Pry atacy na turbazu ŭ akupavanaj Kiryłaŭcy Zaparožskaj vobłaści zahinuŭ supracoŭnik Raskamnahladu, jaki ŭdzielničaŭ u «SVA», i jaho dzieci
Padčas udaru pa bazie adpačynku ŭ akupavanym pasiołku Kiryłaŭka Zaparožskaj vobłaści zahinuŭ kiraŭnik miascovaha ŭpraŭleńnia Hałoŭnaha radyjočastotnaha centra 54‑hadovy Michaił Ivanaŭ i dvoje jaho niepaŭnaletnich dziaciej, paviedamili ŭ Raskamnahladzie. Zahinuły čynoŭnik bolš za 20 hadoŭ słužyŭ u rasijskim vojsku.
«Z hłybokim bolem paviedamlajem pra hibiel Michaiła Uładzimiraviča Ivanova — načalnika ŭpraŭleńnia Zaparožskaj vobłaści filijała FDUP «Hałoŭny radyjočastotny centr» u Respublicy Krym i horadzie Sievastopali — i jaho niepaŭnaletnich dziaciej… Kalektyŭ Fiederalnaj słužby pa nahladzie ŭ śfiery suviazi, infarmacyjnych technałohij i masavych kamunikacyj i Fiederalnaha dziaržaŭnaha ŭnitarnaha pradpryjemstva «Hałoŭny radyjočastotny centr» vykazvaje ščyryja spačuvańni rodnym i blizkim Michaiła Uładzimiraviča, Kaci i Andreja — u hetuju ciažkuju hadzinu my sumujem razam z vami», — havorycca ŭ paviedamleńni Raskamnahlada.
Uzrost zahinułych dziaciej nie nazyvajecca.
Taksama atrymała ranieńni žonka Ivanova, jaje dastavili ŭ balnicu.
Michaiłu Ivanovu było 54 hady, piša «Astra». Jon słužyŭ va US RF bolš za 20 hadoŭ, a z maja 2023 hoda ŭznačalvaŭ upraŭleńnie HRČC pa Zaparožskaj vobłaści.
Z vieraśnia 2025‑ha da sakavika 2026 hoda Ivanoŭ udzielničaŭ u «SVA».
HRČC — padviedamasny Raskamnahladu Hałoŭny radyjočastotny centr, jaki kantraluje vykarystańnie radyjočastot i pracu srodkaŭ suviazi ŭ Rasii.
U noč na 25 lipienia Ukraina atakavała bazu adpačynku ŭ akupavanaj Kiryłaŭcy na Azoŭskim mory. Zahinuli 12 čałaviek, u tym liku piaciora dziaciej. Paciarpieli 19. Śledčy kamitet RF raspačaŭ kryminalnuju spravu ab terakcie.
Ukrainskaje vydańnie «RIA Pivdień» ź Mielitopala piša, što źniščanyja bazy adpačynku «Aleon» i «Biełuha» vykarystoŭvalisia rasijskimi vajskoŭcami.
Pavodle danych žurnalistaŭ, na bazie «Aleon» raźmiaščalisia rasijskija aficery, a ŭ «Biełuzie» spynialisia siłaviki i vajskovaje kiraŭnictva. Pry hetym vydańnie paćviardžaje, što ŭ niekatorych pakojach žyli cyvilnyja asoby. Aficyjnaha paćviardžeńnia hetaj infarmacyi niama.
Kamientary
I kto tam "otdychajet", počiemu, začiem i v kakom sostavie, znajut tolko fsb, roshvardija i raźviedka Ukrainy...