U Japonii pakarali śmierciu «zabojcu z tvitara». Jaho advakaty nastojvali, što jon prosta «dapamahaŭ» dziaŭčatam, jakija chacieli pamierci

Pra zabojstvy stała viadoma ŭ kastryčniku 2017 hoda, kali palicyja znajšła častki cieła ŭ horadzie Nama, niedaloka ad Tokia.

Znajści začepki palicyi dapamoh brat adnoj sa źnikłych dziaŭčat. Jamu ŭdałosia zajści ŭ tvitar-akaŭnt siastry. U asabistych paviedamleńniach jon znajšoŭ pierapisku ź nieviadomym čałaviekam, jaki prapanoŭvaŭ dziaŭčynie sustrecca i vykanać jaje žadańnie.

U hety ž čas palicyi narešcie ŭdałosia adsačyć šlach hetaj 23-hadovaj dziaŭčyny pa kamierach nazirańnia na vulicach.

Rasśledavańnie pryviało ich da nieprykmietnaha dvuchpaviarchovaha doma, jaki ničym nie adroźnivaŭsia ad takich ža adnolkavych damoŭ u hetym rajonie. Paźniej u ŚMI jaho achryścili «domam žachaŭ».

Dźviery adčyniŭ mužčyna, i palicyjanty adrazu adčuli niepryjemny pach. Jany znajšli dzieviać rasčlanionych ciełaŭ, schavanych u ladoŭniach i skryniach ź instrumientami. Źvierchu zabojca prysypaŭ astanki napaŭnialnikam dla kacinaha tualeta — kab mienš pachła.

Paźniej Siraisi pryznaŭsia ŭ zabojstvie dzieviaci čałaviek z suicydalnymi namierami i raspavioŭ, što paznajomiŭsia ź imi ŭ tvitary. Jon kazaŭ achviaram, što moža dapamahčy im pamierci, a ŭ niekatorych vypadkach śćviardžaŭ, što skončyć z saboj razam ź imi.

U jaho profili ŭ sacyjalnaj sietcy byli takija słovy: «Ja chaču dapamahčy ludziam, jakim sapraŭdy baluča. Kali łaska, pišycie mnie asabistaje paviedamleńnie ŭ luby čas».

Ci zabiŭ Siraisi achviar ź ich zhody, było hałoŭnym pradmietam roznahałośsiaŭ u sudzie. Prakurory patrabavali dla jaho śmiarotnaha pakarańnia, a advakaty prasili bolš miakkaje pakarańnie, śćviardžajučy, što jaho achviary dali svaju zhodu na zabojstva. Jany patrabavali taksama pravieści acenku jaho psichičnaha stanu.

Paźniej Siraisi abvierh viersiju padziej, pradstaŭlenuju jaho ŭłasnaj abaronaj, i zajaviŭ, što zabivaŭ achviar bieź ich zhody. Heta ž paćvierdziła i ekśpiertyza: na niekatorych ciełach byli vyjaŭlenyja ślady viaroŭki, nakinutaj zzadu, što dakazvaje, što achviary supraciŭlalisia.

Na abviaščeńnie prysudu ŭ śniežni 2020 hoda pryjšli sotni čałaviek — tady jaho prysudzili da śmiarotnaha pakarańnia.

Vosiem ź dzieviaci achviar «zabojcy z tvitara» byli maładymi žančynami va ŭzroście ad 16 da 26 hadoŭ.

Adnoj ź ich była 21-hadovaja Midzuki Miura z maleńkaha horada za 50 km ad Tokia. 22 žniŭnia 2017 hoda jana pierastała adkazvać na paviedamleńni i zvanki. U toj ža dzień baćki dziaŭčyny znajšli ŭ kvatery zapisku ad dački. Midzuki pisała, što źjazdžaje, bo choča pačać žyć asobna.

Jaje bojfrend Sioha Nisinake vyśvietliŭ: apošnim, chto bačyŭ Mizuki, byŭ jaje pryjaciel, ź jakim jana paznajomiłasia ŭ internecie.

Sioha adnojčy mimachodam bačyŭ Takachira, ale mała što pra jaho viedaŭ. 30 žniŭnia Sioha napisaŭ Takachira i paviedamiŭ ab źniknieńni svajoj dziaŭčyny. Takachira ŭ adkaz paabiacaŭ raskazać usio, što pamiataje pra svaju apošniuju sustreču ź Midzuki, i zaprasiŭ da siabie dadomu, u susiedni haradok Dzama. Paśla jaje nichto nie bačyŭ.

