Tramp vyrašyŭ nie ŭvodzić pošliny za Hrenłandyju i zajaviŭ, što ździełka nakont vostrava sfarmulavanaja

Prezident ZŠA Donald Tramp, jaki raniej abiacaŭ pakarać jeŭrapiejcaŭ dadatkovymi pošlinami za abaronu Hrenłandyi, u sieradu abviaściŭ, što pakul nie budzie ich uvodzić. Hetuju zajavu Tramp zrabiŭ u svajoj sacsietcy Truth Social paśla sustrečy ŭ Davosie z hienieralnym sakratarom NATA Markam Rute, paviedamlaje Bi-bi-si.

«Na padstavie vynikaŭ vielmi praduktyŭnaj sustrečy, jakuju ja mieŭ z hienieralnym sakratarom NATA Markam Rute, my sfarmulavali ramki budučaj ździełki adnosna Hrenłandyi i, faktyčna, usiaho Arktyčnaha rehijona, — napisaŭ Tramp. — Heta pahadnieńnie, kali jano budzie kančatkova aformlena, stanie vydatnaj uhodaj dla Złučanych Štataŭ Amieryki i dla ŭsich krain NATA. Zychodziačy z hetaha razumieńnia, ja nie budu ŭvodzić taryfy, jakija płanavałasia ŭvieści z 1 lutaha».

Dalej prezident ZŠA paviedamiŭ, što ZŠA viaduć pieramovy pra «Załaty kupał» i Hrenłandyju. «Załaty kupał» — heta hrandyjoznaja sistema supraćrakietnaj abarony, ab pačatku ŭźviadzieńnia jakoj Tramp abviaściŭ u minułym hodzie.

Pavodle słoŭ Trampa, dalejšymi pieramovami buduć zajmacca vice-prezident Džej Dzi Vens, dziaržsakratar Marka Rubia, śpiecpasłańnik Styŭ Uitkaf i inšyja.

Pra «Załaty kupał» u suviazi z Hrenłandyjaj Tramp zhadvaŭ i ŭ svaim vystupleńni na ahulnaj siesii forumu ŭ Davosie.

Sustreča z Rute adbyłasia «na palach» forumu.

Nieŭzabavie paśla publikacyi pasta pra admovu ad pošlin Tramp zajaviŭ telekampanii CNBC, što ciapier na stale pieramovaŭ jość «kancepcyja ŭhody», i jana adpaviadaje tamu, čaho jon chacieŭ u dačynieńni da Hrenłandyi.

Bolš padrabiazna pra sutnaść hetaj uhody Tramp havaryć admoviŭsia, zajaviŭšy, što jana «troški składanaja» i što baki raskažuć pra jaje bolš pa miery chodu pieramovaŭ.

Pavodle słoŭ Trampa, Mark Rute abmierkavaŭ hetaje budučaje pahadnieńnie z Danijaj i inšymi krainami NATA. «Hetaja ździełka budzie nazaŭsiody», — dadaŭ prezident ZŠA.

Hrenłandyja na pravach aŭtanomii ŭvachodzić u skład Danii. Ministr zamiežnych spraŭ Danii Łars Lokie Rasmusen nazvaŭ apošnija zajavy Trampa pazityŭnymi znakami.

«Tramp skazaŭ, što stavić na paŭzu handlovuju vajnu, jon skazaŭ: «ja nie budu napadać na Hrenłandyju» — heta pazityŭnyja sihnały», — skazaŭ Rasmusen u intervju dackamu telebačańniu ŭviečary ŭ sieradu. Jon taksama adznačyŭ, što Tramp pravioŭ «dobruju razmovu» z hienieralnym sakratarom NATA.

Jakoj budzie rola Danii ŭ damoŭlenaściach, pra jakija napisaŭ Tramp, pakul nieviadoma.

Kiraŭnik MZS Danii ŭ tym ža intervju jašče raz padkreśliŭ, što suvierenitet nad Hrenłandyjaj ZŠA nie atrymajuć.

«Hetaha nie budzie, ZŠA nie buduć vałodać Hrenłandyjaj. Heta — čyrvonaja linija», — skazaŭ Łars Lokie Rasmusen.

• 3
• 0
• 0
• 3
• 0
• 0
• 1
• 0