Raskoł u Kramli: elity ŭ rospačy, viery ŭ Trampa bolš niama, a Pucin praciahvaje maryć pra Danbas

Pra hłyboki raskoł pamiž nastrojami ŭ kalidorach ułady i asabistymi ambicyjami Uładzimira Pucina piša ŭpłyvovaje brytanskaje vydańnie The Guardian sa spasyłkaj na šmatlikija krynicy z atačeńnia rasijskaha lidara, biznes-asiarodździa i zachodnich śpiecsłužbaŭ. Materyjał brytanskich žurnalistaŭ pierakazała «Ukrainskaja praŭda».

Pradčuvańnie katastrofy i kaniec viery

Nastroi siarod rasijskaj elity sioleta kardynalna źmianilisia, u ich panuje hłybokaje rasčaravańnie ŭ Pucinie. «Uzmacniajecca adčuvańnie, što nasoŭvajecca niejkaja katastrofa», — cytuje vydańnie adnaho ź biznes-lidaraŭ, jaki maje šyrokija suviazi ŭ Kramli. Pavodle jaho słoŭ, nichto nie vieryć, što sistema abryniecca zaŭtra, ale raście ŭśviedamleńnie taho, što prymajucca absalutna biessensoŭnyja, samaźniščalnyja rašeńni. «Ludzi, jakija kaliści abaraniali Pucina, bolš hetaha nie robiać. Luboje adčuvańnie budučyni źnikła», — adznačaje surazmoŭca.

Na fonie padzieńnia rejtynhaŭ Pucina i ŭzmacnieńnia cisku na ekanomiku niezadavolenaść pačynajuć vykazvać navat prakramloŭskija błohiery. Adnak hetyja treščyny ŭnutry sistemy nijak nie ŭpłyvajuć na padychod samoha kiraŭnika da vajny va Ukrainie — jon, jak i raniej, nastrojeny na jaje praciah.

Danbas da kanca hoda i iluzija pieramohi

Pucin daŭ zrazumieć svajmu najbližejšamu atačeńniu, što raźličvaje na zachop usiaho Danbasa da kanca biahučaha hoda. «Pucin zacykleny na Danbasie i nie spynicca, pakul nie dasiahnie svajoj mety», — śćviardžaje adna z krynic. Jaho niadaŭnija słovy pra toje, što vajna nibyta «nabližajecca da zaviaršeńnia», varta traktavać nie jak hatoŭnaść da kampramisu, a jak upeŭnienaść u niepaźbiežnaści vajennaha praryvu.

Pradstaŭnik ukrainskaj vyviedki paćvierdziŭ, što rasijskija hienierały pierakanali svajho lidara ŭ realnaści zachopu Danbasa ŭ vyznačanyja terminy. Adnak nakolki hetyja dakłady adpaviadajuć rečaisnaści, zastajecca niezrazumiełym. «Navat kali mnohija ź jaho atačeńnia ŭśviedamlajuć realnaść situacyi, my ŭsio adno nie viedajem, što mienavita razumieje sam Pucin. U hetym i palahaje najbolšaja składanaść», — adznačyŭ vysokapastaŭleny pradstaŭnik jeŭrapiejskich śpiecsłužbaŭ. Adna z krynic, što viedaje pra dyskusii ŭ Kramli, dadaje: «Viadoma, čynoŭniki i vajskoŭcy malujuć prezidentu viasiołkavuju karcinu. Jany jamu chłusiać. Mienavita tak pracuje sistema, jakuju stvaryŭ Pucin».

Stračanaja nadzieja na Trampa i apietyt, jaki raście

Jašče adnym faktaram, jaki paŭpłyvaŭ na rašučaść Pucina praciahvać vajnu, stała strata viery ŭ zdolnaść Donalda Trampa prymusić Kijeŭ pajści na terytaryjalnyja sastupki. «U Maskvie panavaŭ ahulny aptymizm nakont taho, što Tramp zmoža addać Danbas paśla svajho abrańnia. Ciapier jon u značnaj stupieni źnik», — paviedamiła krynica, jakaja padtrymlivaje kantakty z Pucinym.

Na hety momant hałoŭnaj metaj Maskvy zastajecca zachop Danbasa. Adnak ludzi, blizkija da Kramla, kažuć, što ambicyi Pucina mohuć znoŭ vyraści, kali jon adčuje, što Ukraina pačynaje raspadacca. Tady, pa słovach dźviuch krynic, jon moža pajści dalej, pierasiahnuŭšy Dniapro, u sprobie zachapić usie čatyry ŭkrainskija rehijony, jakija Rasija zapisała ŭ svaju kanstytucyju. «Jon nie źjaŭlajecca strateham, jaki myślić doŭhaterminova. Jaho apietyt raście padčas ježy», — skazaŭ adzin z surazmoŭcaŭ.

Paŭnočnakarejskija razmovy i zajzdraść da Kitaja

Jašče adnoj temaj, jakuju aktyŭna abmiarkoŭvajuć u maskoŭskaj elicie, źjaŭlajucca abmiežavańni internetu. «Za abiedziennym stałom usie havorać pra internet. Ciapier my krychu nablizilisia da Paŭnočnaj Karei», — adznačyŭ adzin z kramloŭskich insajdaraŭ. Kitajskija mietady kantrolu, jakija raniej u Rasii rehularna vyśmiejvali jak simvał cenzury, ciapier abmiarkoŭvajucca z peŭnaj zajzdraściu.

Pry hetym, pa słovach krynic, niekatoryja pradstaŭniki rasijskaj elity, u pryvatnaści pres-sakratar Kramla Dźmitryj Piaskoŭ i pieršy namieśnik kiraŭnika administracyi Siarhiej Kiryjenka, sprabavali pryvatna adhavaryć Pucina ad samych žorstkich abmiežavańniaŭ, ale biespaśpiachova.

Vysokapastaŭleny pradstaŭnik jeŭrapiejskich śpiecsłužbaŭ adznačyŭ, što mnohija z kiraŭnictva RF ciapier znachodziacca na etapie ŭśviedamleńnia prablem jak na poli boju, tak i ŭ ekanomicy, ale nie majuć nijakaha płana pa ich pieraadoleńni.

«Jany razumiejuć, što situacyja paharšajecca. Ale ja nie čuŭ, kab jany pytalisia: «Dyk što ž nam z hetym rabić?», — padsumavaŭ pradstaŭnik śpiecsłužbaŭ.

• 10
• 0
• 8
• 6
• 0
• 0
• 1
• 0