Viarnuŭsia z vajny, uładkavaŭsia ŭ Varšavie, pasvaryŭsia z usimi — i źnik. Pryjacieli pra eks-kalinoŭca Maksima Ralko, jakoha zatrymali ŭ Biełarusi

Słužyŭ u pałku, ale nie vajavaŭ

Maksim Ralko pryjšoŭ u Połk Kalinoŭskaha ŭ 2022 hodzie. Tady jamu byŭ 21 hod. Słužyŭ u tyle: stajaŭ na varotach bazy i achoŭvaŭ składy.

Na bajavyja zadačy nie vyjazdžaŭ. Kaleha ŭspaminaje, što Maksim byŭ dziŭnym, ale ničoha drennaha, znachodziačysia na słužbie, nie rabiŭ. Stroiŭ rekrutaŭ, zdymaŭ tyktoki.

— Nichto jaho surjozna nie ŭsprymaŭ. Jak bajavy junit ničoha ź siabie nie ŭjaŭlaŭ, bo za paŭtara-dva hady słužby jon ni razu nie akazaŭsia na bajavych, albo adzin raz vyjazdžaŭ z «minamiotkaj» dla ptušački.

Pryjacieli Maksima, ź jakimi jon pasiabravaŭ u Varšavie, uspaminajuć, što nie čuli ad Maksima apoviedaŭ pra bajavyja zadańni za čas słužby.

— Ja žartam pytaŭsia: «kolki maskaloŭ nakałaciŭ?». Maŭčańnie zaciahnułasia. Mahčyma, jon nie byŭ u bai. Ale ja nie mahu skazać dakładna, — kaža Dźmitryj.

U pačatku 2024-ha Ralko zvolniŭsia z Pałka Kalinoŭskaha, viarnuŭsia ŭ Varšavu.

Dźmitryj kaža, što sa słužby Maksim viarnuŭsia pastalełym, ale staŭ rezkim u razmovach. Moh dazvolić sabie vypady na adras blizkich ludziej i nie vybačaŭsia za heta.

Viarnuŭsia i pačaŭ vučycca

Uładkavacca ŭ Varšavie chłopcu dapamahali pryjacieli Dźmitryj i Ihar. Mužčyny padtrymlivali Maksima, Ihar uziaŭsia dapamahčy z vučobaj, a Dźmitryj — znajšoŭ kvateru.

Hrošaj, jakija chłopiec zarabiŭ va Ukrainie, ź liškam chapiła na niekalki miesiacaŭ. Jon arandavaŭ kvateru ŭ centry Varšavy, pačaŭ vyvučać teściravańnie ŭ IT. Ihar dapamahaŭ jamu asvoić novuju prafiesiju, pakolki sam daŭno pracuje teściroŭščykam. Dźmitryj drukavaŭ jamu nieabchodnyja navučalnyja materyjały.

— Jon zahareŭsia hetaj spravaj, pahruziŭsia ŭ teściravańnie, pačaŭ chadzić na ajcišnyja tusoŭki. Ale taksama źbiraŭsia znoŭ uładkavacca achoŭnikam u «Biadronku», kab nie zastacca biez hrošaj.

Udzielničaŭ u pratestach, pasvaryŭsia ź siamjoj

Pra žyćcio Maksima da pierajezdu ŭ Polšču viadoma niašmat. Naradziŭsia ŭ Minsku, skončyŭ siaredniuju škołu № 70, paviedamiła «Miedyjazonie» inicyjatyva «Biełpoł».

Maksim raskazvaŭ Dźmitryju, što ŭ 2020 hodzie ŭdzielničaŭ u pratestach, rabiŭ płakaty, raspaŭsiudžvaŭ ulotki. U inicyjatyvie «Śpisy zatrymanych» «Miedyjazonie» raskazali, što ŭ ich niama źviestak pra zatrymańni Maksima Ralko ŭ Minsku ŭ 2020-2021 hadach.

Pa słovach Ihara, Ralko byŭ u kanflikcie z mamaj z-za palityki, chłopiec raskazvaŭ, što ŭ junactvie byvaŭ čas, kali jon nie žyŭ doma. U Biełarusi ŭ Ralko ź blizkich zastaŭsia taksama dziadula, ale jany pierastali kantaktavać paśla adjezdu.

