U Mahilovie pieradumali znosić pieršuju haradskuju elektrastancyju?

Vydańnie «Mohilev Live» apublikavała fotazdymki, na jakich histaryčny budynak pa 2-m Krutym zavułku pulvieryzataram farbujuć z usich bakoŭ ružovaj farbaj. Usie vokny na pieršym paviersie nadziejna pazabivany ASP-plitami. Jak zaŭvažajuć krajaznaŭcy, ničoha z hetaha nie rabili b, kali b budynak źbiralisia znosić, jak płanavałasia raniej. 

Pavialičyć

Pieršaja mahiloŭskaja haradskaja elektrastancyja była puščana ŭ ekspłuatacyju 7 lutaha 1910 hoda, zabiaśpiečvajučy enierhijaj spažyŭcoŭ u centry horada. Pobač z elektrastancyjaj byŭ pabudavany i pieršy elektra-teatr «Čary», na miescy jakoha siońnia znachodzicca kinateatr «Čyrvonaja zorka».

Paśla ŭviadzieńnia novaj elektrastancyi ŭ 1933 hodzie mahiloŭskaja haradskaja elektrastancyja była začyniena, a budynak byŭ pierabudavana pad žyły dom. Što ŭnikalna, pry kardynalnaj pierabudovie fasadaŭ nie stali źbivać stary dekor — budynak zastaŭsia pomnikam dvuch epoch, darevalucyjnaj eklektyki i mižvajennaha kanstruktyvizmu.

Pavialičyć

U apošnija dziesiacihodździe budynak byŭ adsieleny, zakinuty i patrochu razburaŭsia. Pažar, jaki adbyŭsia ŭviesnu 2022 hoda, padšturchnuŭ aktyvistaŭ padać prapanovu ab uziaćci budynka pad achovu, jak važnaha śviedčańnia industryjalnaha raźvićcia horada. Ale čynoŭniki admovili pa nadumanaj padstavie. 

Zusim niadaŭna, u mai 2024 hoda, Mahiloŭski harvykankam pravioŭ hramadskaje abmierkavańnie rekanstrukcyi 3-paviarchovaha budynka byłoj elektrastancyi pad 6-paviarchovy šmatkvaterny žyły dom sumnieŭnaj jakaści architektury, zakazčykam jakoj vystupaŭ «Mirakš Inviest».

Pavialičyć

U Mahilovie źniščać histaryčnuju elektrastancyju pad prajekt zabudoŭščyka. Znos iznoŭ vydajuć za rekanstrukcyju

Niahledziačy na słova «rekanstrukcyja» ŭ naźvie, płanavałasia, što ad histaryčnaha budynka pa fakcie nie zastaniecca navat padmurkaŭ — heta zvykłaja praktyka ŭ biełaruskim budaŭnictvie.

Prajekciroŭščyki nie skupilisia na pachvalbu svajho tvareńnia, choć na rendarach heta była zvyčajnaja pramavuholnaja skrynia, jakuju možna pabačyć u samych tannych rajonach luboha biełaruskaha horada.

Pavialičyć

Prajekt niazhrabnaha budynka členy architekturna-horadabudaŭničaha savieta ŭsio ž raźviarnuli, ale nie tamu, što jon praduhledžvaŭ źniščeńnie budynka ci tamu, što jahonaja architektura nie adpaviadała centralnamu raźmiaščeńniu ŭ horadzie. Prajekciroŭšyki nie zmahli raźmiaścić nieabchodnuju kolkaść parkovačnych miescaŭ. Zakazčyku było prapanavana raspracavać novy prajekt i znoŭ vynieści na hramadskaje abmierkavańnie. 

Hetaja narmatyŭnyja pieraškoda nie była niepieraadolnaj — dastatkova było źmienšyć kolkaść kvater ci skarektavać hienpłan. Ale novy prajekt tak i nie byŭ paŭtorna vyniesieny na hramadskaje abmierkavańnie.

Pavialičyć

Siońniašnija raboty na abjekcie možna patłumačyć tolki dvuma sposabami. Abo tym, što ŭ horadzie navodziać łosk u čakańni pryjezdu vysokich haściej, choć 2-i Kruty zavułak naŭrad ci siońnia mienavita toje miesca, kudy paviazuć delehacyi. Abo budynak chočuć zakansiervavać na doŭhuju pierśpiektyvu. Tady ŭ histaryčnaha pomnika jašče jość šaniec źbierahčysia.

• 1
• 0
• 0
• 0
• 0
• 0
• 0
• 0