Kruty: Vajskovyja zbory dla niadbajnych ahraryjaŭ buduć doŭžycca 2‑3 miesiacy
Na praviedzienaj u Asipovičach naradzie z udziełam pradstaŭnikoŭ Asipovickaha, Hłuskaha i Babrujskaha rajonaŭ kiraŭnik administracyi Łukašenki Dźmitryj Kruty abmierkavaŭ pytańni, uźniatyja padčas učarašniaj sielektarnaj narady pa ŭboračnaj kampanii z udziełam samoha Łukašenki.
Dźmitryj Kruty adznačyŭ, što Łukašenka ŭvioŭ najbolš žorstki, mabilizacyjny režym praviadzieńnia ŭborki. Hałoŭnaja zadača ciapier — biez strat sabrać uradžaj, jaki vyraścili biełaruskija ahraryi.
U suviazi z hetym budzie ŭzmocnieny kantrol za dyscyplinaj. Pa słovach Krutoha, pa daručeńni Łukašenki Ministerstva abarony pavinna padrychtavać miescy i vidy rabot dla tych rabotnikaŭ, jakija parušajuć dyscyplinu.
U kožnym rajonie staršynia rajvykankama razam z vajskovym kamisaram i kiraŭnikami sielhaspradpryjemstvaŭ pavinny vyznačyć śpisy takich ludziej. U ich liku, jak zajaviŭ Kruty, buduć «niadbajnyja rabotniki, parušalniki, tyja, chto kradzie, złoŭžyvaje ałkaholem, lanujecca».
Hetych ludziej płanujuć nakiroŭvać u rasparadžeńnie Ministerstva abarony ŭ miežach vajskova-vychavaŭčych zboraŭ praciahłaściu da dvuch-troch miesiacaŭ. Pa słovach Krutoha, heta budzie tyčycca ŭsich niezaležna ad pasady: kali čałaviek sarvaŭ pracu — jon budzie nakiravany na zbory.
«Dziakujučy presie kraina pavinna viedać nie tolki hierojaŭ žniva, što absalutna spraviadliva, ale i takich «hierojaŭ», jakija svaim razhildziajstvam zryvajuć praces. Kali jany pravalilisia ŭ miežach uboračnaj kampanii, to, napeŭna, u armii zmohuć prynieści karyść krainie — pracy tam dastatkova, u tym liku haspadarčaj i bytavoj», — zajaviŭ čynoŭnik.
Jon padkreśliŭ, što takija miery patrebnyja nie tolki dla pakarańnia, ale i dla vychavańnia. Umovy, pavodle jaho słoŭ, buduć «spartanskija», adnak ludzi atrymajuć mahčymaść umacavać fizičnuju formu i prynieści karyść praz pracu.
Adkaznymi za arhanizacyju hetaj pracy buduć staršyni rajvykankamaŭ, vajenkamaty i kiraŭniki sielhaspradpryjemstvaŭ. Krutoj zajaviŭ, što nielha budzie nikoha prykryvać.
«Za arhanizacyju žniva ŭ vobłaści adkazvaje staršynia abłvykankama, a staršynia rajvykankama — centralnaje źviano na miescy. Kali nie spracuje rajon — adkazvać daviadziecca jamu», — skazaŭ kiraŭnik administracyi Łukašenki.
Nastaśsia Kaściuhova pra pazicyju Statkieviča i Cichanoŭskaj: Prapanova «dacisnuć» hučyć jak prapanova jašče pačakać niezrazumieła čaho i jak doŭha3636
Kamientary