Školnaja reforma ŭ Vilni moža pryvieści da zakryćcia biełaruskaj himnazii imia Skaryny
Namieśnik mera Vilni Vitaŭtas Mitałas unios na razhlad Vilenskaj haradskoj rady rašeńnie, pavodle jakoha dzieci zamiežnikaŭ, što znoŭ pryjazdžajuć u krainu, buduć prymacca tolki ŭ škoły z navučańniem na litoŭskaj movie, pačynajučy z pačatkovaj adukacyi.
Heta moža pryvieści da zakryćcia ŭ pierśpiektyvie adzinaj u stalicy Litvy biełaruskamoŭnaj himnazii imia Francyska Skaryny, piša Reform.news.
«Daśledavańni i praktyka pakazvajuć: mienavita ŭ pačatkovych kłasach mova zasvojvajecca najchutčej. U toj ža čas vysokaja kancentracyja pryjezdžych u škołach z navučańniem na ruskaj movie ŭskładniaje mahčymaści palapšeńnia vynikaŭ pa litoŭskaj movie — na heta ŭkazvajuć i sami škoły», — napisaŭ litoŭski palityk u svaim błohu ŭ Facebook.
Na dumku Vitaŭtasa Mitałasa, sistema intehracyi buksuje.
«Adnak prablema jašče hłybiejšaja — naša mihracyjnaja palityka bolš nie prystasavanaja da sučasnaj situacyi. Mihracyja nie moža być pracesam, jaki prosta adbyvajecca. My abaviazanyja joju kiravać», — ličyć jon.
Namieśnik mera Vilni pierakanany, što kali mihrant prymaje rašeńnie zastacca, jon pavinien vykonvać vyraznyja intehracyjnyja abaviazacielstvy, asnovaj jakich źjaŭlajecca mova.
«Za apošnija hady ŭ Vilni było zroblena šmat dla ŭmacavańnia vyvučeńnia litoŭskaj movy: skaračajecca kolkaść hrup u dziciačych sadkach z navučańniem na ruskaj movie, uvodzicca dvuchmoŭnaje navučańnie, usio bolš škoł vykładajuć pradmiety na litoŭskaj movie, pavialičvajuć kolkaść urokaŭ litoŭskaj movy abo adkryvajuć kłasy z navučańniem na litoŭskaj movie. Ja vielmi hanarusia škołami, jakija pry adsutnaści padtrymki z boku dziaržaŭnaj adukacyjnaj palityki śmieła biarucca za pieraŭtvareńni. Tamu ja zaklikaju vilenskija škoły z navučańniem na ruskaj movie zamacavać litoŭskuju movu ŭ svaich statutach i pakazać, jak možna sumiaścić jakasnuju adukacyju, intehracyju i zachavańnie rodnaj movy», — napisaŭ Vitaŭtas Mitałas.
Kali rašeńnie ŭładami Vilni budzie pryniataje, pad pahrozaj apyniecca dziejnaść adzinaj u stalicy Litvy biełaruskamoŭnaj himnazii imia Francyska Skaryny. Takoje mierkavańnie vykazali Reform.news baćki dziaciej, jakija navučajucca ŭ hetaj biełaruskamoŭnaj navučalnaj ustanovie.
Jak adznačyŭ adzin ź biełarusaŭ, jaki paprasiŭ nie nazyvać svajho imia, da 2020 hoda himnazija pastupova pieratvarałasia ŭ navučalnuju ŭstanovu, dzie biełarusy amal nie vučylisia, a biełaruskaja mova praktyčna nie vykarystoŭvałasia. Novaja chvala palityčnaj mihracyi biełarusaŭ pryviała da taho, što ŭ himnaziju pryjšli biełaruskija dzieci, jakija chacieli vučycca pa-biełarusku.
«Narešcie dastatkova biełarusaŭ u Litvie. Narešcie pačała viartacca biełaruskaja ŭ Skarynaŭku. Davučacca tyja, chto ŭžo tam, i ŭsio», — narakaje surazmoŭca.
Jon ličyć, što biełarusy nie źjaŭlajucca pahrozaj dla Litvy, a biełaruskamoŭnyja biełarusy tolki ŭmacujuć jaje biaśpieku.
«Ale treba davać biełarusam mahčymaść zachoŭvać svaju movu ŭ momant, kali, narešcie, jany da jaje paviarnulisia. Heta spryjaje biaśpiecy i Litvy ŭ rešcie rešt», — upeŭnieny baćka dziaciej, jakija chodziać u Skarynaŭku.
Jon ličyć, što Litva nie pavinna zabaraniać biełarusam vučycca na svajoj rodnaj movie.
«Majem adzinuju ŭ śviecie škołu takuju za miežami Biełarusi. I ŭ momant biesprecedentnaj situacyi ŭnutry Biełarusi pazbavić biełarusaŭ mahčymaści vučycca na svajoj movie?»
U kamientaryjach da svajho dopisu Vitaŭtas Mitałas adznačyŭ, što ŭ haradskoj radzie isnujuć mierkavańni pra nieabchodnaść zrabić vyklučeńnie dla polskaj movy jak adnoj z moŭ Jeŭrapiejskaha sajuza.
Ciapier čytajuć
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»2222
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»22
«Pra ciažarnaść viedali tolki jana i jaje chłopiec». Stali viadomyja padrabiaznaści historyi ź miortvym niemaŭlom, znojdzienym u Baranavičach u pakiecie
Kamientary
Dzie takoje byvaje, kab narod nie moh pračytać ułasnyja zakony, pa jakich žyŭ stahodździami?
U Litvie ŭžo jość takija, zabyŭšyja svaich prodkaŭ Bartkievičy, Ramanoŭskija, Baranoŭskija, jakija ŭ fb Žylvinasa Śvitojusia vykazvajuć nienaviść da biełarusaŭ i ŭsiaho biełaruskaha
Niaviedańnie movy svaich prodkaŭ viadzie da pavalnaha mankurtyzmu.