Jak rychtavaŭsia vizit Cichanoŭskaj u Kijeŭ i čamu jon niekalki razoŭ pieranosiŭsia
Čakałasia, što biełaruskaja delehacyja pryjedzie ŭ Kijeŭ jašče na Dzień Voli.
Vizit Śviatłany Cichanoŭskaj u Kijeŭ rychtavaŭsia niekalki miesiacaŭ. Za kulisami — uzhadnieńni i pieranosy. Ale hałoŭnaje — palityčnaje rašeńnie, jakoje, pavodle ŭdzielnikaŭ biełaruskaj delehacyi, u Kijevie pryniali jašče vosieńniu minułaha hodu: havaryć pra Biełaruś nie z Alaksandram Łukašenkam, a z demakratyčnymi siłami.
«Kali my chočam pabačyć Biełaruś, u nas jość Śviatłana Cichanoŭskaja, jana pryjedzie ŭ Kijeŭ i my pahavorym», — tak, sa słovaŭ daradcy Cichanoŭskaj pa dypłamatyi Dzianisa Kučynskaha, va Ukrainie siońnia farmulujuć svaju pazicyju.
Sam vizit vyhladaŭ jak aficyjny vizit pieršaj asoby. I heta adčuvałasia ŭ detalach: ad dziaržaŭnaj achovy i kartežu da bieł-čyrvona-biełych ściahoŭ na vakzale i pratakolnaha ŭzroŭniu pryjomu. Kučynski, jaki arhanizoŭvaŭ dziasiatki mižnarodnych pajezdak Cichanoŭskaj, kaža, što padrychtoŭka z boku ŭkrainskaha MZS išła «na samym vysokim uzroŭni».
Vizit, jaki niekalki razoŭ pieranosiŭsia
U publičnaj prastory apošnija miesiacy chadzili roznyja daty mahčymaha pryjezdu Śviatłany Cichanoŭskaj u Kijeŭ, u tym liku — 25 sakavika. Sapraŭdy, data ŭzhadniałasia davoli doŭha, ale, jak śćviardžajuć u Ofisie, nie z-za niejkich palityčnych vahańniaŭ ukrainskaha boku ci kanfliktaŭ, havorka išła najpierš pra łahistyku i prysutnaść u Kijevie Uładzimira Zialenskaha.
Pavodle Kučynskaha, ščylnaja padrychtoŭka pačałasia paśla studzieńskaj sustrečy Śviatłany Cichanoŭskaj i Uładzimira Zialenskaha ŭ Vilni. Mienavita tady było atrymana zaprašeńnie ŭ Kijeŭ.
Pieršapačatkova razhladałasia data 24 lutaha — da hadaviny poŭnamaštabnaha ŭvarvańnia Rasii. Ale ŭ toj momant u Kijeŭ pryjazdžali dziasiatki suśvietnych lidaraŭ, i biełaruski vizit moh prosta rastvarycca ŭ ahulnym fonie. A hetaha nie chaciełasia.
Potym abmiarkoŭvali 25 sakavika — Dzień Voli. Hetuju datu, kaža Kučynski, prapanoŭvaŭ užo ŭkrainski bok jak važny simvaličny žest. Ale kančatkova jaje tak i nie zaćvierdzili.
Daradca Śviatłany Cichanoŭskaj pa parłamienckim supracoŭnictvie Anatol Labiedźka tłumačyć prosta: «Tam nie było palityki, nie było ničoha kułuarnaha. Nam skazali: «My vam ćviorda harantujem — usio budzie». Ale hrafik Zialenskaha va ŭmovach vajny pastajanna źmianiajecca».
U vyniku finalna pra daty damovilisia ŭžo viasnoj — paśla kantaktaŭ z ukrainskim MZS i razmovy ź ministram zamiežnych spraŭ Ukrainy. Dla Kijeva było pryncypova, kab Zialenski ŭ hetyja dni znachodziŭsia va Ukrainie i moh asabista sustrecca ź biełaruskaj delehacyjaj.
«Možna było b pryjechać i raniej bieź Zialenskaha. Ale heta ŭžo nie toje. Naš majak — heta byŭ Zialenski. Ad jaho zaležyć usio astatniaje», — kaža Anatol Labiedźka.
