«Heta doktar ad Boha». Za palityku sudziać dziciačaha ankołaha z 23-hadovym stažam
Alena Šarafanovič doŭhi čas pracavała ŭ Centry dziciačaj ankałohii, hiematałohii i imunałohii ŭ Baraŭlanach, a paśla ŭ RNPC dziciačaj chirurhii.
U Pieršamajskim sudzie Minska 30 studzienia 2025 hoda pačnuć sudzić Alenu Šarafanovič. Heta adzin z najlepšych dziciačych ankołahaŭ Biełarusi, u miedycynskich čatach i supołkach niama nivodnaha niehatyŭnaha vodhuku pra jaje ad pacyjentaŭ. Naadvarot, udziačnyja ludzi pieradajuć adzin adnamu jaje imia.
«Heta doktar ad Boha. Vylečyła majho syna, kali ŭsie kazali, što inšaha lačeńnia niama. Dziakuj vielizarny vam». «Šarafanovič —vielmi dobry śpiecyjalist, kali b vy raniej źviarnulisia, vam dapamahli b». «Tak, da jaje, šmat vodhukaŭ ab joj dobrych!!!». «Žonka adpraviła. Skazała: supierdoktar. Ja nie vieryŭ i pastaviŭsia skieptyčna. Ale akazałasia, što tak i jość».
Alenie Šarafanovič inkryminujuć «narodny» artykuł 342 Kryminalnaha kodeksu — udzieł u pratestach. Pa ciapierašniaj biełaruskaj zaviadzioncy ludzi z takim abvinavačvańniem čaściej za ŭsio čakajuć suda ŭ śledčym izalatary.
Sudzić doktarku budzie namieśnica staršyni suda Pieršamajskaha rajona Natalla Dziadkova. Tolki za apošni hod jana asudziła dva dziasiatki čałaviek za ŭdzieł u pratestach. I jašče niekalki pa inšych palityčnych spravach.
Alena Šarafanovič skončyła Minski miedycynski instytut (2001) i aśpiranturu Biełaruskaj miedycynskaj akademii paśladypłomnaj adukacyi pa śpiecyjalnaści «ankałohija» (2019). Šeść razoŭ prachodziła kursy pavyšeńnia kvalifikacyi, stažyravałasia ŭ Hiermanii i ZŠA.
13 hadoŭ pracavała ŭ Centry dziciačaj ankałohii, hiematałohii i imunałohii ŭ Baraŭlanach, jašče 3 hady ŭ RNPC dziciačaj chirurhii. Adnačasova viała pryjom u «Łade», Centry łaziernaj dermatałohii «HappyDerm».
U 2022 hodzie Alena Šarafanovič, jakaja była dyrektarkaj pryvatnaj «Kliniki A1», trapiła ŭ centr skandału. Adzin z suzasnavalnikaŭ miedcentru pisaŭ skarhi na svaju ž kliniku, bo vajavaŭ z druhim suzasnavalnikam, Rusłanam Šarafanovičam — heta muž Aleny. U vyniku ŭ «A1» zabrali licenziju, i praca była paralizavanaja. A na samu Alenu adna z supracoŭnic napisała danos za «raspaŭsiud ekstremisckich materyjałaŭ». Dyrektarku sudzili, jana atrymała štraf. Klinika nieŭzabavie zakryłasia.
Miarkujučy pa źviestkach «Viasny», taho samaha muža, Rusłana Šarafanoviča, taksama sudzili pa kryminalnaj spravie za ŭdzieł u pratestach. Čym skončyŭsia praces, nieviadoma.
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła20
Kamientary
Zdaroŭja Vam mocnaha, Jelena! Dziakuj za Vašy dobryja spravy i prafiesijanalizm!
Sdiełała tak, čto tiepieŕ voobŝie niet śledov opieracii