Prodažy Geely bjuć rekordy, a popyt na Lada padaje. Čamu tak?

Rasijskija aŭto stračvajuć pazicyi

Za minuły miesiac dylery pradali 2,7 tysiačy adzinak Geely/Belgee, što na 41% bolš, čym u studzieni. Paralelna z hetym prodažy rasijskaj Lada, jakaja pa vynikach 2025 hoda ŭsio jašče zajmała druhoje miesca pa papularnaści na biełaruskim rynku, praciahvajuć padać.

Za luty było realizavana ŭsiaho 470 Lada, što na 13% mienš, čym miesiacam raniej.

Jakija madeli karystajucca najbolšaj papularnaściu?

Pa vynikach minułaha hoda samaj papularnaj była Belgee X50, jakaja raniej vypuskałasia pad nazvaj Geely Coolray. Za 2025 hod było realizavana kala 11 400 takich krasovieraŭ.

Na druhim miescy išoŭ siedan Belgee S50 (Geely Emgrand): letaś biełarusy kupili amal 6300 siedanaŭ kitajska-biełaruskaj vytvorčaści.

Zamykaje trojku lidaraŭ parkietnik Belgee X70 (Geely Atlas Pro) z amal 5 tysiačami prodažaŭ.

U čym sakret pośpiechu? 

Pierš za ŭsio ŭ tym, što ŭ Geely pa suadnosinach cana/iakaść na rynku novych aŭto ŭ Biełarusi amal niama kankurentaŭ. Paśla sychodu z Rasii suśvietnych aŭtavytvorcaŭ, pierš za ŭsio takich, jak VW i Renault, vybar aŭto zvuziŭsia.

Pa-druhoje, na kuplu aŭto biełaruskaj vytvorčaści dziejničajuć prahramy ilhotnaha kredytavańnia, što taksama niemałavažna.

Aproč hetaha, praz sankcyjnyja abmiežavańni stała składaniej i daražej pryhaniać patrymanyja aŭto ź Jeŭropy i ZŠA.

Ale nazyvać niejmavierna vysoki popyt na aŭto biełaruskaj zborki vyklučna vymušanym nie vypadaje.

Reč u tym, što ŭžo pa vynikach 2021 hoda Geely zajmali druhi radok pa papularnaści, abhaniajučy VW i Renault.

Pavialičyć

Lidaram prodažaŭ u apošnim pieradsankcyjnym hodzie była rasijskaja Lada z 11 669 aŭto. Geely tady sa svaim druhim miescam pradali 7422 aŭto za hod.

Pakolki čaściakom dla razumieńnia karysna paraŭnoŭvać situacyju ź inšymi krainami, my pahladzieli, što pa canie biełaruska-kitajskich mašyn možna nabyć u Litvie.

Samaja dastupnaja madel Belgee — heta siedan S50. Ceny na ich pačynajucca z 53 500 rubloŭ (kala 15 900 jeŭra) za bazavuju kamplektacyju Comfort z 5‑stupienčataj MKPP.

Pavialičyć

Aŭto z AKPP u kamplektacyi Comfort Plus kaštuje ad 56 900 rubloŭ (kala 16 900 jeŭra).

U Litvie samym tannym novym aŭto na rynku źjaŭlajecca Dacia Sandero, jaki kłasam nižejšy za Belgee S50. U bazavaj kamplektacyi ź litrovym ruchavikom i MKPP takoje aŭto kaštuje 15 tysiač jeŭra. 

Pavialičyć

Dacia Sandero z AKPP i ruchavikom na 120 k.s kaštuje ŭžo ad 18 100 jeŭra, što bolš jak na 1000 jeŭra daražej za Belgee S50 na aŭtamacie.

Samy papularny aŭtamabil u Biełarusi — krasovier Belgee X50 (Geely Coolray). Jon pradajecca pa cenach ad 61 900 rubloŭ (kala 18 350 jeŭra). Heta budzie aŭto z AKPP i ruchavikom abjomam 1,5 litra mahutnaściu 177 k.s.

Pavialičyć

Samy tanny krasovier u Jeŭropie — heta Dacia Duster. Francuzska-rumynski ŭsiedarožnik kaštuje ŭ Litvie ad 18 190 jeŭra.

I heta budzie aŭto z trochcylindravym ruchavikom abjomam 1 litr i mahutnaściu 100 k.s., jaki ŭžo ad zavoda idzie z hazavaj ustanoŭkaj. Karobka ŭ im miechaničnaja, i navat kołavyja dyski žaleznyja.

Pavialičyć

Ceny na viersiju z AKPP i litymi dyskami pačynajucca ad 21 200 jeŭra, što amal na 3000 jeŭra daražej, čym za Belgee Ch50, jaki pry hetym maje bolš mahutny mator.

Kali paraŭnoŭvać ceny na papularnyja madeli Geely/Belgee biełaruskaj zborki nie z samaj tannaj markaj u Jeŭropie Dacia, jakaja śpiecyjalizujecca na vypusku aŭto biudžetnaha siehmienta, a ź inšymi, to ceny na kitajska-biełaruskija mašyny vyhladajuć jašče bolš pryvabna.

Naprykład, ceny na małalitražku Opel Corsa startujuć z 19 500 jeŭra, a na kampaktny krasovier Mokka — z 26 460 jeŭra.

Samy tanny aŭtamabil u liniejcy Peugeot — «208» — kaštuje ad 20 500 jeŭra. Heta cana za aŭto ŭ bazavaj kamplektacyi ź bienzinavym ruchavikom i MKPP.

Pavialičyć

A ceny na hibrydnyja kampaktnyja krasoviery Peugeot 2008 pačynajucca ŭžo z 26 tysiač jeŭra.

• 4
• 0
• 1
• 1
• 0
• 1
• 1
• 0