Samy praciahły ŭ śviecie avijarejs zapuściać u nastupnym hodzie: pasažyry buduć znachodzicca ŭ niebie 22 hadziny

Rekordny pa praciahłaści pramy pieralot płanujecca adkryć u kastryčniku nastupnaha hoda. Pra heta aficyjna zajaviŭ aŭstralijski avijapieravozčyk Qantas Airways padčas prezientacyi na zavodzie Airbus u francuzskaj Tułuzie. Čakajecca, što padarožža pamiž haradami, raźmieščanymi na supraćlehłych bakach ziamnoha šara, budzie zajmać ad 19 da 22 hadzin u zaležnaści ad pavietranych patokaŭ.

Jak paviedamlaje The Times, dla absłuhoŭvańnia hetaha maršrutu Qantas budzie vykarystoŭvać śpiecyjalna madyfikavanyja łajniery Airbus A 350‑1000ULR (Ultra Long Range — zvyšvialikaja dalokaść). Hetyja samaloty zdolnyja pieraadolvać bolš za 16 000 kiłamietraŭ biez dazapraŭki. Kab zabiaśpiečyć takuju aŭtanomnaść, kanstruktary ŭstalavali dadatkovy paliŭny bak, jaki mieścić jašče kala 20 000 litraŭ paliva.

Prajekt biespasadačnaha rejsa Łondan — Sidniej kampanija Qantas raspracoŭvała jašče z 2017 hoda. Adnak zapusk nieadnarazova adkładvaŭsia z-za pandemii COVID-19, a paźniej — praz prablemy ŭ suśvietnych łancužkach pastavak avijacyjnych detalaŭ.

Hetaja inicyjatyva atrymała nazvu Project Sunrise («Prajekt Uschod sonca») — u honar histaryčnaha rejsa Qantas 1943 hoda pamiž aŭstralijskim Piertam i Cejłonam (ciapier Šry-Łanka). Kab paźbiehnuć vyjaŭleńnia radarami, piłoty tady znachodzilisia ŭ pavietry da 33 hadzin biez prypynkaŭ, padčas jakich dvojčy nazirali ŭschod sonca.

Pasažyry novaha rejsa Qantas z Łondana ŭ Sidniej, taksama ŭbačać dva ŭschody sonca, bo łajnier budzie ruchacca praź dzieviać časavych pajasoŭ, pieraadolvajučy dystancyju na 17 015 kiłamietraŭ.

Sidniej nie stanie pieršym horadam Aŭstralii, jaki źviazali z Łondanam pramym avijazłučeńniem. Jašče ŭ 2018 hodzie Qantas zapuściła biespasadačny maršrut pamiž stalicaj Vialikabrytanii i Piertam praciahłaściu kala 17 hadzin. Na hety momant hety rejs časova prypynieny z-za abmiežavańniaŭ na vykarystańnie pavietranaj prastory nad Blizkim Uschodam.

Na siońnia tytuł samaha praciahłaha rehularnaha pramoha rejsa ŭ śviecie ŭtrymlivaje maršrut Singapore Airlines pamiž Sinhapuram i Ńju-Jorkam. Adlehłaść 15 349 kiłamietraŭ tam pieraadolvajecca mienš čym za 19 hadzin. Adnak, jak zaŭvažaje ahienctva Associated Press, sinhapurski rejs SQ24 maje istotnuju asablivaść: jon nie praduhledžvaje najaŭnaści ekanom-kłasa, aryjentujučysia tolki na premijalnyja siehmienty.

Dla realizacyi svajho maštabnaha prajekta Qantas zakazała 12 novych samalotaŭ Airbus A350-1000ULR. Pavodle daŭniaj tradycyi, usie jany atrymajuć nazvy zorak — heta danina pavahi kłasičnym mietadam navihacyi pa načnym niebie.

Kali standartny Airbus A 350‑1000 raźličany na pieravozku da 480 pasažyraŭ, to viersija dla Qantas budzie mieć usiaho 238 miescaŭ. Heta zroblena dla pavyšeńnia kamfortu i źnižeńnia vahi łajniera. Z ahulnaj kolkaści 140 miescaŭ buduć adviedzieny pad ekanom-kłas. Na borcie taksama źjavicca śpiecyjalnaja «zona dabrabytu» (Wellbeing Zone), raźmieščanaja pamiž sałonami ekanom– i premium-ekanom-kłasaŭ. Tam ludzi zmohuć raźmiać nohi, a taksama samastojna ŭziać napoi i zakuski, što važna dla fizičnaha stanu pry amal sutačnym pieralocie.

Pavialičyć

Pieršy samalot dla hetych metaŭ Qantas pavinna atrymać u krasaviku 2027 hoda. Prodaž kvitkoŭ na rejsy ŭ miežach Project Sunrise płanujecca adkryć u lutym taho ž hoda. Dakładny košt palotu pakul nie abvieščany, ale pradstaŭniki kampanii adkryta kažuć: pramy pieralot budzie kaštavać značna daražej za varyjanty ź pierasadkami. Asnoŭnym arhumientam na karyść vysokaj cany źjaŭlajecca ekanomija času — biespasadačny rejs dazvolić pasažyram zachavać da čatyroch hadzin, jakija zvyčajna vydatkoŭvajucca na stykoŭku ŭ Sinhapury ci inšych chabach.

Paśla paśpiachovaha zapusku linii Sidniej — Łondan avijakampanija płanuje adkryć jašče adzin zvyšdaloki kirunak — pamiž Sidniejem i Ńju-Jorkam. U dalejšaj pierśpiektyvie mohuć źjavicca i inšyja pramyja rejsy z uschodniaha ŭźbiarežža Aŭstralii ŭ miehapolisy Jeŭropy i Paŭnočnaj Amieryki, siarod inšaha, u Čykaha.

• 1
• 0
• 0
• 0
• 0
• 0
• 0
• 0