Hod Syrskaha. Jak vajuje ŭkrainskaja armija z hetym hałoŭnakamandujučym

Ratacyja Załužny — Syrski

Padstavaj dla zamieny hałoŭnakamandujučaha Uładzimir Zialenski nazvaŭ patrebu «abnaŭleńnia kiraŭnictva USU». Ale nieaficyjna pryčynaj ratacyi Załužny — Syrski taksama ličycca kanflikt pamiž Ofisam prezidenta i papiarednim hałoŭnakamandujučym z-za patencyjnych palityčnych ambicyj apošniaha. Jak i aktyŭnaść Załužnaha ŭ acenkach chodu vajny ŭ zachodniaj presie.

Alaksandr Syrski mienš publičny i aktyŭny ŭ zamiežnych miedyja. Zamiest hetaha jon ličycca łajalnym Viarchoŭnamu hałoŭnakamandujučamu i pazbaŭlenym palityčnych ambicyj i haryzontaŭ. Za hod Alaksandr Syrski nie rabiŭ zajavaŭ, jakija možna było b ličyć krytyčnymi ŭ dačynieńni da prezidenta i jaho Ofisa.

Što adbyvałasia na froncie

Na froncie Syrskamu dastałasia ciažkaja spadčyna — bujny nastup rasijan, jaki pačaŭsia jašče ŭ kastryčniku 2023 hoda. Jon faktyčna praciahvajecca dahetul.

Kryzis ukrainskaj abarony, vyklikany, pierš za ŭsio, pieravahaj rasijskaj armii ŭ kolkaści vojskaŭ, bojeprypasaŭ, techniki i avijacyi z KABami, pačaŭsia jašče pry kamandavańni Załužnaha. A ŭ lutym 2024 hoda, užo kali Syrski byŭ na pasadzie, ukrainskija vojski pakinuli Aŭdziejeŭku — klučavy ŭmacavany rajon kala Daniecka, jaki trymaŭsia z 2014 hoda.

Adyšoŭšy z Aŭdziejeŭki, siłam abarony, niahledziačy na zajavy Alaksandra Syrskaha ab adstupleńni na «bolš vyhadnyja rubiažy», tak i nie ŭdałosia zamacavacca na Danieckim kirunku.

Pavolnaje, ale niaspynnaje prasoŭvańnie rasijan na Danbasie praciahvałasia ŭvieś pieršy hod kiraŭnictva novaha hałoŭnakamandujučaha. Za hety čas ukrainskaja armija straciła važnyja nasielenyja punkty, takija jak Krasnahoraŭka, Vuhladar, Sialidava, Kurachava, Vialikaja Navasiołka. U toj ža čas joj udałosia, choć i nie biez prablem, spynić nastup rasijskich sił na poŭnačy Charkaŭščyny.

Na pieršuju hadavinu kamandavańnia Alaksandra Syrskaha praciahvajucca bai za Pakroŭsk, Časaŭ Jar, rajon Tarecka i Limana, a taksama na padychodach da Kupianska na Charkaŭščynie. Rasijanie nablizilisia na niekalki kiłamietraŭ da administracyjnych miežaŭ Dnieprapiatroŭskaj vobłaści.

Zrešty, jak adznačajuć vajskovyja ahladalniki, niahledziačy na terytaryjalnyja straty, ukrainski front pry Syrskim nie pasypaŭsia, nie było praryvaŭ na dziasiatki kiłamietraŭ, a prasoŭvańnie rasijskaj armii dajecca joj koštam vialikich strat.

Pa stanie na pačatak lutaha 2025-ha adznačajecca zapavoleńnie šmatmiesiačnaha nastupu rasijan.

Kurskaja apieracyja

Niahledziačy na adstupleńnie na Danbasie, Alaksandru Syrskamu na čale USU ŭdałasia nastupalnaja apieracyja na inšym učastku, jakaja ŭvojdzie ŭ sučasnuju vajennuju historyju na ŭzroŭni z nastupleńniem na Charkaŭščynie ŭ 2022-m.

U pačatku žniŭnia 2024 hoda šturmavyja hrupy ŭkrainskich desantnikaŭ prarvali miažu Rasii ŭ Kurskaj vobłaści i praź niekalki dzion zaniali rajcentr Sudža. Ukraina tady zmahła ŭziać pad kantrol bolš za 1 000 kvadratnych kiłamietraŭ rasijskaj terytoryi.

Pośpiech pieršaha etapu Kurskaj apieracyi tłumačać niekalkimi faktarami.

Pa-pieršaje, USU zmahli nieprykmietna skancentravać udarnuju hrupu, što ŭ ciapierašnich umovach spadarožnikavaj raźviedki źjaŭlajecca klučavoj i vielmi niaprostaj zadačaj.

Pa-druhoje, u nastupie zadziejničali vopytnyja i bajazdolnyja padraździaleńni, takija jak, naprykład, 95-ja ci 80-ja desantna-šturmavyja bryhady.

Pa-treciaje, rasijanie nie zmahli arhanizavać na miažy nadziejnuju abaronu i časta ŭkrainskim šturmavikam supraćstajali rasijskija sałdaty terminovaj słužby.

«Nie było vybaru, ja pavinien byŭ pravieści hetuju apieracyju. Pavinien byŭ adnačasova sarvać nastup na Charkaŭ, źniać častku cisku na ŭsich frantach i nie dapuścić adkryćcia novaha frontu na Sumy. Tamu ja navažyŭsia vieści nastup tam, dzie vorah mieŭ słaboje miesca, ź vielmi małoj kolkaściu sałdat dla achovy miažy», — tłumačyŭ paśla Alaksandr Syrski ŭ intervju Le Monde.

