Na Tydni mody ŭ Paryžy madeli vyjšli ŭ kaściumach hołaha mužčynskaha cieła
Novy kreatyŭny dyrektar viadomaha doma mody Jean Paul Gaultier, zdajecca, vyrašyŭ pajści šlacham maksimalnaj pravakacyi. Na Tydni mody ŭ Paryžy jon pradstaviŭ svajo bačańnie siezona viasna-leta 2026, i jano, miakka kažučy, ździviła publiku.
Čakańni ad viartańnia brenda byli vysokija, zaŭvažaje The New York Times.
Sam Žan-Pol Haćje ŭ svoj čas staŭ lehiendaj — jon apranaŭ śpiavačku Madonnu ŭ znakamity biusthaltar-kulu, vypuskaŭ na podyum mužčyn u spadnicach zadoŭha da taho, jak hiendarnaja identyčnaść pierastała ličycca niečym statyčnym, i ściraŭ miežy pamiž vysokaj modaj i kitčam.
Svaje pravakacyi jon padmacoŭvaŭ hłybokim sensam i nievierahodnym kravieckim majsterstvam, što dazvalała paraŭnoŭvać jaho z samim Ivam Sen-Łaranam.
Paśla sychodu maestra ŭ 2020 hodzie modny dom zaprašaŭ roznych dyzajnieraŭ dla stvareńnia adzinkavych kalekcyj. Ale ciapier u brenda źjaviŭsia pieršy pastajanny kreatyŭny dyrektar — Dziuran Łancink, viadomy svaim buntarskim ducham.
Kalekcyja: aholenaść i rejv
Svaju debiutnuju kalekcyju Łancink nazvaŭ «Junior» — u honar spartyŭnaj linii Haćje, zapuščanaj u 1988 hodzie, kab pryciahnuć maładuju aŭdytoryju.
Jak adznačaje The Business of Fashion, suviaź Łancinka z brendam hłybiejšaja, čym moža padacca. Jon naradziŭsia ŭ tym ža 1988 hodzie, kali źjaviłasia linija «Junior». Jaho baćki byli častkaj modnaj tusoŭki Amsterdama i zaŭsiodnikami lehiendarnaha kłuba RoXY.
Adnak zamiest tonkaj sacyjalnaj krytyki, jakoj słaviŭsia Haćje, u svajoj kalekcyi Łancink zrabiŭ staŭku na čysty epataž. Uvahu ŭsich pryciahnuli bodzi z hipierrealistyčnym pryntam aholenaha mužčynskaha cieła — z usimi anatamičnymi detalami i vałasami.
Ale nie tolki heta možna było ŭbačyć na podyumie.
Niekatoryja vobrazy abjadnali lehiendarny konusny biusthaltar Haćje i charakternyja dla Łancinka abjomnyja, skulpturnyja formy.
Inšyja kaściumy nahadvali parezanyja hidrakaściumy, dzie adzieńnie składałasia ź nievialikich naplečnikaŭ, złučanych tonkimi pałoskami tkaniny.
Byli i skuranyja bodzi z abjomnymi plačyma i ekstremalna vysokimi vyrazami ŭ styli aerobiki 80-ch.
Sukienki nibyta kidali vyklik hravitacyi, prykryvajučy tolki hrudzi i ściohny.
Jak adznačyli modnyja ahladalniki, u kalekcyi było vielmi mała taho, što možna nazvać paŭnavartasnym adzieńniem, za vyklučeńniem niekalkich ukaročanych bombieraŭ i štanoŭ ź nizkaj pasadkaj.
Što kaža sam dyzajnier?
Pierad pakazam dyzajnier raskazaŭ, što naŭmysna nie zaziraŭ u archivy brenda. Zamiest hetaha jon stvaryŭ «fantaziju z usich uspaminaŭ pra Haćje, pieraasensavaŭšy ich dla siońniašniaha dnia». Za kulisami paśla pakazu Łancink rastłumačyŭ svaju zadumu. Pavodle jaho słoŭ, jon natchniaŭsia atmaśfieraj rejvaŭ i nie imknuŭsia ŭkładvać u vobrazy hłyboki kanceptualny sens.
«Nieabaviazkova, kab my dumali: «O, za hetaj vyhnutaj štukaj staić niejkaja kancepcyja», — skazaŭ jon. — U rešcie rešt, ja dumaju, što ŭ hetym pracesie sapraŭdy važna toje, što my starajemsia być vielmi hullivymi. Žan-Pol Haćje — heta ŭsio pra aholenaść, seksualnaść i pravakacyju».
Niekatoryja krytyki z hetym nie pahadzilisia. Tak, The New York Times adznačyła, što pravakacyja dziela samoj pravakacyi vyhladaje prosta infantylna.
A voś ahladalnik Vogue Chase Kryales-Unsueta nazvaŭ kalekcyju «zachaplalnym daśledavańniem hiendaru — adkrytym, hučnym, rezkim i aktualnym».
Ciapier čytajuć
Dziadok patłumačyŭ, čamu vyzvalili mienavita tych palitviaźniaŭ, kaho vyzvalili31
Kamientary
Dvudušniki, złości na vas niama.