Mietearołahi nazvali taksama horad, dzie jasnych dzion było najmienš.
Statystykaj pa vynikach minułaha hoda z Office Life padzialilisia mietearołahi.
U jakim horadzie radziej za ŭsio fiksujuć sonca
Inžynier-mietearołah adździeła vyvučeńnia źmianieńniaŭ klimatu słužby mietearałahičnaha i klimatyčnaha manitorynhu, fondu danych Biełhidramieta Hanna Niedabieha źviartaje ŭvahu, što ŭ mietearołahaŭ niama paniaćcia «soniečny dzień». Ale jość — «dzień biez sonca». Heta kali na praciahu dnia adsutničali pakazańni datčyka ci nie było prapału na stužcy hielijohrafa. Takija źviestki źbirajuć 13 mieteastancyj u krainie.
Kali abapiracca stroha na hetuju infarmacyju, to samym soniečnym horadam letaś u Biełarusi byŭ Minsk. Za studzień-kastryčnik 2024 hoda ŭ stalicy było ŭsiaho 44 dni biez sonca.
U Vierchniadźvinsku ludzi pražyli 65 dzion biez sonca.
U siarednim sa studzienia pa kastryčnik 2024-ha ŭ Biełarusi mietearołahi nazirali 54 dni biez sonca.
Z časam kolkaść dzion biez sonca mienšaje. Na praciahu 1966-1990 hadoŭ u krainie nazirali ŭ siarednim pa 106 dzion biez sonca ŭ hod, a ŭžo z 1991-ha pa 2023-y — 96 dzion.
Najbolšaja praciahłaść soniečnaha źziańnia ŭ Minsku była ŭ 2019 hodzie. U toj hod sonca znachodziłasia nad haryzontam i vobłačnaściu 2031 hadzinu. Najmienšaja — u 1977 hodzie. Havorka idzie pra 1443 hadziny.
Kolki ŭ hodzie jasnych dzion?
Sa studzienia pa kastryčnik 2024 hoda ŭ Biełarusi było 88 jasnych dzion. Heta dni, jakija adnosiać da dzion nižniaj vobłačnaści. Navukovaj movaj: heta taki pieryjad, kali nad ziamloj — abłoki nižniaha jarusa ź limitavaj vyšynioj vierchniaj miažy kala 2 tysiač mietraŭ.
Bolš za ŭsio jasnych dzion za spravazdačny pieryjad 2024 hoda było na mietearałahičnaj stancyi Mazyr — 137 jasnych dzion. Mienš za ŭsio — na stancyi Barysaŭ. Havorka idzie pra 57 dzion.
Z časam kolkaść jasnych dzion raście. Za pieryjad z 1966 pa 1990 hod u Biełarusi nazirałasia 70 jasnych dzion, a z 1991 pa 2023 hod — 76.
Z 1966 pa 2023 hod bolš za ŭsio jasnych dzion było ŭ 2014 hodzie. Tady ich naličvałasia 108.
Muž Siamaški byŭ nie adzinym, chto atrymaŭ pašpart prykryćcia 13 lutaha 2018 hoda39
Kamientary
jak tam u Dizajniera ŭ tumannym Albijonie, cikava?