Wizz Air abiacaje internet ad Starlink na svaich rejsach z 2027 hoda

Spadarožnikavy internet Starlink, raspracavany kampanijaj SpaceX Iłana Maska, usio aktyŭniej źjaŭlajecca na borcie pasažyrskich samalotaŭ. Technałohija dazvalaje karystacca chutkasnym internetam na praciahu ŭsiaho palotu — ad momantu pasadki ŭ samalot da prybyćcia ŭ punkt pryznačeńnia. U adroźnieńnie ad mnohich tradycyjnych sistem suviazi, jakija pačynajuć pracavać tolki paśla naboru vyšyni, Starlink zabiaśpiečvaje dostup da sietki navat padčas ruchu samalota pa ziamli.

Pavodle avijakampanij, jakija ŭžo vykarystoŭvajuć sistemu, chutkaści złučeńnia dastatkova dla prahladu videa, videazvankoŭ i inšych zvyčajnych internet-servisaŭ. Pasažyry mohuć karystacca sietkaj amal hetak ža, jak doma abo ŭ ofisie.

Da hetaha času asnoŭnymi karystalnikami Starlink zastavalisia tradycyjnyja avijapieravozčyki. Adnak ciapier da ich vyrašyli dałučycca i pradstaŭniki biudžetnaha siehmienta.

Jak paviedamlaje Simple Flying, vienhierski łaŭkostar Wizz Air abviaściŭ, što pačnie ŭkaraniać sistemu na svaich rejsach, a pasažyry zmohuć karystacca servisam z 2027 hoda. U kampanii paviedamili, što abstalavańnie Starlink atrymajuć samaloty novaha pakaleńnia Airbus A320neo i A321neo. Terminy poŭnaha razhortvańnia sistemy pakul nie nazyvajucca.

Dla Wizz Air heta moža stać adnym z najbujniejšych prajektaŭ takoha kštałtu ŭ Jeŭropie. Na siońniašni dzień fłot kampanii naličvaje 265 samalotaŭ siamiejstva Airbus A320, pryčym bolšaść ź ich składajuć mašyny novaha pakaleńnia NEO. Kali Starlink źjavicca na ŭsich takich samalotach, kampanii daviadziecca abstalavać sistemaj bolš za 200 pavietranych sudnaŭ, jakija ŭžo znachodziacca ŭ ekspłuatacyi.

Hałoŭny kamiercyjny dyrektar Wizz Air Ien Malin (Ian Malin) zajaviŭ, što biudžetnyja avijapieraloty nie pavinny aznačać admovu ad sučasnych servisaŭ. Pavodle jaho słoŭ, pasažyry nie pavinny vybirać pamiž nizkim koštam bileta i mahčymaściu padtrymlivać suviaź padčas padarožža.

Adnak rašeńnie kampanii vyhladaje davoli niezvyčajnym na fonie kankurentaŭ. Inšyja bujnyja jeŭrapiejskija łaŭkostary, u tym liku Ryanair i easyJet, pakul nie płanujuć vykarystoŭvać Starlink. U easyJet paśla pieramovaŭ sa SpaceX pryjšli da vysnovy, što ekanamičnaja madel servisu nie adpaviadaje kancepcyi biudžetnych pieravozak. Kiraŭnictva Ryanair taksama nieadnarazova staviła pad sumnieŭ metazhodnaść takich vydatkaŭ.

Pavialičyć

Asnoŭnaja prablema źviazana z koštam prajekta. Avijakampanii pavinny apłačvać jak ustanoŭku abstalavańnia, tak i dalejšaje vykarystańnie sistemy. Pry hetym Starlink nie praduhledžvaje asobnaj płaty dla pasažyraŭ za dostup da sietki. Heta aznačaje, što pieravozčyki nie mohuć niepasredna viarnuć vydatki praz prodaž internetu na borcie.

Dla Wizz Air heta asabliva aktualna na fonie niadaŭnich zachadaŭ pa skaračeńni raschodaŭ. Kampanija ŭžo pierahledzieła płany pa zakupcy dalokamahistralnych Airbus A321XLR i abviaściła pra zakryćcio svajho pradpryjemstva ŭ Abu-Dabi.

U toj ža čas u Wizz Air raźličvajuć, što sistema pryniasie ŭskosnyja vyhody. Kampanija spadziajecca na rost prodažaŭ dadatkovych pasłuh praź ličbavyja płatformy, a taksama na vykarystańnie internetu ekipažami dla atrymańnia apieratyŭnaj infarmacyi i aptymizacyi palotaŭ.

• 0
• 0
• 0
• 0
• 0
• 0
• 0
• 0