžeńnia ich pieršaha dziciaci kala dvuch miesiacaŭ tamu.
Hanna raskazvaje, što Ali mocna raŭnavaŭ žonku, praviaraŭ paviedamleńni ŭ jaje telefonie i byŭ pierakanany, što jana jamu zdradžvaje. Jon navat sam telefanavaŭ cieščy ŭ Homiel, raskazvaŭ pra svaje padazreńni i nazyvaŭ Janinu abraźlivymi słovami.
Apošni raz Janina napisała maci z telefona siabroŭki. Svoj telefon, pavodle jaje słoŭ, raźbiŭ muž.
«Mama, nie telefanuj mnie, ja sama budu tabie telefanavać», — paprasiła jana.
Praź niekalki dzion maci pasprabavała źviazacca ź ziaciem. 25 vieraśnia jana napisała jamu ŭ Viber: «Dobry dzień, Ali. Jak Jana i mały?»
Taksama dasłała fatahrafiju cacki, jakuju nabyła dla ŭnuka, i zapytałasia, kali siamja zmoža pryjechać u hości. Sama Hanna nie mahła pajechać u Izrail, bo dahladaje ciažkachvoraha muža.
«Ja spadziajusia, što ŭ vas usio ŭ paradku», — napisała jana Ali.
Adkazu nie było.
«Ziać nie adkazaŭ mnie ni ranicaj, ni dniom, ni ŭviečary», — raskazała Hanna. Tady jana adčuła, što zdaryłasia niešta strašnaje.
«Paśla naradžeńnia syna žyćcio Jany pieratvaryłasia ŭ piekła»
U Izrail Janina ŭpieršyniu pryjechała kala šaści hadoŭ tamu pa adukacyjnaj prahramie «Tahlit». Paźniej jana repatryjavałasia razam ź pieršym mužam, ale paśla pierajezdu para raźviałasia. Praź niekatory čas biełaruska paznajomiłasia z Ali.
Pavodle Hanny, maci Ali była jaŭrejkaj z rasijskimi karaniami, a baćka — musulmaninam. Sam mužčyna niabłaha razmaŭlaje pa-rusku. Jašče da naradžeńnia dziciaci Janina i Ali razam pryjazdžali ŭ hości da jaje baćkoŭ u Homiel.
Maci Janiny kaža, što spačatku adnosiny vyhladali inakš: «Ali vielmi jaje lubiŭ, ja heta viedaju. Jana vyvieła jaho ŭ ludzi, prymusiła zaniacca saboj, pačać vučycca. Mnie ciažka skazać, kali pačałasia hetaja chvaravitaja reŭnaść, tak było nie zaŭsiody. Ale ja adčuvała: paśla naradžeńnia syna žyćcio Jany pieratvaryłasia ŭ piekła».
Uvieś kłopat pra niemaŭla, pavodle Hanny, loh na jaje dačku. Janina nie vysypałasia, skardziłasia maci na pavodziny muža i kazała, što choča ad jaho syści, bo bolš nie moža tak žyć.
«Ja viedała, što jana pakutuje, ale nie mahła navat ujavić, što jaje žyćcio skončycca takoj trahiedyjaj», — skazała maci.
Muž śćviardžaje, što sprabavaŭ vyratavać Janinu
Janinu ź ciažkim paškodžańniem šyi znajšli ŭ kvatery na vulicy ŭ Chajfie kala poŭnačy 24 vieraśnia. Jaje dastavili ŭ balnicu, dzie kanstatavali śmierć.
28‑hadovaha Ali Masvadu zatrymali pa padazreńni ŭ zabojstvie. Jon admaŭlaje vinu i śćviardžaje, što Janina sama naniesła sabie paškodžańni, a jon nibyta sprabavaŭ jaje vyratavać.
Advakat mužčyny zajaviŭ u sudzie, što mienavita Ali vyklikaŭ palicyju i chutkuju dapamohu. Sud paličyŭ padazreńni abhruntavanymi i padoŭžyŭ jaho aryšt na čatyry dni, adnačasova daručyŭšy śledstvu staranna pravieryć viersiju zatrymanaha.
Siabry Janiny tym časam pieradali palicyi źviestki pra imavierny hvałt u siamji. Partnior jaje blizkaj siabroŭki Dyjany sabraŭ śviedčańni znajomych i 30 vieraśnia daŭ pakazańni palicyi Chajfy.
Maci choča pachavać dačku ŭ Biełarusi i zabrać unuka
Dvuchmiesiačnaha syna Janiny paśla jaje śmierci pieradali ŭ pryjomnuju siamju. Hanna choča, kab unuk ros u jaje ŭ Biełarusi, dzie ŭ chłopčyka zastalisia babula, dziadula i ciotka. Adnak dla pieradačy dziciaci spatrebicca asobnaje rašeńnie izrailskich orhanaŭ.
Maci taksama paprasiła dazvolić pieravieźci cieła dački ŭ Biełaruś:
«Ja chaču pachavać Janačku pobač z majoj jaŭrejskaj babulaj, dziakujučy jakoj jana ŭ svoj čas repatryjavałasia. Jany pavinny lažać pobač».
Uviečary 30 vieraśnia siamja atrymała pryncypovuju zhodu na pieravoz cieła Janiny ŭ Biełaruś. Pytańnie pra toje, chto budzie vychoŭvać jaje syna, pakul nie vyrašana.
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary