Łukašenka adkazaŭ nakont 500 celaŭ u Biełarusi, namiečanych Ukrainaj

Łukašenku paprasili prakamientavać zajavy, što hučali z Kijeva, u tym liku ab vyznačanych na terytoryi Biełarusi 500 patencyjnych celach.

«Jany, moža, i vyznačyli 500 celaŭ. U nas jość adna cel vielmi surjoznaja z dakładnymi kaardynatami i zusim niedaloka ad Biełarusi. Heta ž jany taksama razumiejuć», — adkazaŭ Łukašenka.

«Niachaj mianie Uładzimir Alaksandravič [Zialenski] prabačyć za heta, ale heta bałbatnia niejkaja», — skazaŭ Łukašenka. 

Łukašenka miarkuje, što pazicyja ŭkrainskich vajskoŭcaŭ u hetym pytańni inšaja.

«Vajskoŭcy Ukrainy nijakaj vajny ź Biełaruśsiu nie chočuć. Heta ja viedaju dakładna. Tamu što jany razumiejuć, što heta 1500 kiłamietraŭ dadatkovaha frontu — miaža. I niaprostaja miaža Biełarusi i Ukrainy. Im heta treba? Nie», — skazaŭ Łukašenka.

Alaksandr Łukašenka raskazaŭ, što šmat razvažaje nad tym, navošta Uładzimir Zialenski apošnim časam robić takija zajavy. Jon pryjšoŭ da dumki, što da hetaha prezidenta Ukrainy padšturchoŭvajuć u šerahu jeŭrapiejskich krain.

«Z amierykancami my razmaŭlajem. Pazicyja Trampa zrazumiełaja. Jaki b jon ni byŭ, jon pravilnuju zajmaje pazicyju. Amierykancy razmaŭlajuć, chtości tam maŭčyć šmatznačna, chtości, znoŭ ža, kaža, jeŭrapiejcy čahości tam rykajuć. I jany jamu kažuć: «A ty čaho maŭčyš? Zaŭtra byccam by budzie ataka z boku Biełarusi va Ukrainu».

U suviazi z hetym Łukašenka zajaviŭ: «Hetaha nikoli nie budzie. Nikoli! Našych tam [va Ukrainie] sałdat nie było i nie budzie. Heta taksama jon viedaje, i vajskoŭcy viedajuć».

«Heta značyć jeŭrapiejcy jaho padšturchnuli da taho, kab jon rabiŭ takija zajavy. Jak heta — jany zmahajucca za Ukrainu, a Ukraina sama maŭčyć? Voś jon i lapaje», — skazaŭ Łukašenka.

Praz abrazy i prynižeńni Łukašenka dadaŭ, što «ŭ peŭnaj stupieni škaduje» Uładzimira Zialenskaha.

«Ja sprabuju prezidenta Ukrainy zrazumieć. Idzie vajna, idzie žudasny cisk. Pieražyć heta nie tak prosta. Nu, i tam, moža być, niešta zdaryłasia. Dzieści kurnuŭ, dzieści kalnuŭ i inšaje adbyłosia, i jon pačynaje rabić hetuju zajavu. Mnie jaho prosta škada. Tamu ja maŭču. Nie daj boh trapić u takuju ​​situacyju», — skazaŭ Łukašenka. 

U apošni čas rytoryka ŭkrainskaha boku ŭ adras Biełarusi mocna źmianiłasia. Pradstaŭniki Ukrainy ŭžo niekalki razoŭ pahražali, što ŭdary ŭ adkaz, a mahčyma i previentyŭnyja ŭdary, kali pahroza ź Biełarusi stanie niaŭchilnaj, hetym razam buduć naniesienyja. «Siły abarony Ukrainy, Siły biaśpieki i našy śpiecsłužby viedajuć, u čym pahrozy i jak reahavać — jak reahavać spraviadliva, biez sumnievaŭ», — zajaviŭ Uładzimir Zialenski.

Kiraŭnik Siłaŭ bieśpiłotnych sistem Ukrainy Robiert Broŭdzi byŭ jašče bolš rezki: «Minskamu haŭlajtaru Łukašesku, — napisaŭ jon u fejsbuku. — Pieršyja 500 celaŭ užo na ałoŭku. Biaspłatnaja i vielmi praktyčnaja parada: nie leź na vočy Ukrainie».

• 3
• 2
• 31
• 36
• 0
• 0
• 6
• 1