Palicyja vyśvietliła, što niekatoryja dziaŭčaty da svajho źniknieńnia dzialilisia ŭ tvitary dumkami pra suicyd.

Baćka adnoj ź źnikłych kateharyčna adprečvaŭ mahčymaść taho, što jaho dačka mahła pakončyć z saboj. Jon zapeŭnivaŭ, što ŭ 17-hadovaj dački była nasyčanaja vučoba, a ŭvieś volny čas dziaŭčyna malavała, tamu što ŭ budučyni maryła stać mastačkaj komiksaŭ manha. Nie zaŭvažali suicydalnych schilnaściaŭ u dački i baćki Midzuki Miury. Palicyja, vyvučyŭšy sacsietki źnikłych, pryjšła da procilehłaj vysnovy.

U 2017 hodzie Siraisi było 27 hadoŭ. Bolšuju častku žyćcia jon pražyŭ z baćkam i siastroj. U niejki momant jon pierajechaŭ u Tokia, dzie znajšoŭ pracu: farmalna jon pavinien byŭ dapamahać maładym žančynam šukać pracu, a nasamreč zabiaśpiečvaŭ bardeli novymi rabotnicami. Palicyja daŭno cikaviłasia hetaj firmaj, a ŭ 2016 zaviaršyła rasśledavańnie. Kampaniju likvidavali, jaje rabotnikaŭ sudzili.

Siraisi dali ŭmoŭny termin. Paśla hetaha niekalki miesiacaŭ jon sprabavaŭ znajści novuju pracu, ale ŭsiudy atrymlivaŭ admovu praz sudzimaść. Straciŭšy nadzieju, jon vyrašyŭ viarnucca ŭ rodny horad Dzamu, dzie źniaŭ kvateru.

Baćka Siraisi paźniej raspaviadaŭ, što syn, zastaŭšysia biez pracy i raźvitaŭšysia sa svajoj dziaŭčynaj, pryznavaŭsia: «Ja nie viedaju, navošta mnie žyć». Nieŭzabavie jon stvaryŭ toj samy akaŭnt u tvitary.

Jon znachodziŭ dziaŭčat, jakija adkryta pisali pra biessensoŭnaść svajho žyćcia, ustupaŭ ź imi ŭ pierapisku, praź niejki čas zaprašaŭ dziaŭčat da siabie ŭ hości, źviazvaŭ ich kabielem, hvałtavaŭ i dušyŭ, a potym zabiraŭ usie hrošy, jakija znachodziŭ u ich. Niekatorych ź ich jon paiŭ snatvornym. Hetaha, jaki pryjechaŭ da jaho ŭ pošukach svajoj dziaŭčyny, jon padmiašaŭ snatvornaje ŭ napoj.

Paśla aryštu Siraisi daktary amal paŭhoda pravodzili psichijatryčnuju ekśpiertyzu i pryjšli da vysnovy, što jon byŭ pry śviadomaści.

Prablema suicydaŭ u Japonii

Suicyd užo šmat hadoŭ źjaŭlajecca adnoj z asnoŭnych pryčyn śmierci maładych japoncaŭ. Prablema staić nastolki vostra, što ŭ 2005 hodzie ŭłady krainy stvaryli štab pa papiaredžańni samahubstvaŭ. Jak piša Nippon.com, u 2024 hodzie z saboj pakončyli 20 268 čałaviek, 527 ź ich byli školnaha ŭzrostu, i heta samy vysoki pakazčyk z momantu pačatku ŭliku ŭ 1980 hodzie. Kaeficyjent samahubstvaŭ, heta značyć kolkaść samahubstvaŭ na 100 000 čałaviek, skłaŭ 16,3.

Niaredka ludzi pišuć pra svaje suicydalnych dumkach u internecie. Ułady viedajuć pra hety fienomien — japoncy šukajuć u sietcy adnadumcaŭ i damaŭlajucca pra datu i čas.

Zabojstva Siraisi zaachvocili Twitter źmianić svaje praviły, dadaŭšy punkt ab tym, što karystalnikam zabaroniena «prasoŭvać abo zaachvočvać samahubstva abo samapaškodžańnia».

• 0
• 0
• 0
• 0
• 3
• 1
• 1
• 0