«Žachliva śmiardzić». U Breście masava skardziacca na vadu z-pad krana
Užo niekalki tydniaŭ žycharoŭ Bresta turbuje rezki niepryjemny pach vady z-pad krana, jaki źjaviŭsia paśla červieńskich pierabojaŭ z vodazabieśpiačeńniem. Śpiecyjalisty patłumačyli, što adbyvajecca, ale kali prablema źniknie, pakul nieviadoma, piša Tochka.by.
Skarhi pastupajuć z Vulki, Kavalova, Uschodu, Paŭdniovaha haradka i Paŭdniova-Zachodniaha mikrarajona. U sacsietkach ludzi pišuć praktyčna adno i toje ž: vadu niemahčyma pić.
Voś jak apisvaje situacyju ŭ Threads žycharka Bresta:
«U Paŭdniovym z krana try tydni idzie vada z pacham hramadskaj prybiralni na vakzale. Pra toje, kab jaje pić, navat niama havorki. Paśla myćcia ruk zastajecca tłustaja plonka, paśla prańnia navat kandycyjanier nie pierabivaje pach. Hetuju vadu admaŭlajucca pić chatnija žyvioły».
Pavodle słoŭ žančyny, zvaroty ŭ roznyja instancyi vyniku nie prynieśli.
«Adkaz adzin: proby narmalnyja, na vychadzie vada čystaja, źlicie vadu — i ŭsio budzie dobra. Kolki nam jaje jašče źlivać? Miesiac? Dva? A za vadu potym chto zapłacić?» — dzivicca jana.
Padobnymi historyjami dzielacca i inšyja karystalniki:
«Tak, prosta žachlivaja vada. U ich, napeŭna, takija normy, što ŭsialakaja vada narmalnaja. Sami vielmi pakutujem, vada žachliva śmiardzić žalezam. Pieražyvaju, što lepš nie stanie».
«Raniej takoj prablemy nie było. Razmaŭlała sa staršynioj adnaho z damoŭ, dzie takaja prablema i brali proby. Proby ŭ normie, a vada ŭsio horšaja».
«Pra jakaść vady naohuł niama čaho kazać. Pa Skrypnikava vada zabivaje novy filtr za hadzinu vykarystańnia. Santechnika litaralna na nastupny dzień paśla prybirańnia ŭžo ŭsia zabitaja… Prosto žeść».
«Ja dumała, što mnie adnoj tak śmiardzić vada! I bializna paśla prańnia z kandycyjanieram taksama śmiardzić. Uschod, Leninhradskaja».
«U centry paśla płanavych rabot vada prosta ahidnaja. I nie tolki pach, ale i śmiećcie. Z hetym naohuł płanujuć štości rabić?»
Paśla chvali skarhaŭ situacyju prakamientavali ŭ «Brestvodakanale». Na pradpryjemstvie paviedamili, što na vodazabory «Muchaviecki» iduć płanava-technałahičnyja raboty. Mienavita z hetym tam źviazvajuć źmianieńnie pachu i prysmaku vady ŭ niekalkich mikrarajonach horada.
Pry hetym u vodakanale padkreślili, što jakaść vady znachodzicca pad pastajannym kantrolem. Pavodle danych łabaratornych daśledavańniaŭ, jana całkam adpaviadaje hihijeničnym narmatyvam pa orhanaleptyčnych, fizika-chimičnych i mikrabijałahičnych pakazčykach.
Kali zavieršacca raboty i źniknie niepryjemny pach, na pradpryjemstvie nie ŭdakładnili.
Kamientary