Čamu razam z «Łade» zakryli i drobnuju «Kliniku A1»? Kanflikt pamiž padpałkoŭnikam miedycynskaj słužby i dyrektarkaj
Razam z hihantami «Łade» i «Nardzinam» u mai pad pres pravierak trapiła i zusim maleńkaja «Klinika A1». Heta było dziŭna: hrošy nie paraŭnalnyja z bujnymi miedustanovami, kali heta sapraŭdy pieradzieł rynku, to «A1» tut nie kankurent inšym hulcam. Vyśvietliłasia, što pieršapryčyna inšaja — «A1» stała achviaraj unutranych razborak zasnavalnikaŭ.
«Klinika A1» pracuje ź leta 2020 hoda, śpiecyjalizujecca na kaśmietałahičnaj miedycynie, flebałohii, dermatałohii. Maje — dakładniej, mieła — mienš za dva dziasiatki rabotnikaŭ.
Ale i ŭ jaje, jak i ŭ «Łade» pryjšli z pravierkaj, jak i «Łade» pakarali prypynieńniem dziejnaści. Palityka? Nie, zapeŭniŭ «Našu Nivu» supracoŭnik kliniki, «A1» zabivaje kanflikt pamiž zasnavalnikami.
«Siońnia zasnavalnikaŭ dvoje. Heta maci vykładčyka Biełaruskaha dziaržaŭnaha mieduniviersiteta Uładzimira Hurleva i muž dyrektarki samoj kliniki Aleny Šarafanovič, — raskazvaje surazmoŭca «Našaj Nivy». — Ale maci Hurleva nijakaha faktyčnaha dačynieńnia da kliniki nie maje, na jaje tolki aformlenyja papiery. Na spravie, usim zajmajecca sam Hurleŭ — i ŭ jaho žorstki kanflikt z dyrektarkaj i jaje mužam».
Uładzimir Hurleŭ — padpałkoŭnik miedycynskaj słužby, vykładaje ŭ BDMU. Pa słovach surazmoŭcy, jon raniej pierasiakaŭsia ŭ inšych pryvatnych miedustanovach z Alenaj Šarafanovič, chirurham-ankołaham. U 2020 hodzie jon sam paklikaŭ jaje ŭ novuju «Kliniku A1», jakuju zasnavaŭ razam sa znajomym doktaram-kaśmietołaham. Paźniej partnior syšoŭ i druhim zasnavalnikam staŭ muž Šarafanovič.
«Hurleŭ aficyjna nie maje nijakaha dačynieńnia da kliniki: jon tam nijak nie aformleny, zasnavalnik pa dakumientach — jaho maci. Ale jon umiešvajecca, daje niejkija zahady, nastojvaje na niejkich rašeńniach. Praz heta z vosieni 2021 hoda adbyvalisia pastajannyja skandały pamiž im, dyrektarkaj i jaje mužam.
Z vosieni 2021 hoda heta ciahniecca. Hurleŭ choča źniać dyrektarku z pasady, druhi zasnavalnik (muž dyrektarki) supraciŭlajecca.
Tamu Hurleŭ pačaŭ pisać skarhi i zajavy — u tym liku ŭ milicyju», — kaža surazmoŭca «Našaj Nivy».
Sama Alena Šarafanovič, dyrektarka i žonka druhoha zasnavalnika, paćviardžaje heta.
«Dachodziła da taho, što ja niekalki razoŭ vyklikała milicyju na Hurleva, niekalki razoŭ — jon na mianie, — raskazvaje Šarafanovič. —
Padčas adnaho z takich vizitaŭ milicyi Hurleŭ pakazaŭ milicyjantu kubki z «Pahoniaj» na kuchni kliniki i skazaŭ, što heta nibyta maje. Tady abmiežavałasia prafiłaktyčnaj razmovaj. Ale paśla Hurleŭ padbiŭ adnu z rabotnic kliniki napisać jašče zajavu ŭ milicyju na mianie, za reposty ŭ sacsietkach. Mianie sudzili i aštrafavali za raspaŭsiud ekstremisckich materyjałaŭ.
Ja tak razumieju, jon spadziavaŭsia takim čynam ad mianie pazbavicca. Kali nie spracavała, Hurleŭ pačaŭ pisać skarhi na svaju ž kliniku ŭ roznyja instancyi z patrabavańniem pravierak».
Praź ich padčas pravierak bujnych pryvatnych miedcentraŭ zavitali i ŭ maleńkuju «Kliniku A1».
Vynik — prypynieńnie dziejnaści, jakoje, vyhladaje, stała fatalnym dla ustanovy.
«Chutčej za ŭsio «Klinika A1» užo nie vyžyvie. Šmat rabotnikaŭ zvolniłasia, źjavilisia zapazyčanaści. Praź niaspłaty pastaŭščyk zabraŭ asnoŭnaje abstalavańnie.
Da taho ž Hurleŭ «pryvatyzavaŭ» sacsietki kliniki i ciapier piša tam, što «A1» pierajmienavałasia ŭ «Kliniku Huru» i pierajechała. Jak kažuć, hetaja «Klinika Huru» naležyć niejkaj novaj jurasobie, jakaja taksama afilavanaja z Uładzimiram Hurlevym.
Tamu zakryćcio našaj ustanovy palityzavać nie varta. Heta sapraŭdy vynik unutranaj vajny. Jak toj kazaŭ, dobry trest nie moža łopnuć, jon moža tolki razvalicca znutry. Tak adbyłosia i ŭ nas», — kaža Alena Šarafanovič.
«Naša Niva» źviarnułasia pa kamientar da Uładzimira Hurleva, jon admoviŭsia ad razmovy.
Kamientary