Chadziŭ na akcyi ŭ Varšavie

Pierajechaŭšy ŭ Polšču, Ralko atrymaŭ status dadatkovaj abarony, pracavaŭ achoŭnikam u «Biadroncy», žyŭ u chostełach. Časam Maksim spyniaŭsia ŭ Dźmitryja ŭ Varšavie — pryjacieli šmat razmaŭlali pra Biełaruś. Maksim zdavaŭsia jamu «kiemlivym chłopcam, jaki razumieŭ učynki i schoplivaŭ mnohaje adrazu».

Pavialičyć

Z Ralko abodva pryjacieli paznajomilisia na akcyjach u Varšavie ŭ 2020-2021 hodzie. Ihar uspomniŭ, što Ralko šukaŭ pierakładčyka z ruskaj na anhlijskuju, kab razmaŭlać sa ŚMI.

— Ja padachvociŭsia, my sustrelisia, pačali stelefanoŭvacca. Jon šmat chadziŭ na pikiety ŭ Varšavie, rabiŭ niejkija pierformansy palityčnyja.

U YouTube dastupna videa vydańnia «Biełsat», dzie Ralko pravodzić adzinočny pikiet kala budynka polskaha MZS. Rolik padpisany «były staršy śledčy Maksim Ralko pravioŭ adzinočnuju akcyju ŭ Varšavie», ale znajomy Ihar kaža, što žurnalisty pamylilisia.

— Heta niejkaja pamyłka. Jamu było 19 hadoŭ, kali jon pryjechaŭ.

Pryjaciel ličyć, što žurnalisty mahli tak padumać pra Ralko, pakolki toj byŭ fanatam «military-temy»: źbiraŭ vajskovyja našyŭki, ściahi, navat kupiŭ kajdanki i mulaž pistaleta dla «pierformansaŭ».

— Jon, viadoma, byŭ dzivakavatym, ale vielmi sumlennym i adkrytym.

Inšy pryjaciel nazyvaje Ralko «pa-junacku pazityŭnym, što mahło razdražniać navakolnych».

Prapaŭ

Praz paru miesiacaŭ paśla viartańnia z Ukrainy ŭ Polšču Maksim pasvaryŭsia ź siabrami i źnik. Adnaho ź ich jon abvinavaciŭ u špijanažy.

— Nie viedaju, što ŭ jaho pamianiałasia, ale ŭ jaho źjavilisia paranaidalnyja dumki, što jaho pieraśledujuć, usiudy ahienty z KDB i FSB. Pačałasia šyza. Jon mianie abvinavačvaŭ, ahulnych siabroŭ, byłuju dziaŭčynu… Pasvaryŭsia na hetuju temu mocna.

Jon pryvodziŭ u prykład zusim biaskryŭdnyja vypadki, bačyŭ u ich niešta surjoznaje. Naprykład, jon ustupiŭ u «Biełaruskuju chryścijanskuju demakratyju», kiraŭnik našaj supołki prapanavaŭ schadzić na niejkaje pasiadžeńnie, i jon u hetym ubačyŭ niešta niadobraje. Nie pamiataju, što mienavita, ale šmat takich vypadkaŭ było, — raspaviadaje Ihar.

Ralko vyjšaŭ na suviaź u mai 2024 hoda. Raskazaŭ, što znachodzicca ŭ Hiermanii i vyrašyŭ tam padacca na biežanstva. Paźniej Maksim paviedamiŭ, što źbieh z łahiera dla biežancaŭ i pakinuŭ usie dakumienty, uklučajučy pašpart.

Ihar ličyć, što Maksim moh pajechać u Hiermaniju z-za «paranaidalnych dumak» i sumnievaŭ, što jamu biaśpiečna znachodzicca ŭ Polščy.

Nastupny raz siabry Maksima ŭbačyli ŭ vyrazkach ź siužetu ANT — jon siadzieŭ u kajdankach u SIZA. Jak i čamu jon apynuŭsia ŭ Biełarusi — byŭ departavany ci viarnuŭsia sam — nieviadoma.

• 2
• 1
• 2
• 35
• 3
• 17
• 1
• 0