Miedźviadčuk: Zialenski sprabuje ŭciahnuć Minsk u vajnu, adkinuŭšy Łukašenku i zaprasiŭšy Cichanoŭskuju
Prarasijski palityk z Ukrainy, kum Pucina Viktar Miedźviadčuk zajaviŭ, što Kijeŭ naŭmysna pravakuje Minsk i vykonvaje zachodni «zakaz na demanizacyju Biełarusi». Pavodle jaho słoŭ, zamiest vykarystańnia Alaksandra Łukašenki jak vopytnaha pieramoŭščyka, ukrainskija ŭłady zaprašajuć u Kijeŭ Śviatłanu Cichanoŭskuju, što palityk ličyć «čystym varjactvam».
U dzień pryjezdu demakratyčnaj lidarki Śviatłany Cichanoŭskaj u Kijeŭ u RF rasčachlili prarasijskaha palityka z Ukrainy, kuma Pucina Viktara Miedźviedčuka, jakoha ŭ 2022 hodzie ŭkrainskija ŭłady abmianiali na kiraŭnictva pałka «Azoŭ».
U svaim artykule Viktar Miedźviadčuk paćvierdziŭ viersiju prezidenty Ukrainy, što Biełaruś sprabujuć uciahnuć u vajnu. Tolki abvinavaciŭ jon u hetym Zialenskaha.
Kum Pucina adkazvaje na pytańnie, navošta Ukrainie adkryvać druhi front i raściahvać jaho pa miažy ź Biełaruśsiu. Sprava ŭ tym, što za toje, kab Biełaruś nie spryjała miru, na Zachadzie dobra zapłaciać — vynikaje ź jaho słoŭ.
«Zialenski dumaje zusim pra inšaje: dla jaho ŭciahvańnie Biełarusi ŭ vajnu — prosta dadatkovaje finansavańnie, jakoje jamu tak nieabchodna.
Biełaruś važna vybić jak surjozny faktar mahčymaści razradki, jak viernaha sajuźnika Rasii, jaki staić na šlachu Zachodniaj dyktatury. Tamu na demanizacyju RB zakaz na Zachadzie jość», — tłumačyć jon.
Miedźviadčuk aburyŭsia tym, što zamiest Łukašenki Kijeŭ zaprašaje ŭ hości Śviatłanu Cichanoŭskuju. Jon cytuje słovy kiraŭnika MZS Ukrainy Andreja Sibihi: «Niadaŭna my ŭbačyli dziŭnuju zajavu Łukašenki, što jon hatovy sustrakacca i pryjechać u Kijeŭ. Va ŭkrainskaha boku jość z kim sustrakacca, i najbližejšym časam my čakajem vizit Cichanoŭskaj va Ukrainu. Tamu ŭ nas jość z kim havaryć pra ŭvieś śpiektr pytańniaŭ».
«Kijeŭ robić usio, kab spravakavać Minsk, jak raniej tam sa skury leźli, kab spravakavać kanflikt z Rasijaj. Tak, zamiest taho kab vykarystoŭvać RB jak placoŭku dla pieramoŭ ab miry, a Alaksandra Łukašenku — jak daśviedčanaha pieramoŭščyka, va Ukrainu zaprašajuć Cichanoŭskuju», — aburajecca Miedźviadčuk.
Viktar Miedźviadčuk ličyć heta «čystym varjactvam» i vinavacić ukrainskija ŭłady, što mienavita praź ich dziejańni adnosiny Biełarusi z ZŠA adkacilisia nazad.
«Jak patłumačyć toje, što Bieły dom jašče na hod padoŭžyŭ režym nadzvyčajnaha stanovišča i sankcyi ZŠA suprać Biełarusi? U dakumientach na hety kont havorycca, što dziejańni biełaruskich uład razhladajucca Vašynhtonam jak «niezvyčajnaja i nadzvyčajnaja pahroza» dla nacyjanalnaj biaśpieki i źniešniaj palityki ZŠA. Heta vidavočnaje tarmažeńnie paciapleńnia adnosin RB i ZŠA paśla taho, jak Tramp źniaŭ ź Biełarusi častku sankcyj. Vidavočna, kamuści heta nie padabajecca, i Zialenski kinuŭsia zaŭziata adpracoŭvać zakaz», — piša jon.
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu20
Kamientary
NN, fota miarćviečuka ŭ kajdankach la batarei lepš by dapasavałasia.)