U Biełarusi zapracavaŭ miedpartał. Zaraz źviestki svajoj miedycynskaj karty možna prahladać anłajn
U Biełarusi zapuścili novy servis — «Miedpartał», jaki dazvalaje atrymlivać infarmacyju pra stan svajho zdaroŭja ŭ režymie anłajn. Źviestki pra naviedvańni daktaroŭ, pastaŭlenyja dyjahnazy, vyniki analizaŭ, vakcynacyju i inšyja miedycynskija pasłuhi dastupnyja praz asabisty kabiniet karystalnika, piša Onliner.by.
Novy servis tak i nazyvajecca — «Miedpartał». Jon raspracavany Ministerstvam achovy zdaroŭja i pakul pracuje ŭ testavym režymie.
Sistema praciahvaje papaŭniacca novymi danymi i funkcyjami, tamu niekatoryja raździeły mohuć pracavać niestabilna, a častka infarmacyi — adlustroŭvacca nie całkam.
Akramia elektronnaj miedycynskaj karty, na partale praduhledžany dziońnik zdaroŭja, dzie karystalniki mohuć samastojna fiksavać asnoŭnyja pakazčyki svajho stanu — tempieraturu cieła, arteryjalny cisk, puls i ŭzrovień saturacyi. Hetyja źviestki ŭ dalejšym mohuć dapamahčy doktaru padčas vočnaha pryjomu i pryznačeńnia lačeńnia.
Pry hetym danyja, uniesienyja ŭ dziońnik zdaroŭja, nie prahladajucca daktarami ŭ režymie realnaha času. Tamu ŭ ekstrannych situacyjach abo pry paharšeńni samaadčuvańnia nieabchodna nieadkładna źviartacca pa miedycynskuju dapamohu: vyklikać chutkuju dapamohu pa numary 103 abo vyklikać doktara dadomu.
Dla abarony piersanalnych danych dostup da partała ažyćciaŭlajecca tolki praź biaśpiečnyja sposaby aŭtaryzacyi. Uvajści ŭ sistemu možna z dapamohaj elektronnaha ličbavaha podpisu, ID-kartki hramadzianina sa sčytvalnikam abo praź Mižbankaŭskuju sistemu identyfikacyi (MSI).
Kamientary
Vam nie nužna svoboda. Tiepieŕ vsia informacija o vašiem zdorov́je budiet dostupna HB, čtoby vas łomať, dovodia do hrani.