U ZŠA aryštavali žančynu, jakaja prykidvałasia miedsiastroj. Jana akazała dapamohu tysiačam pacyjentaŭ
Žycharka horada Pałm-Kost u Fłarydzie vydavała siabie za dypłamavanuju miedsiastru i paŭhoda prapracavała ŭ balnicy pa padroblenych dakumientach. Za hety čas jana akazała dapamohu bolš za 4000 pacyjentam. Padman vykryli, kali joj prapanavali pavyšeńnie i vyrašyli pravieryć licenziju, piša Bi-bi-si.
«Hetaja žančyna mahła pastavić pad pahrozu žyćci tysiač ludziej, bo prykidvałasia tym, kim nie źjaŭlajecca, i padarvała davier pacyjentaŭ, ich siemjaŭ i ŭsioj miedycynskaj sistemy», — zajaviŭ šeryf akruhi Fłahler Ryk Stejli.
Jon nazvaŭ heta adnoj z samych tryvožnych spraŭ ab miedycynskim machlarstvie z tych, što jamu z kalehami davodziłasia rasśledavać.
Jak paviedamlaje ofis šeryfa, 29-hadovaja Otem Bardzisa ŭładkavałasia na pracu ŭ balnicu AdventHealth Palm Coast Parkway ŭ pačatku lipienia 2023 hoda. Jaje ŭziali na pasadu advanced nurse technician — heta niešta nakštałt sanitarki z kvalifikacyjaj miedsiastry, jakaja moža pracavać tolki pad nahladam licenzavanaj miedsiastry.
Padčas pryjomu na pracu Bardzisa skazała, što źjaŭlajecca miedsiastroj katehoryi education first, heta značyć skončyła vučobu, ale jašče nie zdała nacyjanalny ekzamien dla atrymańnia licenzii. Paźniej jana paviedamiła, što zdała ekzamien, i padała numar licenzii, jaki supadaŭ ź licenzijaj inšaj miedsiastry pa imieni Atem, ale ź inšym proźviščam. Jana pasprabavała rastłumačyć razychodžańnie tym, što niadaŭna vyjšła zamuž i źmianiła proźvišča. Jaje paprasili dać paśviedčańnie ab šlubie, čaho jana tak i nie zrabiła.
U studzieni 2025 hoda žančynie prapanavali pavyšeńnie. Adzin z supracoŭnikaŭ vyrašyŭ pravieryć status jaje licenzii i vyjaviŭ, što Bardzis mieła tolki praterminavanuju licenziju pamočnika miedsiastry. Jon paviedamiŭ pra heta kiraŭnictvu.
Pačałosia ŭnutranaje rasśledavańnie, i vyśvietliłasia, što «miedsiastra» tak i nie padała dakumienty, jakija paćviardžajuć jaje asobu. 22 studzienia jana była vyzvalena, i balnica AdventHealth źviarnułasia ŭ ofis šeryfa.
Na pasadzie miedsiastry Bardzisa prapracavała z červienia 2024-ha pa studzień 2025 hoda, pradastaviŭšy za hety čas miedycynskija pasłuhi 4 486 pacyjentam. Rasśledavańnie doŭžyłasia siem miesiacaŭ. Supracoŭniki palicyi, Departamienta achovy zdaroŭja Fłarydy i Ministerstva achovy zdaroŭja ZŠA vyvučali dakumienty, apytvali supracoŭnikaŭ AdventHealth i sapraŭdnuju miedsiastru pa imi Atem, licenzijaj jakoj skarystałasia Bardzisa. Jak vyśvietliłasia, jany vučylisia ŭ adnoj navučalnaj ustanovie, ale asabista nie byli znajomyja.
5 žniŭnia 2025 hoda vydali ordar na aryšt na padstavie siami epizodaŭ niezakonnaj miedycynskaj praktyki i siami vypadkaŭ ašukanskaha vykarystańnia piersanalnych danych. Psieŭdamiedsiastru zatrymali pa miescy žycharstva i adpravili ŭ izalatar.
Palicyja stvaryła admysłovy elektronny adras — [email protected] — dla tych, chto padazraje, što moh być pacyjentam Bardzisy.
Kamientary