Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy
Ironija losu ŭ tym, što letaś śpiavak Raman Jurkoŭ atrymaŭ ad Łukašenki list padziaki za padtrymku jaho kandydatury na apošnich vybarach. A ŭžo praź miesiac artysta zatrymali siłaviki — bo znajšli kamientary, jakija artyst pisaŭ u 2020 hodzie.
Pra Jurkova raspaviali siostry Hruździevy ŭ sacsietkach.
Pra Ramana Jurkova artystki raniej pisali ź ciepłynioj. Kazali, što im paśla 2020 hoda było składana znajści studyju, dzie jany mahli b zapisvać svaje pieśni.
Maŭlaŭ, ludzi, kali čuli, što telefanujuć tyja samyja jabaćki-Hruździevy, prosta kidali słuchaŭku.
I voś u 2022 hodzie śpiavački paznajomilisia z Ramanam, ź jakim nie prosta pačali pracavać, ale i pasiabravali. Toj staŭ aranžyroŭščykam Hruździevych.
Hruździevy časam svarylisia z Ramanam praź niejkija prafiesijnyja pytańni. Ale śćviardžajuć, što šmat razmaŭlali z artystam na roznyja temy i ich pohlady na žyćcio zaŭsiody supadali: «U 2023 hodzie zakranuli temu vajny. «A kali, nie daj Boh, u nas niešta zdarycca, što ty budzieš rabić? — spytali my. — Źjedzieš za miažu?». I Roma adkazaŭ, pahladzieŭšy doŭha ŭ vočy: «Ja pajdu baranić svaju krainu z aŭtamatam, heta moj abaviazak, jak kožnaha mužčyny».
Darečy, karjera śpievaka išła ŭhoru. Jon zaśviaciŭsia na šou BT «Faktar.baj», zhaniaŭ u Maskvu na šou Andreja Małachava, aktyŭna vystupaŭ na roznych praŭładnych mierapryjemstvach. U sacsietkach Raman vychvalaŭsia dypłomami ad Ministerstva antymanapolnaha rehulavańnia i handlu dy ad «Biełaj Rusi».
Naprykancy 2024 hoda Raman udzielničaŭ u kancercie finału «Marafonu adzinstva» na «Minsk-Arenie».
Letaś u studzieni Jurkoŭ atrymaŭ list ad Łukašenki — toj dziakavaŭ za padtrymku jaho kandydatury na apošnich vybarach.
Zdavałasia, dalej čakajuć tolki pachody pa šou na dziaržaŭnym telebačańni dy čos pa prapahandysckich mierapryjemstvach. Ale niešta pajšło nie pa płanie.
U sacsietkach Hruździevy raskazali (nie nazyvajučy imia Ramana), što sustrelisia ź im 18 sakavika 2025 hoda. Kažuć, što šmat razmaŭlali ŭ toj dzień, jon pakazvaŭ padziaku ad Łukašenki.
— Viedajecie, jon byŭ taki natchniony, raskazvaje pra svaje płany… Ale kaža pra toje, što ŭ 2020 hodzie ŭ jaho byli niejkija kamientary…
Na nastupny dzień paśla razmovy z Hruździevymi damoŭ da Ramana pryjšli siłaviki i zatrymali za tyja samyja kamientary. Ramana abvinavacili pa 130 artykule Kryminalnaha kodeksu («Raspalvańnie varožaści»).
Hruździevy pačali zmahacca za siabra. Sudzili Ramana ŭ vieraśni 2025 hoda ŭ Minskim haradskim sudzie. Pasiadžeńniaŭ było niekalki, Valancina z Alaksandraj chadzili na ich — z saboj dla dapamohi brali fotazdymak Volfa Miesinha i ikonu.
— U sudzie my vystupili vielmi emacyjanalna. Skazali, što, tak, byli kamientary, ale zaraz my razmaŭlali z hetym čałaviekam i viedajem, što jon całkam za krainu, jon naš, jon svaimi ŭčynkami heta dakazvaje. I što kali treba, kali jamu budzie pahražać termin, my hatovy zapisać videazvarot da Alaksandra Łukašenki i paprasić jaho pamiłavać.
Urešcie Jurkovu prysudzili chatniuju chimiju. U kancy 2025 hoda, kali prysud nabyŭ zakonnuju moc, KDB uklučyŭ śpievaka ŭ śpis terarystaŭ.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1515
Kamientary