Bresckija pamiežniki nie prapuścili biez čarhi invalida z Rasii — byłoha pres-sakratara palicyi Inhušecii. Jon aburany

Jaŭłojeŭ pa nacyjanalnaści inhuš, raniej jon pracavaŭ pres-sakratarom ministra ŭnutranych spraŭ Inhušecii — respubliki ŭ składzie Rasii. 

Invalidnaść pieršaj hrupy jon atrymaŭ u 2008-m — pad dno jaho mašyny padkłali bombu. Paranienaha mužčynu advieźli ŭ balnicu, jamu daviałosia amputavać levuju nahu. Aproč taho, jamu vydalili bolš za 5 kiłahramaŭ kišačnika, na žyvacie ŭ jaho ŭžo 11 hadoŭ kałastoma.

Na bresckim pierachodzie Jaŭłojeŭ zvyčajna prajazdžaŭ biez čarhi pa rasijskim paśviedčańni invalida (ale ŭ jaho jość i paśviedčańnie, jakoje vydała Hiermanija). Heta sapraŭdy mahčyma dla zamiežnikaŭ z dakumientami, u jakich paćviardžajecca, što čałaviek maje 75-100% abmiežavańnia žyćciadziejnaści praź fizičny stan — u niekatorych krainach hetyja pracenty pišuć u daviedkach pa invalidnaści.

U rasijskim paśviedčańni, jakoje maje Jaŭłojeŭ, prapisanaja tolki pieršaja hrupa invalidnaści, biez pracentaŭ. Pa biełaruskim zakonie, kab ciabie prapuścili biez čarhi ź pieršaj hrupaj, treba, kab hrupa była prapisanaja mienavita ŭ paśviedčańni, jakoje vydali biełaruskija ŭłady. Vyhladaje, adnak, što pamiežniki zaŭždy stavilisia da Jaŭłojeva z razumieńniem, tamu dazvalali jamu prajechać pa rasijskim paśviedčańni.

U hety raz, kali mužčyna jechaŭ ź Biełarusi ŭ Polšču, nie abyšłosia biez prablem:

«Padjazdžaju tudy. Jany zabirajuć u mianie hety dakumient, pajšli z kimści razmaŭlać. Potym padychodzić [pamiežnik] i kaža — maŭlaŭ, treba, kab invalidnaść była ad 75 da 100 pracentaŭ. [Ale] ŭ rasijskich paśviedčańniach nie staviacca pracenty, tam stavicca hrupa».

Pamiežniki skazali Naziru, što treba pierakłaści paśviedčańnie na ruskuju ci biełaruskuju movu, ale jon adznačyŭ, što jano i tak vydadzienaje na ruskaj movie. Tady jamu adkazali, što jechać biez čarhi jon nie maje prava, i adpravili ŭ ahulnuju čarhu — maŭlaŭ, budziecie stajać sutki.

Jaŭłojeŭ zapisaŭ tyktok amal na 115 tysiač prahladaŭ, dzie raskazaŭ pra hetuju historyju. Jon źviarnuŭsia da Łukašenki i «kampietentnych orhanaŭ». Pavodle słoŭ mužčyny, pamiežniki skazali jamu pierakłaści na ruskuju ci biełaruskuju movu jaho niamieckaje paśviedčańnie invalida i zaśviedčyć jaho nataryjalna, bo ŭ tym dakumiencie prapisanyja tyja samyja 100% straty zdaroŭja.

Paśla nočy na pamiežnym punkcie Jaŭłojeŭ usio ž vyrašyŭ pierakładać paśviedčańnie, dla hetaha jon znajšoŭ nataryusa praź internet. A jašče Nazir pazvaniŭ u pamiežny kamitet, dzie jamu i raskazali, što jamu jašče raz patłumačyli: jon jak zamiežnik moža prajechać biez čarhi tolki z paśviedčańniem, dzie prapisanyja tyja samyja pracenty.

Svajo abureńnie mužčyna vykazaŭ u novym tyktoku:

«A kali b u mianie nie było hetaha dakumienta? Voś nie isnavała b toj invalidnaści, jakaja ŭ mianie jość z boku Hiermanii, što tady rabić? Niejki nonsens».

Pa pierakładzienym paśviedčańni Jaŭłojeva prapuścili biez čarhi.

• 5
• 0
• 19
• 0
• 1
• 0
• 2
• 0