Aviečkin: Spadziajusia, što heta nie moj apošni siezon u NCHŁ

Forvard «Vašynhtona» Alaksandr Aviečkin znoŭ padkreśliŭ, što pakul nie viedaje, što čakaje jaho ŭ budučyni paśla zaklučnaha matča rehularnaha siezona, što prajšoŭ hetaj nočču. Adnak 40‑hadovy rasijanin daŭ zrazumieć, što heta moža być nie kaniec jaho karjery ŭ NCHŁ, paviedamlaje aficyjny sajt lihi.

«Vašynhton», za jaki taksama vystupajuć dvoje biełarusaŭ — braty Alaksiej i Illa Protasy, nie trapiŭ u rozyhryš Kubku Stenli, finišavaŭšy va Uschodniaj kanfierencyi na 9‑m miescy. 

«Spadziajusia, što heta nie moj apošni matč, — skazaŭ Aviečkin paśla taho, jak addaŭ halavuju pieradaču na pieramožny hoł Jakaba Čychruna ŭ bolšaści na 15:53 treciaha pieryjadu. — Ja nie viedaju, što budzie dalej. Pabačym».

Adna ź intryhaŭ hetaha siezona była ŭ tym, ci pabje Aviečkin viečny rekord Uejna Hrecki pa hałach u NCHŁ (rehularny čempijanat + Kubak Stenli). Zaraz u Hrecki, jaki skončyŭ karjeru ŭ 1999 hodzie, 1016 šajbaŭ, u Aviečkina — 1006. U siezonie 2024‑2025 rasijanin dahnaŭ kanadca pa šajbach u rehularnym čempijanacie biez uliku Kubka Stenli. Šaniec dahnać byŭ hetaj viasnoj, kab «Vašynhton» trapiŭ u Kubak Stenli.

«Siezon skončany, — skazaŭ Aviečkin. — Viadoma, nie chaciełasia zakančvać tak, ale heta vopyt dla maładych hulcoŭ. … Dumaju, adkaznaść na nas, i ŭčorašni dzień byŭ nie najlepšym scenaryjem i dla nas, i dla «Kałumbusa» [taksama nie trapiŭ u Kubak Stenli — NN]

Niahledziačy na adsutnaść turnirnaj vahi, šmat zaŭziataraŭ pryjechali z Vašynhtona, kab, mahčyma, u apošni raz ubačyć Aviečkina. Jany trymali płakaty «THX OVI» [Dziakuj, Ovi — NN] i «One more year!».

U kancy treciaha pieryjadu fanaty skandavali hetyja słovy, a paśla finalnaj sireny — «O-vi! O-vi!». Aviečkin u adkaz paapładziravaŭ im u palčatkach pierad tym, jak syści ŭ raspranalniu.

«Ja nie viedaju, što budzie, — skazaŭ jon. — Fanaty, jakija pryjechali z Vašynhtona i inšych miescaŭ, — heta vielmi pryjemna. Ja čuŭ ich padtrymku i kryki «Jašče adzin hod!». Heta važna. Heta pakazvaje vialikuju pavahu. Dziakuj za padtrymku».

Aviečkin pravioŭ usiu svaju karjeru ŭ NCHŁ u składzie «Kepitałz», jakija vybrali jaho pad pieršym numaram drafta 2004 hoda. Jon staŭ tvaram kłuba i ŭ 2018 hodzie pryvioŭ kamandu da pieršaha Kubka Stenli.

U hetym siezonie jon znoŭ zhulaŭ usie 82 matčy (piaty raz u karjery) i staŭ najlepšym bambardziram kamandy — 32 hały i 64 bały. Trenier Śpienser Karbiery navat pakinuŭ jaho na lodzie ŭ apošnija 1:49, kab jon moh zabić u pustyja varoty, ale šajba nie ŭlacieła.

«Mnie chaciełasia, kab jon, kali heta apošni matč, zaviaršyŭ jaho jašče adnym hołam, — skazaŭ Karbiery. — Šaniec byŭ, ale šajba padskokvała».

U raspranalni taksama abmiarkoŭvałasia budučynia Aviečkina, ale detali nie raskryvajucca.

Tom Uiłsan adznačyŭ, što Aviečkin starajecca nie pryciahvać da siabie ŭvahi: «Jon robić usio, kab usio vyhladała zvyčajna. Jon nie kaža nam, što płanuje».

Sam 40‑hadovy Aviečkin paviedamiŭ, što pieršy etap pryniaćcia rašeńnia — sustrečy paśla siezona. Jon taksama budzie raicca z kiraŭnictvam kłuba i siamjoj.

«My jašče krychu pabudziem u Vašynhtonie. Nie viedaju, kali palacim dadomu, mahčyma, u mai», — skazaŭ jon.

Simvalična, što, kali heta byŭ jaho apošni matč, jon adbyŭsia suprać «Kałambus Blu Džekiets» — mienavita suprać hetaj kamandy Aviečkin debiutavaŭ u NCHŁ 5 kastryčnika 2005 hoda i adrazu zakinuŭ dźvie šajby.

Z taho času jon pieraŭzyšoŭ rekord Uejna Hrecki (894 šajby), ustalavaŭšy novy — 929 (u rehularnych čempijanatach). U płej-of u jaho 77 hałoŭ, u tym liku 15 u čempijonskim 2018 hodzie, kali jon atrymaŭ pryz MVP.

U sumie ŭ jaho 1006 hałoŭ — usiaho na 10 mienš za ahulny rekord Hrecki (1016).

Sudziačy pa jaho formie ŭ hetym siezonie, jon moh by pabić i hety rekord, kali praciahnie karjeru.

«Jon — najlepšy snajpier usich časoŭ, — skazaŭ były forvard «Kepitałz» T. Dž. Ošy. — Kali jon vierniecca, dumaju, lohka zabje 30, a moža i 40, bo jon prosta ŭmieje zabivać».

• 1
• 1
• 0
• 0
• 0
• 0
• 0
• 0