Hajdukieviča trymajuć na apošnim miescy pa kolkaści namalavanych podpisaŭ
Na biełaruskich vybarach-2025 skončyŭsia etap zboru podpisaŭ. Usie sparynh-partniory Alaksandra Łukašenki dziažurna zajavili pra toje, što sabrali patrebnyja 100 tysiač. Viery hetamu niama nijakaj, ale spraŭdzić infarmacyju va ŭmovach ciapierašniaj Biełarusi niemahčyma.
Na Alaksandra Łukašenku pracavaŭ uvieś dziaržaŭny aparat, rabotnikaŭ centralizavana padpisvali na pradpryjemstvach i ŭ biudžetnych ustanovach krainy. Abvieščanyja 2,5 miljona podpisaŭ — nienavukovaja fantastyka, adnak niama sumnievaŭ, što patrebny limit u 100 tysiač podpisaŭ za jaho pieraadoleli.
Ź jaho sparynh-partniorami taksama ŭsio adnaznačna — niama sumnievaŭ, što nivodzin ź ich nie sabraŭ patrebnaj padtrymki.
Tyja, chto pilna sačyŭ za pracesam, adznačajuć, što dziažurnych pikietaŭ było vobmal, dyj i tyja biez čerhaŭ. Abychod kvater faktyčna i nie pačynaŭsia.
U takich realijach źviestki ab kolkaści podpisaŭ, sabranych tym ci inšym kandydatam — prosta virtualny lik, uziaty z hałavy. Tym nie mienš možna adsačyć, kolki namalavali Alehu Hajdukieviču, kolki Hańnie Kanapackaj, a kolki nieviadomym kamunistu Siarhieju Syrankovu i Andreju Chižniaku, čyju palityčnuju pazicyju ŭvohule niemahčyma patłumačyć praz adsutnaść hetaj samaj pazicyi.
Na ciapierašni momant svaje ličby nazvali Bresckaja, Viciebskaja, Hrodzienskaja i Mahiloŭskaja vobłaści. Biezumoŭna, karcina niapoŭnaja, bo tradycyjna najbolšuju kolkaść nibyta sabranych podpisaŭ kandydaty malujuć u Minsku. Tym nie mienš peŭnyja tendencyi adsačyć možna.
Vyniki «zboru» podpisaŭ pa čatyroch abłaściach:
| № | Pretendent | Bresckaja | Viciebskaja | Hrodzienskaja | Mahiloŭskaja | Ahułam |
| 1 | Łukašenka | 373308 | 276924 | 360490 | 406500 | 1 417 222 |
| 2 | Syrankoŭ | 16225 | 17235 | 19864 | 21318 | 74 642 |
| 3 | Kanapackaja | 18678 | 15627 | 15143 | 15002 | 64 450 |
| 4 | Chižniak | 15394 | 17495 | 15314 | 15999 | 64 202 |
| 5 | Hajdukievič | 4696 | 22951 | 10261 | 19951 | 57 859 |
Admietna, što pakul Aleha Hajdukieviča, jaki sprabuje prezientavać siabie jak druhoha pa papularnaści palityka Biełarusi, trymajuć na apošnim miescy — navat nižej za nikomu nieviadomaha Chižniaka. Kali taki samy vynik Hajdukieviču pakinuć i na vybarach, heta budzie vydatnym ukazańniem na toje, jak jaho ŭsprymajuć ułady.
Analizavać kankretnyja vyniki pa abłaściach nie maje sensu. Chto-nichto padyšoŭ da spravy tvorča i chacia b uklučyŭ hienieratar vypadkovych ličbaŭ.
A voś na Mahiloŭščynie padyšli da pytańnia bolš miechanična. Treba mieć Hajdukieviču kala 20 tysiač? Dobra, chaj budzie 19951. Chižniaku rekamiendavali mieć 16 tysiač? Nie budziem pisać roŭny lik, chaj budzie 15999. U Kanapackaj pavinna być 15 tysiač? Davajcie napišam 15002.
Ciapier čytajuć
Jak rychtavaŭsia vizit Cichanoŭskaj u Kijeŭ i čamu jon niekalki razoŭ pieranosiŭsia12
Kamientary