Apazicyja, jakaja pieramahła ŭ Sierbii, nie źbirajecca ŭvodzić sankcyi suprać Rasii

Pa słovach Jova Bakiča, z ulikam nievialikich pamieraŭ Sierbii sankcyi ničoha b nie źmianili, ale mieli b vielmi niehatyŭnaje simvaličnaje značeńnie. Jon padkreśliŭ, što jahony błok pavažaje Rasiju jak vialikuju dziaržavu, histaryčna važnaha partniora, a ŭ mnohich vypadkach i abaroncu Sierbii. Pavodle jaho słoŭ, u hetym pytańni źmienaŭ nie budzie.

Taksama Bakič zajaviŭ, što Sierbija nie źbirajecca admaŭlacca ad rasijskaha hazu, niahledziačy na cisk Jeŭrasajuza. Jon adznačyŭ, što novyja ŭłady majuć namier dziejničać u nacyjanalnych intaresach krainy, a nie dahadžać zamiežnym dziaržavam. U «Studenckim śpisie» jość śpiecyjalisty ŭ halinie enierhietyki, jakija buduć zajmacca hetym pytańniem.

Raniej były prezident Sierbii Alaksandr Vučyč, jaki prajhraŭ vybary, śćviardžaŭ, što ŭ vypadku pieramohi apazicyja ŭviadzie sankcyi suprać Rasii ŭžo ŭ sakaviku — krasaviku 2027 hoda. Adnak jašče da hałasavańnia pradstaŭniki apazicyjnaha ruchu zajaŭlali, što nie płanujuć hetaha rabić.

U prahramie «Studenckaha śpisu» asnoŭnaja ŭvaha nadajecca reformam Ministerstva ŭnutranych spraŭ i sistemy adukacyi, baraćbie z karupcyjaj, praviercy pachodžańnia majomaści čynoŭnikaŭ i zabieśpiačeńniu svabody srodkaŭ masavaj infarmacyi. Pytańnie ab ustupleńni Sierbii ŭ Jeŭrasajuz prapanujecca vynieści na refierendum.

Daterminovyja parłamienckija vybary adbylisia 25 kastryčnika. Alaksandr Vučyč, jaki skłaŭ prezidenckija paŭnamoctvy ŭ kancy vieraśnia, raźličvaŭ na pieramohu i namiervaŭsia ŭznačalić urad. Pavodle papiarednich źviestak Ipsos/CeSID, jaho błok «Abjadnanaja Sierbija» atrymaŭ 38,8% hałasoŭ, a «Studencki śpis» — 53%.

Apošni moža atrymać 141 miesca sa 250 u parłamiencie, što dazvolić jamu samastojna sfarmavać urad. Vučyč pryznaŭ parazu i abvinavaciŭ u joj «hłybinnuju dziaržavu» ZŠA, a taksama siły ŭ Jeŭrasajuzie, jakija vystupajuć suprać amierykanskaha prezidenta Donalda Trampa.

U Kramli, kamientujučy vyniki vybaraŭ, zajavili, što raźličvajuć i nadalej raźvivać adnosiny ź Sierbijaj, niahledziačy na parazu svajho sajuźnika Vučyča. Pres-sakratar prezidenta Rasii Dźmitryj Piaskoŭ, adnak, dadaŭ, što dla tanha patrebnyja dvoje.

«Studencki śpis» — heta błok, stvorany aktyvistami abjadnańnia «Studenty ŭ błakadzie». Jano ŭźnikła padčas masavych pratestaŭ 2024 hoda, jakija pačalisia paśla abvalvańnia naviesa na rekanstrujavanym čyhunačnym vakzale ŭ horadzie Novi Sad. Tady zahinuli 16 čałaviek.

• 1
• 0
• 1
• 5
• 1
• 0
• 0
• 0