Labiedźka, jaki jeździć va Ukrainu jašče z časoŭ Pamarančavaj revalucyi, zhadvaje sustrečy ź Juščankam i Cimašenkaj jašče da ich prychodu da ŭłady, vystupy na Majdanie i šmatlikija kantakty z ukrainskaj apazicyjaj minułych hadoŭ. Ale padkreślivaje: raniej heta byli suviazi z tymi, chto «zmahaŭsia za Ukrainu», a nie pradstaŭlaŭ dziaržavu.
Čym tłumačać ciapierašni pryjom
U Ofisie Cichanoŭskaj ličać, što ŭ Kijevie adbyłasia bolš hłybokaja pieraacenka adnosinaŭ da Biełarusi.
Dzianis Kučynski farmuluje tak: va Ukrainie pryjšli da razumieńnia, što «Łukašenka — heta relikt epochi» i «nijakich spraŭ ź im mieć niama sensu».
Na dumku ŭkrainskich uładaŭ, kaža jon, Łukašenka całkam zaležyć ad Pucina, daje Rasii terytoryju, infrastrukturu i źjaŭlajecca saŭdzielnikam ahresii suprać Ukrainy. Tamu pracavać Kijeŭ choča nie z režymam, a «ź biełaruskim narodam i jaho pradstaŭnictvam».
Što dalej?
Dzianis Kučynski kaža, što delehacyja jechała ŭ Kijeŭ z praktyčnym pytańniem: čym biełarusy mohuć być karysnyja Ukrainie ŭžo ciapier.
Pavodle jaho, u Kijevie abmiarkoŭvajucca dapamoha Ukrainie z boku biełaruskaj dyjaspary ŭ Jeŭropie, padtrymka biełaruskich dobraachvotnikaŭ, sumiesnyja inicyjatyvy i bolš ciesnaja kaardynacyja pamiž ukrainskim bokam i demakratyčnymi siłami Biełarusi.
«Uładzimir Zialenski padčas 30‑chvilinnaj sustrečy sa Śviatłanaj Cichanoŭskaj vykazaŭ zachapleńnie biełaruskimi vajarami, jakija vajujuć va Ukrainie. My padymali pytańni, źviazanyja z dobraachvotnikami i ich siemjami, pryśviacili hetamu šmat času. Pieradali prezidentu Ukrainy zvaroty ad ludziej. Pieršasnaja reakcyja Uładzimira Zialenskaha była pazityŭnaja, jon zanatavaŭ sabie infarmacyju, tamu my spadziajemsia, što atrymajecca zrušycca ŭ hetym pytańni, vyrašyć składanaści i šurpataści, jakija zaraz jość», — adznačyŭ Kučynski.
Pavodle jaho słoŭ, rašeńnie peŭnych pytańniaŭ musić adbyvacca praz stvareńnie mižviedamasnaj hrupy.
Anatol Labiedźka pryvioz ukrainskim parłamientaryjam analityčnyja materyjały pa Biełarusi i prapanovy pa sumiesnych prajektach. Adrazu paśla vizitu ŭ Viarchoŭnaj Radzie płanujuć pravieści asobny ivent pa jeŭraintehracyjnym dośviedzie Ukrainy i tym, jak jaho možna vykarystoŭvać dla Biełarusi.
Asobna ŭ delehacyi raźličvajuć i na palityčnyja vyniki.
Anatol Labiedźka adkryta kaža: padtrymka Zialenskaha moža stać dla biełaruskich demakratyčnych sił «mocnaj kartaj» u Jeŭropie. U Ofisie spadziajucca, što paśla hetaha vizitu pazicyi Cichanoŭskaj i jaje kamandy ŭzmocniacca ŭ dyskusijach ź jeŭrapiejskimi partniorami — asabliva ŭ pytańniach sankcyj, izalacyi režymu Łukašenki i budučych mižnarodnych pieramovaŭ.
«Kali za nami popleč Zialenski — heta ŭžo zusim inšaja vaha», — faktyčna tak apisvajuć u delehacyi hałoŭny praktyčny vynik vizitu.
Ciapier čytajuć
Jak rychtavaŭsia vizit Cichanoŭskaj u Kijeŭ i čamu jon niekalki razoŭ pieranosiŭsia1
Kamientary