U śviatle ŭsio bolš vierahodnych pieramoŭ z Maskvoj utrymańnie Kurskaha płacdarma maje i całkam vidavočny palityčny składnik.

U vieraśni rasijanie pačali kontrnastupleńnie ŭ Kurskaj vobłaści, im udałosia adbić značnuju častku stračanaha. Ale pad kantrolem USU zastajucca kala 500 kvadratnych kiłamietraŭ Kurskaj vobłaści, uklučajučy Sudžu.

6 lutaha stała viadoma pra łakalnaje kontrnastupleńnie ŭkrainskich sił na Kurščynie pablizu viosak Ułanak i Čarkaskaja Kanapielka. Tak što situacyja tam zastajecca dynamičnaj.

Paralelna Alaksandra Syrskaha i krytykujuć za Kurskuju apieracyju-z-za adciahvańnia tudy bajazdolnych sił, jakija mahli b, jak miarkujecca, dapamahčy abaraniać Danieččynu. A taksama za toje, što ciapier kala Sumščyny skancentravanaja vialikaja hrupoŭka rasijan. Zrešty, adciahvać siły tudy vidavočna davodzicca i rasijanam (i navat pryciahvać paŭnočnakarejskuju padmohu).

Pavialičyć

Što havorać pra Syrskaha

Na pasadzie hałoŭnakamandujučaha Syrskaha paprakajuć za «kryvavuju abaronu» i nibyta admovu advodzić padraździaleńni, jakim pahražaje akružeńnie, a taksama za «vajenny mikramieniedžmient».

Vajenkar i hałoŭny redaktar vydańnia «Cenzar.Niet» Juryj Butusaŭ, naprykład, zakidaje Alaksandru Syrskamu zahady na apieratyŭnym uzroŭni, «praz hałavu» niepasrednych kamandziraŭ bryhad i bataljonaŭ na miescach.

I abvinavačvaje hałaŭkama, «jaki stavić zadaču ŭ ručnym režymie i nie zdolny arhanizavać płanavy praces arhanizacyi, padrychtoŭki i prymianieńnia reziervaŭ» u situacyi sa 155-j bryhadaj, u dačynieńni da jakoj źjavilisia danyja ab niebajazdolnaści adrazu paśla farmiravańnia.

U toj ža čas inšyja ahladalniki adznačajuć, što Alaksandru Syrskamu davodzicca dziejničać va ŭmovach resursnaj pieravahi rasijskaj armii i prablem z mabilizacyjaj, jakaja nie źjaŭlajecca pramoj zonaj adkaznaści hałoŭnakamandujučaha.

«U Syrskaha, u hałoŭnakamandujučaha, ničoha niama jak takoha: u jaho niama ni resursaŭ, ni hrošaj, ni reziervaŭ. Chtości pavinien jamu hetyja reziervy zrabić. Heta čałaviečy resurs, finansavy resurs, ekanamičny i ŭsie inšyja sacyjalnyja faktary, jakija jamu patrebnyja dla vykanańnia pracy», — tłumačyŭ u intervju Bi-bi-si hienierał-major Viktar Nazaraŭ.

Pavodle jaho słoŭ, Ukraina trymajecca niahledziačy na niedachop resursaŭ:

«Kali kažuć, što ŭ nas «katastrofa na froncie» — nu, zrazumieła, my adstupajem, my adychodzim i heta abjektyŭnyja faktary… Ale mahło być i horš».

«Navat kali b na miescy Alaksandra Stanisłavaviča byŭ by ciapier jaki-niebudź samy daśviedčany, samy viadomy, samy pieradavy luby nataŭski hienierał — ja vas zapeŭnivaju, lepš by nie stała», — upeŭnieny hienierał Nazaraŭ.

A hałoŭnakamandujučy USU časoŭ Piatra Parašenki Viktar Muženka tak paraŭnoŭvaŭ Syrskaha i Załužnaha:

«Jak pa mnie, Syrski prafiesijna padrychtavany lepš, čym Załužny. Pa-druhoje, u Syrskaha vyšejšy vopyt vajskovaha kiravańnia, arhanizacyi pracesaŭ i płanavańnia, čym u Załužnaha. Pa-treciaje, Syrski zdolny brać na siabie adkaznaść za svaje płany i dziejańni».

U toj ža čas Muženka krytykavaŭ Syrskaha za schilnaść pryznačać na pasady pa pryncypie: «Kali pasłuchmiany — značyć svoj». Na dumku eks-kiraŭnika, heta ŭpłyvaje na efiektyŭnaść kadraŭ na roznych uzroŭniach i stratu vopytnych kamandziraŭ.

Ciapier ža Alaksandr Syrski abjaviŭ pra pačatak pierachodu USU na novuju strukturu z farmiravańniem vajskovych karpusoŭ. Patencyjna heta stratehičnaja reforma, jakaja moža palepšyć arhanizacyju dziejańniaŭ vojskaŭ na froncie i likvidavać ci chacia b pamienšyć prablemy, nakštałt niaŭzhodnienaści dziejańniaŭ bryhad, prymianieńnia niebajazdolnych padraździaleńniaŭ na składanych učastkach abo vialikich strat u prydadzienych padraździaleńniach bryhad.

Efiektyŭnaść hetaj reformy šmat u čym budzie zaležać mienavita ad dziejańniaŭ i rašeńniaŭ Alaksandra Syrskaha.

• 7
• 1
• 0
• 0
• 1
• 1
• 0
• 3