Žurnalist: Tramp, pakinuŭšy Bieły dom, razmaŭlaŭ niekalki razoŭ z Pucinym
Paśla sychodu ź Biełaha doma Donald Tramp niekalki razoŭ razmaŭlaŭ z Uładzimiram Pucinym, śćviardžaje ŭ svajoj novaj knizie amierykanski žurnalist Bob Vudvard. Vytrymki ź jaho knihi «Vajna», jakaja vyjdzie z druku ŭ bližejšyja dni, byli apublikavanyja ŭ aŭtorak u amierykanskich ŚMI, paviedamlaje Rasijskaja słužba Radyjo Svaboda.
Hetuju infarmacyju ŭ knizie Vudvard pryvodzić sa słoŭ tolki adnoj krynicy, pamočnika byłoha prezidenta, jaki raspavioŭ žurnalistu pra toje, jak u pačatku 2024 hoda Donald Tramp paprasiŭ jaho vyjści z pakoja, u jakim jany znachodzilisia, bo Tramp źbiraŭsia pahavaryć pa telefonie z Uładzimiram Pucinym i chacieŭ heta zrabić bieź śviedak. Pa danych surazmoŭcy Vudvarda, paśla sychodu ź Biełaha doma Tramp havaryŭ pa telefonie z Pucinym siem razoŭ.
Paćvierdžańniaŭ hetych danych Vudvard nie znajšoŭ. Apytanyja New York Times dvaccać byłych i dziejnych supracoŭnikaŭ administracyi Trampa i Bajdena skazali, što im ničoha nie viadoma pra mahčymyja kantakty byłoha prezidenta ZŠA z prezidentam Rasii.
Pradstaŭnik Donalda Trampa Styvien Čonh nazvaŭ hetyja źviestki «vydumkaj», płodam fantazii aŭtara, achviary «sindromu varjactva na hlebie Trampa». Pres-sakratar Uładzimira Pucina Dźmitryj Piaskoŭ u kamientary Dla New York Times nazvaŭ hetuju infarmacyju «typovaj falšyvaj historyjaj u kantekście vybarčaj kampanii».
Choć byłyja prezidenty ZŠA paśla zaviaršeńnia prezidenckaha terminu niaredka sustrakajucca i havorać z zamiežnymi lidarami, zhodna z tradycyjaj, kantakty byłoha prezidenta Trampa z Uładzimiram Pucinym, kiraŭnikom krainy, jakaja viadzie ahresiŭnuju vajnu suprać susiedniaj dziaržavy, jakuju padtrymlivajuć Złučanyja Štaty, pavinny byli być sankcyjanavanyja Dziarždepartamientam abo Biełym domam.
Asablivuju ŭvahu hetaja infarmacyja pryciahnuła, pakolki Donald Tramp nibyta havaryŭ z Uładzimiram Pucinym u toj čas, jak respublikancy ŭ Kanhresie zatrymlivali adabreńnie pakietu vajennaj dapamohi Ukrainie.
Zhodna z Vudvardam, Džo Bajden vinavaciŭ byłoha prezidenta Baraka Abamu za toje, što toj niedaaceńvaŭ Uładzimira Pucina, i Złučanyja Štaty zanadta miakka adreahavali na ŭvarvańnie Rasiei ŭ Krym u 2014 hodzie. «Mienavita tamu my apynulisia ŭ ciapierašniaj situacyi», — skazaŭ svajmu siabru prezident Bajden.
Źjaŭleńnie padobnaj knihi mienš, čym za miesiac da prezidenckich vybaraŭ, pa słovach kamientataraŭ, napeŭna pryciahnie ŭvahu da adnosin pamiž Donaldam Trampam i Uładzimiram Pucinym.
Bob Vudvard, jaki atrymaŭ viadomaść za aśviatleńnie ŭoterhiejckaha skandału, u vyniku jakoha syšoŭ u adstaŭku prezident Niksan, źjaŭlajecca aŭtaram niekalkich bestseleraŭ.
Ličycca, što jon maje ŭnikalny dostup da krynic u vyšejšych kołach Demakratyčnaj i Respublikanskaj partyj. Jak piša New York Times, byvała, jaho siensacyjnyja vykryćci admaŭlalisia ludźmi, jakich jon cytavaŭ, adnak tyja z hetych siensacyj, što najbolš zapomnilisia, byli paśla paćvierdžany.
Kamientary