Biełarusy mohuć zabaranić sabie brać kredyty — jak heta pracuje
Machlary spačatku prymušajuć ludziej afarmlać bankaŭskija pazyki, a potym zabirajuć u ich hrošy. Kab paźbiehnuć padmanu i finansavaj pastki, važna pamiatać adnu prostuju reč, piša Tochka.by.
Bankaŭskija rabotniki i supracoŭniki pravaachoŭnych orhanaŭ nikoli nie telefanujuć ludziam, asabliva z zamiežnych numaroŭ abo ŭ Viber, z prapanovaj, patrabavańniem ci pahrozaj uziać kredyt. Tym bolš aformić jaho terminova, i nie adzin, a niekalki.
Adnak pakolki pamiać moža padvieści luboha čałavieka, asabliva ŭ stresavych situacyjach, lepš dziejničać napierad.
Naprykład, čałaviek moža zabaranić sabie brać pazyki. Pryncyp hetaha padobny da samabłakavańnia ad naviedvańnia ihralnych ustanoŭ.
Navat kali takaja zabarona — zakonnaja i technična prostaja — nie spracuje na 100%, jana ŭskładnić žyćcio machlaram i nie daść im tak lohka dabracca da vašaha kašalka.
Jak pracuje samazabarona na kredyty
Kožny dziejazdolny paŭnaletni biełarus maje mahčymaść abmiežavać siabie ŭ atrymańni pazyk.
Tak, padobnaja błakiroŭka dziejničaje ŭ Biełarusbanku dla klijentaŭ hetaj finansavaj arhanizacyi. Robicca jana mienavita «z metaj minimizacyi machlarskich dziejańniaŭ i vyklučeńnia vierahodnaści afarmleńnia kredytaŭ trecimi asobami».
Pa žadańni klijenta bank zabłakuje jamu padaču zajaŭki na afarmleńnie pazyki i zaklučeńnie kredytnaj damovy.
Jak ustalavać samazabaronu na kredyty
Błakiroŭka budzie dastupnaja, kali hramadzianin padaść zajavu.
Zrabić heta možna ŭ adździaleńni finansavaj arhanizacyi abo praź internet — pa kanałach dystancyjnaha bankaŭskaha absłuhoŭvańnia (DBA).
U zhadanym Biełarusbanku samazabaronu možna aformić i ŭ mabilnym bankinhu. Dla hetaha treba adkryć dadatak banka na telefonie i pierajści pa ŭkładkach:
«Finansy» — «Kredyty» — «Zamović daviedku» — «Spažyvieckija kredyty».
U apošnim raździele vybirajcie «Zajavu na błakiroŭku apieracyj afarmleńnia kredytu».
Tut dastupnyja dva varyjanty:
častkovaja błakiroŭka — jana raspaŭsiudžvajecca na afarmleńnie zajaŭki i zaklučeńnie dahavora praz DBA.
poŭnaja błakiroŭka — jana dziejničaje jak dla zajaŭ na kredyt, padadzienych dystancyjna, tak i dla tych, što afarmlajucca ŭ adździaleńniach banka.
Važnyja detali samazabarony na kredyty
Banki afarmlajuć błakiroŭku tolki pa kredytach na spažyvieckija patreby i avierdraftach.
Dla inšych vidaŭ pazyk zrabić heta niemahčyma.
Kali klijent pažadaje admianić dziejańnie samazabarony, padać zajavu na jaje adklikańnie možna tolki niepasredna ŭ adździaleńni banka.
Heta taksama robicca dla minimizacyi machlarskich dziejańniaŭ.
Kamientary