Były prezident Małdovy maryć paśla vybaraŭ adnavić adnosiny z Łukašenkam
Lidar prarasijskich sacyjalistaŭ Małdovy, były prezident hetaj krainy Ihar Dadon paśla vizitu ŭ Maskvu naviedaŭ i Minsk, dzie 12 lipienia sustreŭsia z Alaksandram Łukašenkam. Jon paabiacaŭ, što ŭ vypadku pieramohi na chutkich vybarach u Małdovie vyviedzie adnosiny pamiž dźviuma krainami na «novy ŭzrovień».
Pavodle Ihara Dadona, u apošnija try hady tavaraabarot pamiž Małdovaj i Biełaruśsiu źniziŭsia, ale jość usie šancy dla jaho rostu. Jon adznačyŭ, što paśla pieramohi na parłamienckich vybarach płanuje źniać pieraškody dla ŭzajemnaha handlu, adnavić pracu mižuradavaj kamisii, arhanizoŭvać biznes-forumy i realizoŭvać sumiesnyja prajekty ź biełaruskimi kampanijami.
Dadon nazvaŭ Biełaruś «nadziejnym i pradkazalnym partnioram» i vykazaŭ pierakanańnie, što «z prychodam adkaznych palitykaŭ da ŭłady» adnosiny pamiž krainami palepšacca.
Raniej, 10 lipienia, Dadon pabyvaŭ u Maskvie, dzie sustreŭsia z namieśnikam kiraŭnika ŭrada Rasii Alaksandram Novakam. Jany abmiarkoŭvali mahčymaść adnavić pramyja pastaŭki rasijskaha hazu ŭ Małdovu — «paśla źmieny ŭłady» na vybarach.
Taksama stała viadoma, što Dadon viadzie pieramovy pra stvareńnie levaha palityčnaha błoka napiaredadni parłamienckich vybaraŭ.
Ciapier čytajuć
Jak žyvie prosty minski zvarščyk, jaki vyjhraŭ try miljony rubloŭ1
Kamientary
[Zredahavana]