«Vy viedajecie, što bolšaść biełarusaŭ ličać vas nikčemnymi chałujami?»
BRSM paprasiŭ padzialicca stereatypami pra arhanizacyju — i atrymaŭ škvał niehatyvu.
«My viedajem, što takoje jość. Raskažy pra stereatypy pra našu arhanizacyju, a my ich abvierhniem abo paćvierdzim», — z takoj inicyjatyvaj vystupiła Minskaja haradskaja arhanizacyja BRSM u svaim tredsie.
Samym papularnym stała pytańnie ab tym, kudy iduć hrošy, sabranyja ŭ jakaści ŭnioskaŭ.
Druhoj pa papularnaści stała zaŭvaha ab tym, što «na miescach u arhanizacyju zahaniajuć».
Čytačy taksama cikaviacca samim sensam isnavańnia arhanizacyi:
«Navošta vy isnujecie? Jaki sens?»
«A stereatyp adzin — vy niepatrebnyja».
Karystalniki taksama pacikavilisia, kali BRSM pačnie razmaŭlać na biełaruskaj movie:
«My dobra viedajem rodnuju movu i možam na joj razmaŭlać! A taksama my dobra viedajem Kanstytucyju, a pavodle jaje ŭ nas u krainie dźvie dziaržaŭnyja movy!» — adkazali redaktary kanała. Heta byŭ adziny adkaz na biełaruskaj movie. U astatnich vypadkach na pytańni, zadadzienyja pa-biełarusku, adkaz davaŭsia na ruskaj.
«Ci jość unutry BRSM prastora dla krytyki ŭłady, i, kali jość, ci možacie pryvieści prykład, kali jana sapraŭdy paŭpłyvała na rašeńnie?» — pacikaviłasia Zadzinočańnie biełaruskich studentaŭ. Na što atrymała adkaz:
«U BRSM jość miesca dla kankretnych spraŭ i samarealizacyi, a prosta pabałbatać — heta nie pra nas! Ale my zaŭsiody hatovyja ŭstupić z Vami ŭ kanstruktyŭnuju dyskusiju!»
Prapanovu pravieści publičnyja debaty pa temie aktualnych prablem biełaruskaj moładzi staličny BRSM praihnaravaŭ.
U adkaz na vostryja zaŭvahi BRSM sprabavaŭ žartavać. Tak, u adkaz na mierkavańnie: «Pra vas nie stereatypy, na vas klajmo. Nie abvierhniecie» — jany napisali:
«Klajmujuć parodzistych žyvioł. My svaich adroźnivajem pa dobrych spravach, lubovi da Radzimy i firmovaj atrybutycy! Ale i tyja, i tyja sa znakam jakaści!»
«Jak spravy ŭ arhanizacyi, jakaja ŭdzielničała ŭ departacyi ŭkrainskich dziaciej?» — spytaŭsia jašče adzin biełarus.
«U nas usio dobra! U dzietak, jakija da nas u sanatoryi pryjazdžali, taksama, užo doma, a my ź imi ŭ kantakcie!», — zapeŭnivajuć jaho.
«Jak u vas vybary na kirujučyja pasady prachodziać? Va ŭnivierach z prarektaram-hebistam uzhadniajecie?» — padšpiliŭ jašče adzin čytač.
«Ščyra i adkryta! Jak i lubyja vybary ŭ našaj krainie», — adkazvali jamu.
Na zaŭvahu: «Prymusova ŭsich zahaniajuć. Choć heta i nie stereatyp», redaktary kanała adkazali: «Zhodnyja — heta nie stereatyp! Heta FEJK!».
Takija adkazy vyklikali jašče bolšaje abureńnie: «Vy viedajecie, što bolšaść biełarusaŭ ličyć vas nikčemnymi chałujami i pahardžajuć? Jak vy z hetym žyviacie? Jak vy tłumačycie svaim rodnym dzieciam metu svajho isnavańnia?» — pytajecca adzin z karystalnikaŭ.
«Vy — łajdaki, jakija ničoha nie robiać dla moładzi», — dadaje jašče adzin.
Ciapier čytajuć
Mikoła Statkievič pavinšavaŭ biełarusaŭ z Dniom Voli, zapisaŭšy pieršaje VIDEA paśla vyzvaleńnia7
Kamientary