Ludziam masava piša «Pavažany Akreścina». Što adbyvajecca?

Što adbyvajecca?

Naprykancy śniežnia 2024 hoda biełarusam pačali prychodzić paviedamleńni na elektronnyja skrynki i ŭ instahram. Tam kazali — maŭlaŭ, vy padpisanyja na «ekstremistaŭ», adpišyciesia. I podpis «Pavažany, Akreścina». Dałučana taksama spasyłka na kanał z bazami akaŭntaŭ.

Pavialičyć

Usich, kaho datyčyłasia rassyłka, abjadnoŭvaje tolki adno — jany padpisanyja ŭ instahramie na staronki miedyja ci pradstaŭnikoŭ demakratyčnych siłaŭ. Instahram dazvalaje lohka źbirać źviestki z usich publičnych staronak.

Jak i ŭ vypadku z minułaj atakaj takoha kštałtu, analizavalisia tolki instahram-akaŭnty.

Jak pravodzicca rassyłka?

Ludziam pišuć z akaŭntaŭ u instahramie i elektronnych poštaŭ, śpiecyjalna stvoranych pad hetuju akcyju.

Da hetych akaŭntaŭ ničoha nie pryviazana, imiony abranyja advolna. Na sajcie, stvoranym pad mejł, pracuje tolki paštovy siervier. Mietadanych u bazach taksama niama.

Adkul źviestki ŭ tych, chto rassyłaje ich?

U vykładzienych bazach jość imia akaŭnta i jaho apisańnie, a taksama ŭsie źviestki z akaŭnta. U niekatorych vypadkach paznačany taksama telefony i mejły.

Pradstaŭniki «Kibierpartyzanaŭ» kažuć, što prostym parsinham — to-bok, skanavańniem staronak — vyciahnuć adrazu ŭsie hetyja źviestki było b niemahčyma. Jany schilajucca da dumki, što paśla parsinhu źviestki prahanialisia praź niejkuju bazu śpiecsłužbaŭ Biełarusi (u niekatorych vypadkach u akaŭntach nie paznačalisia tyja źviestki, jakija jość u vykładzienaj bazie).

Čałaviek, paznačany jak kantaktny akaŭnt u kanale z bazami, skazaŭ, što jaho meta — «papiaredzić zvyčajnych ludziej». Jon admoviŭsia raskazvać, jakim čynam zdabytyja kantaktnyja źviestki ludziej. I adznačyŭ, što jamu składana skazać, jakija jość ryzyki dla tych, chto na niešta padpisvajecca, ale «ŭ siłavych strukturach amal napeŭna jość rozumy, jakija mohuć zdabyvać jašče bolš źviestak».

My nie viedajem dakładna, jakim mienavita čynam zdabytyja telefony i mejły. Taksama my nie možam adnaznačna skazać, robiać heta śpiecsłužby abo niejki entuzijast, jaki ź imi supracoŭničaje.

Jak abaranicca?

Pa-pieršaje, kali vy pieražyvajecie za svaju biaśpieku, prahladzicie svaje padpiski i adpišyciesia ad usiaho, što moža być dla vas niebiaśpiečnym.

Pa-druhoje, zakryjcie svaju staronku ŭ instahramie — tak budzie składaniej zdabyć pra vas źviestki ŭ nastupny raz.

Taksama vy možacie stvaryć ananimnuju staronku ŭ instahramie i čytać naviny praź jaje. U takim vypadku lepš heta zrabić praz braŭzier telefona ci kampjutara — kab jaje źniščyć, budzie dastatkova pačyścić keš braŭziera. Kali vy chočacie zrabić jaje ananimnaj, to skarystajciesia pryncypami z našaha hajda.

Važna razumieć, što ŭ luboj sacsietcy bolšaść vašych dziejańniaŭ budzie dastupnaja kamu zaŭhodna. Heta ahulny pryncyp ich pracy i ŭvohule kancepcyja isnavańnia sacyjalnych sietak.

Kali vy chočacie zrabić reviziju ŭłasnaj biaśpieki, to pieračytajcie jašče raz našy hajdy, raźmieščanyja pad artykułam.

• 3
• 1
• 1
• 7
• 2
• 1
• 7
• 0